IGIHE

Ab’i Nyamasheke bahinduye imyumvire, bacika ku guhishira abahohotera abangavu

0 27-11-2022 - saa 22:34, Nsanzimana Erneste

Minisitiri w’Uburinganire n’Iterambere ry’Umuryango, Prof. Bayisenge Jeannette, yasabye imiryango ibana itarasezeranye gufata icyemezo cyo kubikora kuko bishobora no kuba intandaro y’ihohoterwa rishingiye ku gitsina.

Yabitangaje ku wa 25 Ugushyingo 2022, ubwo mu Rwanda hatangizwaga ubukangurambaga ngarukamwaka bwo kurwanya ihohoterwa rishingiye ku gitsina.

Ku rwego rw’igihugu, ubu bukangurambaga buzamara iminsi 16 bwatangirijwe mu Karere ka Nyamasheke.

Ni igikorwa cyahuriranye no gusezeranya imbere y’amategeko imiryango 107 yabanaga mu buryo butemewe n’amategeko.

Imiryango yasezeranye yiyemeje kubana mu mahoro no kwirinda ihohoterwa iryo ariryo ryose by’umwihariko irishingiye ku gitsina.

Mu bikorwa biteganyijwe mu minsi 16 harimo kwegereza abahohotewe serivisi z’ubuvuzi, irangamimere n’ubutabera.

Mu bindi biteganyijwe harimo imikino yo gukangurira abaturarwanda kwirinda ihohoterwa rishingiye ku gitsina, rikorerwa abantu bose by’umwihariko abagore n’abakobwa.

Mu Karere ka Nyamasheke habaruwe imiryango 666 ibana itarasezeranye imbere y’amategeko, muri 107 yasezeranye bivuze ko hasigaye imiryango irenga 500 ibana mu buryo budakurikije amategeko.

Umuyobozi w’Akarere ka Nyamasheke, Mukamasabo Applonie, yavuze ko mu miryango ibana itarasezerana ariho higanje ihohoterwa.

Minisitiri Prof. Bayisenge yashimye imiryango yafashe icyemezo cyo gusezerana imbere y’amategeko avuga ko byagaragaye ko amakimbirane yo mu ngo mu biyatiza umurindi harimo no kubana abantu badasezeranye.

Yagize ati “Kuko iyo umuntu atarasezerana haba hatariho kwizerana no kujya inama, akaguru kamwe kaba karimo akandi kari hanze. Urumva rero iyo akaguru kamwe kari mu rugo akandi kari hanze nta bwo muzashyira hamwe ngo mukore wa muryango utekanye kandi n’abana usanga babigiriyemo ibibazo.’’

Prof. Bayisenge yavuze ko mu bintu bihungabanya umudendezo w’ingo ku isonga haza ubusinzi, asaba abagize ingo kwirinda ubusinzi.

Ati “Turabasabye mwo kabyaramwe, iwanyu ntiharangwe ubusinzi, kuko ubu businzi ntibugira ingaruka ku muryango gusa ahubwo inzoga ziranabangiza. Inzoga zangiza ubuzima kandi usibye n’ibyo habaho gusesagura umutungo.”

  Abangavu bahishira ababateye inda bikuse agashyi

Ubu bukangurambaga bubaye mu gihe imibare igaragaza ko mu Rwanda abangavu barega ibihumbi 20 baterwa inda ku mwaka.

Mu bikorwa biteganyijwe mu byumweru bibiri ubu bukangurambaga buzamara, harimo gufasha abahohotewe kubona ubutabera.

Biturutse ku gikorwa kimaze iminsi ibiri kibera mu Karere ka Nyamasheke cyo kwegereza abahohotewe serivisi zikomatanyije abakobwa bahohotewe bagaterwa inda batarageza ku myaka y’ubukure, bavuye ku izima bemera kugaragaza ababateye inda ngo bahanirwe icyaha cyo gusambanya abana.

Aba bakobwa babwiye IGIHE ko babahishiraga kubera gutinya ko imiryango yabo yabagirira nabi no kubura indezo.

Mu buhamya bwabo bavuga ko biyemeje kubagaragaza kuko bamenye ko amategeko abarengera.

Umwe muri bo yavuze ko umuryango w’umusore wamuteraga ubwoba ko navuga ko yamuteye inda bazamugirira nabi.

Uyu mukobwa watewe inda ku myaka 16 avuga ko abana batewe inda bakiri bato bakorerwa ihohoterwa rikomeye kuko baterwa inda n’abasore babaruta, imiryango ikajya ibacyurira, ikabaraza hanze, n’umusore akanga kurera umwana.

Yagize ati "Umusore wanteye inda yari afite imyaka 23, natanze amazina ye kuri RIB bambwira ko bazamukurikirana.’’

Yavuze ko baramutse bamufunze bakanamutegeka kujya amuha indezo yakumva abonye ubutabera.

  Imihigo ni yose mu miryango yasezeranye

Imiryango yasezeranye yakorewe ibirori ndetse inakata umutsima nk’ikimenyetso cyo kwishimira intambwe nziza yateye.

Sahabu Damascène wari umaze imyaka umunani abana n’umugore we batarasezeranye yavuze ko icyatumye afata icyemezo cyo gusezerana n’umugore we ari ukugira ngo yirinde ibishuko.

Ati "Twafashe icyemezo bituvuye ku mutima. Inyungu irimo ni uko imitungo yacu twese tuzaba tuyifiteho ububasha, si bya bindi ngo ni iy’umugabo, ni iy’umugore twese tuzaba tuyifiteho uburenganzira bungana. Ikindi ntituragera aho Satani atarasa imyambi umwe muri twe yashoboraga kubona undi muntu akumva aramwifuje akaba yamusanga kuko tutasezeranye.’’

Mukamurenzi Florence wafashe icyemezo cyo gusezerana n’umugabo babana bitemewe n’amategeko avuga ko bizongera ubwizerane hagati ye n’umugabo we.

Ati “Iyo mubanye mutarasezeranye buri umwe aba afite urwicyekwe ngo wenda yanta akajya gushaka undi, kandi twari tumaze kubyarana ariko iyo mumaze gusezerana buri wese aba ateganye kandi n’ abana baba bafite uburenganzira bw’aho se avuka.’’

Abagize imiryango yasezeranye bavuze ko ibibazo by’imibanire bari bafitanye bigiye kujya ku ruhande, bakabana mu mahoro.

Umuyobozi w’Akarere ka Nyamasheke, Mukamasabo Applonie, yashimiye imiryango yasezeranye imbere y'amategeko
Imiryango 107 yabanaga mu buryo bunyuranyije n'amategeko yasezeranye yiyemeza kuba intangarugero mu ngo zitekanye
Abagore bahohotera abagabo na bo basabwe kwikubita agashyi
Abayobozi batandukanye bitabiriye umuhango wo gutangiza iminsi 16 yo kurwanya ihohoterwa rishingiye ku gitsina
Minisitiri w’Uburinganire n’Iterambere ry’Umuryango, Prof. Bayisenge Jeannette, yasabye imiryango ibana itarasezeranye gufata icyemezo cyo kubikora bwangu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza