IGIHE

M23 ntiramenyeshwa isaha ntarengwa yahawe

0 24-11-2022 - saa 16:03, IGIHE

Umuyobozi w’umutwe wa M23 Bertrand Bisimwa, yatangaje ko nta kintu baramenyeshwa ku byemezo bafatiwe n’abakuru b’ibihugu by’akarere birimo ko bagomba kuva mu duce bigaruriye bitarenze kuri uyu wa Gatanu, saa kumi n’ebyiri z’umugorona.

Kuri uyu wa Gatatu, Perezida João Lourenço wa Angola, Evariste Ndayishimiye w’u Burundi na Felix Antoine Tshisekedi wa RDC, Minisitiri w’Ububanyi n’amahanga w’u Rwanda Dr Vincent Biruta na Uhuru Kenyatta wahoze ari Perezida Kenya, bahuriye i Luanda.

Ni inama yari igamije ahanini kurebera hamwe ishyirwa mu bikorwa rya gahunda yatuma M23 "ihita iva mu duce twa Congo yafashe".

Umwanzuro wa mbere wafashwe ni "uguhagarika imirwano muri rusange, by’umwihariko ibitero bya M23 kuri FARDC na MONUSCO, guhera ku wa 25 Ugushyingo 2022, saa 18h00."

Hemejwe ko hakomeza koherezwa abasirikare b’ibihugu bya EAC, bagomba kurasa kuri M23 mu gihe yaramuka yanze guhagarika imirwano no kuva mu duce yafashe mu masaha 48 ari imbere.

Icyakora, M23 yatangaje ko itaramenyeshwa ibijyanye n’ibi byemezo.

Bisimwa yanditse kur Twitter ati "Inyandiko tutarashyikirizwa mu buryo bweruye zivuga kuri M23, zikomeje gucicikana ku mbuga nkorayambaga. Dukomeje gushyira imbere amahoro, kandi twiteguye kujya mu biganiro byasabwe n’abakuru b’ibihugu bya EAC nk’uburyo bwonyine bwakemura ibibazo byo mu burasirazuba, buhereye mu mizi."

Mu busabe bw’abakuru b’ibihugu, bavuze ko “M23 igomba kva mu duce imaze gufata, igasubira mu bice yahoranye mbere hashingiwe ku myanzuro y’inama y’abagaba bakuru b’ingabo za EAC, yabereye i Bujumbura mu Burundi ku wa 8 Ugushyingo 2022.”

Ibirindiro bivugwa ni muri Sabyinyo ku ruhande rwa RDC, aho M23 itagomba kurenga umurongo unyura ku duce twa Bigega, Bugusa, Nyabikona, Mbuzi, Rutsiro na Nkokwe.

Hateganywamo kandi “gushyiraho uburyo bwatuma Ingabo z’Umuryango wa Afurika y’Iburasirazuba zigenzura uduce ubu turi mu maboko ya M23, hamwe na komisiyo ishinzwe ubugenzuzi.”

Ni umwanzuro na wo wateje impaka ku mbuga nkoranyambaga, kuko kugeza ubu Ingabo z’Akarere zirimo gukorana na FARDC, ku buryo guha aka gace Ingabo z’Akarere bishobora gufatwa nko kugaha RDC.

Biteganywa ko Ingabo za Kenya zikambitse i Goma, zahita zoherezwa mu bice bya Goma, Bunagana, Rutshuru na Kiwanja, ubu tugenzurwa na M23.

Ubuyobozi bwa M23 buvuga ko butaramenyeshwa imyanzuro yafashwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza