IGIHE

Abana 120 biga mu mashuri abanza yegereye pariki bahawe ubumenyi bwihariye mu kurengera ibidukikije

0 4-08-2022 - saa 17:59, Claude Bazatsinda

Abana 120 bo mu bigo by’amashuri abanza byegereye Pariki y’Igihugu y’Ibirunga, bahawe ubumenyi mu kurengera urusobe rw’ibinyabuzima no kurengera ibidukikije, bahiga ko ntawe uzongera kubyangiza barebera kuko bifatiye runini ikiremwamuntu.

Abo bana ni abo mu Bigo by’Aamashuri abanza bya Bisate, Rushuni, Kampanga, Kagano na Kabara. Bigishijwe kubungabunga urusobe rw’ibinyabuzima no kurengera ibidukikije.

Ni amasomo bahawe n’Ikigo cy’Igihugu cy’Iterambere, RDB, n’abafatanyabikorwa bacyo barimo Children in Wilderness, Muhisimbi Voice of Youth in Conservation Group na The Diana Fossey Gorilla Fund mu bihe by’ibiruhuko.

Nyuma yo guhabwa amasomo, abo bana bafatanyije n’ubuyobozi bw’ibigo by’amashuri bigaho, bashinze amahuriro [Clubs], agamije kurengera urusobe rw’ibinyabuzima n’ibidukkikije biyemeza ko nta muntu uzongera kubyangiza barebera kuko ibidukikije ari ubuzima kandi bitariho n’ubuzima bwa muntu butashoboka.

Asifiwe Egide ni umwe muri abo bana yagize ati" Ndashimira abaduhaye aya masomo kuko mbere numvaga ibidukikije sinsobanukirwe icyo ari cyo. Kubungabunga urusobe rw’ibinyabuzima n’ibidukikije bifite akamaro kuko nabyo ni ubuzima bwacu, turebye nk’inyoni n’inzuki bidufasha kubangurira ibihingwa tukeza, ingagi ziduhesha amadovize nayo akadufasha mu iterambere. Ntawe ukwiye kwangiza ibidukikije agomba kubireka bikabaho neza nawe akabaho."

Manirakiza Gervais nawe yagize ati" Ubu nasobanukiwe no kurengera ibidukikije ku buryo mbyigisha n’abandi. Mbonye nk’aho bateze ingagi nategura uwo mutego mbere y’uko uyangiza kuko nayo ni ikinyabuzima kigomba kubaho mu buryo bwacyo, mbonye aho bari kwangiza amashyamba nababuza cyangwa nkatanga amakuru bigakumirwa kuko biradutunze kandi nitwe tugomba kubibungabunga kugira ngo natwe tubeho neza."

Isimbi Giraneza Huguette yagize ati" Nabonye ubumenyi mu kubungabunga urusobe rw’ibinyabuzima n’ibidukikije, urebye nk’ibimera biduha umwuka duhumeka urumva kubyangiza bituma tubura umwuka duhumeka kandi twakwiye kubibungabunga tukabyongera nk’uko natwe twiyongera kugira ngo tubeho neza”.

Umukozi wa The Diana Fossey Gorilla Fund, Ngiramahoro Maurice, avuga ko kuba barahisemo kwigisha abo bana bato akamaro ko kurengera urusobe rw’ibinyabuzima n’ibidukikije ari uburyo bwiza bwo gukora ubuhumbikiro bwiza kuko ari bo Rwanda rw’ejo.

Yagize ati" Impamvu twahisemo kwigisha abana ni uko ari ubuhumbikiro kuko bafata ibintu vuba kandi bakabikurana, bariya baturiye Pariki kandi n’abayangiza niho batuye”.

Ngiramahoro avuga ko aba bana nibamara kumenya akamaro ko kurengera ibidukikije n’ububi bwo kubyangiza bazatanga umusanzu wo kubirengera kuko nibo Rwanda rw’ejo.

Mu bibazo abo bafatanyabikorwa bagaragaje bagihura nabyo, birimo kuba mu gihe abo bana bari kwigishwa biba ngombwa ko basura ahantu hatandukanye harimo na za pariki ariko bakagorwa n’ikiguzi cyo kubapimisha indwara zirimo na Covid-19.

Umunyamabanga Nshingwabikorwa w’Umurenge wa Kinigi, Twagirimana Innocent, avuga ko bishimiye iyo gahunda yo kwigisha abakiri bato akamaro ku kubungabunga ibidukikije kandi ko imbogamizi bagaragaje zigiye gukorerwa ubuvugizi ku nzego zisumbuye kugira ngo bisubizwe kuko byose biri mu mugambi wo kurerera u Rwanda.

Yagize ati"Ibi ni ibyo gushimira abo bafatanyabikorwa kuko kubona abana bato biga kurengera ibidukikije n’urusobe rw’ibinyabuzima birashimisha. Bagiye kuba umusemburo w’impinduka mu bigo bigaho no mu miryango baturukamo ku buryo buri wese kurengera ibidukikije abigira ibye kandi afite ubumenyi bw’ibanze mu kubungabunga no kurengera ibidukikije."

Biteganyijwe ko ibikorwa nk’ibi byo kwigisha abana bakiri bato kurengera ibidukikije bizaba igikorwa ngarukamwaka gihoraho hagamijwe gutoza abakiri bato kumva neza akamaro ko kubungabunga ibidukikije no kurengera urusobe rw’ibinyabuzima.

Abana batojwe no gukoresha indebakure zibafasha kureba niba inyamaswa ziri kure zidafite ibibazo
Bigishijwe kurengera urusobe rw'ibinyabuzima n'ibidukikije bakiri bato
Abana basoje amasomo mu kubungabunga ibidukikije bahawe ibikapu, amakaye n'amakaramu bizabafasha mu myigire
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza