IGIHE

Uganda yazinzitse abahagarariye ibihugu byabo i Kampala ku kibazo cyayo n’u Rwanda

10 18-05-2019 - saa 09:32, Bukuru JC

Minisitiri w’Ububanyi n’Amahanga wa Uganda Sam Kutesa, kuri uyu wa Gatanu, yahuye n’abahagarariye ibihugu byabo muri iki gihugu, agereka ku Rwanda ibirego bidafite ibimenyetso.

Muri byo harimo ko ‘u Rwanda rwafunze umupaka’. Iki kimaze kuba nk’indirimbo kuri Uganda nyamara u Rwanda rwarasobanuye neza ko umupaka wa Gatuna, utemerewe kunyurwaho imodoka nini by’agateganyo kubera ibikorwa byo kuwubaka ngo byoroshye itangwa rya serivisi.

Iki kirego gihimbano cyakurikiwe n’ikindi cy’uko ‘Uganda yataye muri yombi abo mu nzego z’umutekano z’u Rwanda hanyuma ikabasubiza iwabo’.

Nyuma y’ijambo yagejeje kuri abo badipolomate, Kutesa yaganiriye n’abanyamakuru, ateza urujijo ku byo u Rwanda rushinja Uganda, birimo kuba Guverinoma ya Museveni, ari umuterankunga, ucumbikiye kandi ufasha imitwe igamije guhungabanya umutekano w’u Rwanda nka RNC.

Inshuro nyinshi u Rwanda rubinyujije muri Ambasade yarwo muri Uganda, rukoresheje inyandiko ndetse n’ibindi bimenyesho rwagaragaje ko Guverinoma ya Museveni idashyigikira RNC gusa ahubwo inashyigikira umutwe wa FDLR, ugizwe na benshi basize bakoze Jenoside yakorewe Abatutsi.

Raporo y’impuguke za Loni ubwayo nayo yerekanye ko Uganda n’u Burundi, ari indiri yo gushakiramo abajya mu mutwe wa gisirikare ukorera muri RDC, mu kizwi nka P5, irwanya u Rwanda, aho RNC na FDLR ari abayigize bo mu rwego rwo hejuru.

Iyi raporo yasohotse isanga igihamya cyo mu Ukuboza 2017, aho itsinda ry’abantu 46 b’urubyiruko baherukaga gufatirwa ku mupaka wa Kikagati uhuza Uganda na Tanzania, bakoresheje impapuro mpimbano z’inzira zatanzwe na Uganda.

Aba bafashwe biyemereye ko bari bagiye mu myitozo ya gisirikare ya RNC, ndetse impapuro z’inzira bazihawe n’urwego rw’ubutasi rwa Uganda ‘CMI’, aba ariko baje kurekurwa ndetse Uganda iraruca irarumira.

Abakurikiranira hafi iyi mikorere, bavuga ko ubu ari bwo buryo Uganda ikoresha bwo guceceka ntiyite ku bimenyetso u Rwanda rutanga. Ibi kandi bikurikirwa n’ibirego byinshi nk’uko Kutesa yabigenje, ariko hakirengagizwa ibyo bashinjwa kandi bifite ibimenyetso.

Kutesa kandi yahakanye ibyo u Rwanda rushinja inzego z’umutekano za Uganda, byo guta muri yombi abanyarwanda mu buryo bunyuranyije n’amategeko, kubakorera ihohoterwa, kubafunga bitemewe ndetse no kubakorera iyica rubozo, ibi byose avuga ko atari ukuri.

Ibi ariko ni ukwigiza nkana kuko hari ibihumbi by’abanyarwanda bakorewe ibyo bikorwa n’inzego z’umutekano za Uganda, biteguye guhamya ko babikorewe na CMI.

Umunyamabanga wa Leta ushinzwe EAC, Olivier Nduhungirehe, avuga ko abanyarwanda barenga 1000 b’inzirakarengane bari muri za gereza za Uganda ndetse batigeze banagezwa mu butabera.

Mu mwiherero w’abayobozi bakuru b’u Rwanda, Perezida Kagame nawe yagarutse kuri iki kibazo agira ati “Kuki nibura batageza mu rukiko abanyarwanda bafashe ngo bababuranishe mu mucyo”.

Ubwo Minisitiri w’Ububanyi n’Amahanga w’u Rwanda, Dr Richard Sezibera, yahuraga na Kutesa, yanditse kuri Twitter agira inama abanyarwanda yo kutajya muri Uganda, kubera ibikorwa bibangamiye ikiremwamuntu bakorerwa iyo bagezeyo.

Umunyarwanda Past. Ntakirutimana Theoneste wo muri ADEPR wahonotse iyicarubozo rya CMI yari amazemo amezi abiri, mu cyumweru gishize yatangaje ko hari abanyarwanda barenga 100 barimo gukorerwa ibikorwa bya kinyamaswa i Mbuya gusa.

Ku cyumweru, CMI yafashe abandi bayoboke ba ADEPR, Bright Hakizimana na Moses Nsabimana, bombi b’abanyarwanda. Imiryango yabo n’inshuti bafite ubwoba ko baba bari i Mbuya.

Past.Ntakirutimana avuga CMI ifatanya na RNC mu gukorera iyicarubozo inzirakarengane z’abanyarwanda. Avuga ko mu bamubajije harimo abavuga Ikinyarwanda neza. Ati “Ni abantu ba RNC ntawundi”.

Kutesa avuga kandi ko Uganda izakomeza gushyigikira imibanire ishingiye ku mahoro, nyamara yirengagiza ko Tribert Rujugiro, utera inkunga RNC, akorera ubucuruzi muri Uganda. Arubaka ndetse agakorera itabi hariya mu gihe u Rwanda rudahwema kwerekana ko atera inkunga ibikorwa by’iterabwoba.

Ababizi bavuga ko uru ruganda ari rwo rwihishemo ibikorwa bya RNC byose muri Uganda.

Mu kiganiro n’abanyamakuru kandi Kutesa yashinje u Rwanda gutangiza ubukangurambaga mu itangazamakuru bwo kurwanya Uganda. Icyakora yibagiwe kubwira itangazamakuru uburyo ryahaye urubuga abarwanya u Rwanda ngo bakwirakwize ingengabitekerezo yabo.

Yirengagije uburyo Kayumba Nyamwasa, uyobora RNC, ahabwa umwanya kuri paji ya mbere mu kinyamakuru cya leta New Vision, agakwirakwiza umujinya afitiye u Rwanda.

Hari kandi umucengezamatwara mukuru wa RNC, David Himbara, uhabwa ipaji yose agaharabika u Rwanda. Leah Karegeya nawe uahawe ipaji yose, Charlotte Mukankusi yahawe pasiporo y’abadipolomate ya Uganda, Eugene Richard Gasana ahura na Museveni, aba bose ni inkingi za RNC.

Ibinyamakuru by’icengezamatwara rya Museveni bigerageza bigerageza guhisha ubufatanye bwa Guverinoma ya Uganda na RNC, mu buryo bwinshi. Bigaragaza isura nziza ya CMI na RNC, ku guhohotera inzirakarengane z’abanyarwanda, bivuga ko ‘Uganda yafashe ba maneko b’u Rwanda, cyangwa abakozi b’u Rwanda’.

Abo bavuga ko ari intasi, ni abantu nka Darius Kayobera n’umugore we Claudine, bafashwe mu ijoro ryo kuwa 28 Mutarama uyu mwaka, bavuye ku nyubako zabo z’ubucuruzi i muri Rubaga i Kampala.

Abatangabuhamya bavuga ko abanyarwanda bafashwe na CMI bacuzwa utwabo turimo amafaranga. Bafatwa nta mpapuro zibata muri yombi, ndetse ntibanabwirwe ibyo baregwa.

Ibyo Kutesa yabwiye abadipolomate bitandukanye cyane n’ibikorwa. Hari aho agira ati “Hari abanyarwanda bo mu nzego z’umutekano binjira muri Uganda badakurikije amategeko agenga kwinjira mu gihugu ku muntu wo mu nzego z’umutekano. Abenshi, iyo bafashwe basubizwa mu Rwanda”.

Imvugo nk’iyi yatumye abasesenguzi ku mpande zombi, bibaza cyane ku bivugwa n’abayobozi ba Museveni ndetse n’inzego z’ubutasi. Bati “ Ni gute ku kintu gikomeye nk’umutekano w’igihugu, muta muri yombi abakekwaho ubutasi mukabasubiza iwabo gusa”.

Abandi bari mu kiganiro cya Capital FM, imwe mu zikunzwe muri Uganda, bakibaza bati “Kuki Guverinoma itigeze iburanisha n’umwe mu bakekwa ngo yerekane ko uyu ari maneko w’u Rwanda?, Kubera iki, mugaragaze ibimenyetso cyangwa mwemere ko byose ari ibinyoma”.

Biratangaje kubona Kutesa yerura akabeshya ko yafashe bo mu nzego z’umutekano ntawe yagejeje mu nkiko ngo amusomere ibyo aregwa cyangwa ngo yemerere ambasade y’u Rwanda muri Uganda, kugera kuri abo basivili baba bahawe izina ry’abo mu nzego z’umutekano.

Ntakwiye kandi gushishikariza uburenganzira bw’urujya n’uruza rw’abantu mu karere nk’aho abari kubabarizwa mu nzu za CMI, barimo kunezezwa n’ubwo burenganzira. Ikigaragara ni uko Uganda yananiwe gusobanura mu buryo bufatika ibyo u Rwanda ruyishinja.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
jayjay 2019-05-20 01:57:23

Babyemere cyangwa babihakane gusa bazibishye kidogo tubarahire Muterahejuru wambanje intabangira . Just a polite reminder bibucye gisangani uwabatsinze naho yagiye kandi natwe abaana Burwanda turi maso bariya Bahima birata ntawasubira kurugamba abenshi bahugiye mubujura abandi mumajipo ubwo reero feri yambere abahungu bayifatira Kampala !!!

2
Ntabwiru 2019-05-19 14:30:16

Safari na Ntashya ibyo mukina nabyo mushobora kuba mubyifuriza u Rwanda. Niba ari abandi b’igihugu u Rwanda rufite mushobora kuba muri ku Isonga mwa Mpehe mwe.

3
Safari 2019-05-19 08:51:35

Umunsi twongeye kugira icyo dupfubiranyaho na Tanzaniya, igakaza iby’abinjira n’abasohoka ku mipaka yayo, nibwo muzabona ko turiho twitiranya uruzi n’ikiziba.

4
bimawuwa 2019-05-19 08:09:43

Iyo ukorana nu muteka mutwe nawe uba umutekamutwe..u Rwanda rurafata abadiplomate bakorera mu Rwanda rukabatembereza rubereka ibyiza bitase I gihugu ari no murwego rwo kubera ko umutekano usesuye naho Uganda ikabicaza hasi ibabwira icyasemuhanuka. ubwose umupaka nu fungurwa bazavuga iki kindi bank yisi yahaye ibihugu byombi inkunga yo kubaka imipaka yabyo Uganda yo yarananiwe none irashaka ko bitayibaraho yonyine ahubwo ko ni Rwanda rwananiwe kwubaka uwawo.

5
Ntashya 2019-05-18 13:38:56

Kwifungira mu mipaka yawe utagira umupaka n’inyanja ni ukwiyahura. Ibi bintu muzabyumva bigenze gute?

6
Pastor 2019-05-18 05:49:04

Uganda irabeshya kuko biragaragara ko itera inkunga abanzi b’uRwanda, kandi uRwanda rwagize neza kuburira abaturage barwo kutajya Uganda ariko abakora ku mupaka bazisubireho bareke umunyarwanda ushaka kwambuka ajya Uganda agende anirengere ibizamubaho kuko (kuburira bihabanye no kubuza)

7
Kiragi 2019-05-18 05:36:35

Erega ikibanza nyamukuru ni uko ibyo Muzehe wacu avuga alibyo twemera kurusha ibinyamakuru. None se ntiyivugiye ko ikibazo Ali politike atali imipaka ifunze.

8
N.Baptiste 2019-05-18 05:16:04

Politique iraha ,Tous jour umuturage azakomeza kuba ikibuga cyo gukiniraho Politique.

9
Rwandaful 2019-05-18 05:05:31

Ntawagufungiye umupaka wagenda ugakora business

10
soduka 2019-05-18 04:20:31

ariko ikibazo ndumva cyaravuyeho nyuma yuko Sankara afashwe
intambara yahise irangira ya Nyungwe.ibindi ndumva mwafungura umupaka
tukikomereza business.

Kwamamaza