IGIHE

Perezida Ndayishimiye yerekeje i Nairobi mu biganiro bihuza RDC n’imitwe yitwaje intwaro ihakorera

0 27-11-2022 - saa 20:18, Igizeneza Jean Désiré

Perezida w’u Burundi akaba n’Umuyobozi w’Umuryango wa Afurika y’Iburasirazuba, Ndayishimiye Evariste, yerekeje i Nairobi muri Kenya ahagiye kubera ibindi biganiro byiga ku kibazo cy’umutekano muke mu Burasirazuba bwa Repubulika Iharanira Demokarasi ya Congo ndetse n’Umutwe wa M23 wongeye kubura imirwano muri iki gihugu.

Itangazo ryashyizwe hanze kuri uyu wa 27 Ugushyingo 2022 n’Ibiro bya Perezida w’u Burundi risinywaho n’Umuvugizi wabyo, Alain Diomède Nzeyimana, rivuga ko Perezida Ndayishimiye azitabira ibi biganiro bigamije gushaka umuti ku bibazo by’umutekano muke mu Burasirazuba bwa RDC.

Iyi nama y’i Nairobi igiye kuba ikurikira indi yabaye muri Kamena 2022, yiga ku kibazo cy’umutekano muri RDC. Yahuje Perezida Paul Kagame, Yoweri Museveni wa Uganda, Evariste Ndayishimiye w’u Burundi, Salva Kiir Mayardit wa Sudani y’Epfo na Félix Tshisekedi wa RDC.

Ni ibiganiro bigiye kuba nyuma y’aho Umutwe wa M23 utangaje ko wahagaritse imirwano ariko ugasaba guhura n’abahuza barimo Perezida wa Angola, João Lourenço na Uhuru Kenyatta wabaye Perezida wa Kenya haganirwe ku mpungenge zayo mu buryo bugamije kubaka amahoro arambye muri iki gihugu.

Babikoze nyuma y’iminsi mike Inama yahuje Perezida João Lourenço wa Angola; Evariste Ndayishimiye w’u Burundi na Félix Antoine Tshisekedi wa RDC; Minisitiri w’Ububanyi n’Amahanga w’u Rwanda, Dr Vincent Biruta na Uhuru Kenyatta wahoze ari Perezida wa Kenya, i Luanda ugategeka ko guhagarika imirwano ukava no mu duce twa RDC wafashe.

M23 yemeye guhagarika imirwano nk’uko byasabwe n’abakuru b’ibihugu, ariko isaba Guverinoma ya RDC kubahiriza ako gahenge igatangaza ko "bitabaye ibyo, M23 ifite uburenganzira bwuzuye bwo kwirwanaho no kurinda abasivili ibikorwa byose byarenga kuri uko guhagarika imirwano kwemeranyijweho"

Ibi biganiro bigiye kuba mu gihe Repubulika Iharanira Demokarasi ya Congo ivuga ko ishobora kuganira na M23 ariko ko hari ingingo yabanje kubahiriza zirimo kuva mu bice yafashe no guhagarika ibikorwa by’imirwano.

Leta ya Kinshasa ishinja M23 kuba ari umutwe w’iterabwoba, mu gihe yo ivuga ko irwanira uburenganzira bw’abaturage b’iki gihugu bavuga Ikinyarwanda bagiye bakunda guhezwa.

M23 ivuga ko yahisemo kubura imirwano kuko amasezerano n’ibiganiro yagiye igirana na Perezida Tshisekedi byarengejwe ingohe kandi nyamara ari byo byari byitezweho umuti ku bibazo imaze igihe igaragaza.

Mu biganiro bimaze iminsi nk’uko M23 ntiyigeze ihagararirwa mu biganiro by’i Luanda, ku buryo ibyemezo byafashwe bishyigikiwe na Leta ya Congo gusa.

Ibyo byakomeje kongera urujijo ku gaciro M23 ishobora guha iyi myanzuro ikayishyira mu bikorwa mu gihe cyihawe, kuko yafashwe n’uruhande rumwe mu bashyamiranye.

Perezida w'u Burundi, Ndayishimiye Evariste, yerekeje i Nairobi mu biganiro bihuza RDC n’imitwe yitwaje intwaro ihakorera irimo na M23
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza