IGIHE

Sudani: Abitwaje intwaro barashe mu bigaragambya havuka imvururu zikomeye

1 14-05-2019 - saa 17:59, HABIMANA James

Abantu bataramenyekana barekuye urufaya rw’amasasu mu bigaragambya mu Murwa Mukuru wa Sudani, Khartoum, bituma havuka imvururu zaguyemo abatari bake.

Inama y’igisirikare iyoboye ubutegetsi muri Sudani yavuze ko umwe mu basirikare ba leta yishwe naho abigaragambya batari bake bagakomereka.

Muri Mata uyu mwaka nibwo Omar al-Bashir wari umaze imyaka 30 ategeka Sudani yegujwe nyuma y’amezi y’imyigaragambyo aho abaturage binubiraga izamuka rikabije ry’ibiciro ndetse igihugu kikaba cyari gikomeje kujya mu kangaratete.

Nyuma yo kuvanwa ku butegetsi igisirikare cyafashe ubutegetsi bituma abaturage banga kuva mu mihanda aho bashaka ko ubuyobozi bushyirwa mu maboko y’abasivile.

CNN yavuze ko abantu batandatu bishwe barashwe kuri uyu wa Mbere. Ikinyamakuru cya leta SUNA, cyo cyavuze mu bakomeretse harimo batatu bo mu ngabo za leta.

Nubwo imyigaragambyo ikomeje, inama y’igisirikare iyoboye Sudani yavuze ko izaguma ku buyobozi mu gihe cy’imyaka ibiri, gusa umuryango mpuzamahanga wo ukomeje kubotsa igitutu ngo barekure ubutegetsi.

Omar al-Bashir akurikiranyweho ibyaha byo guteza imidugararo n’uruhare mu kwica abigaragambya.

Ubushinjacyaha bwa Sudani bwabitangaje kuri uyu wa Mbere nyuma y’iminsi buvuze ko agiye gutangira guhatwa ibibazo.

Kuva ku wa 11 Mata Bashir yakurwa ku buyobozi, nta hantu na hamwe aragira icyo avuga.

Mu ntangiriro za Gicurasi, yategetswe kwitaba ubushinjacyaha kugira ngo ahatwe ibibazo ku byaha by’iyezandoke no gutera inkunga imitwe y’iterabwoba.

Abigaragambya bakomeje guhangana n'igisirikare cya leta
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Gasore 2019-05-15 03:01:42

Second Libya, sauf que aha ho abazungu batagaragaye cyane, abanyagihugu aribo bakitwikiye, Imana itabare Africa! ubu igisirikare kigiye kuvuga ko bari mu bihe bikomeye babe bagumye ku butegetsi.
Afrika warakubititse! afrika warababaye!
Ninde upfa? ni mwene Bashir, ni mwene general cg mwene minister! wapi aba bibereye za London na Texas, abaturage bapfe ubundi imitwe yitwara gisirikare ivuke, abazungu bayihe intwaro, abanya sudan bapfe, nyumaaaaa abazungu bazaze bati tuje kubafasha! And the game continues!

Kwamamaza