IGIHE

Harabura ibihugu bine ngo Isoko rusange rya Afurika ritangire

2 12-01-2019 - saa 13:08, Rabbi Malo Umucunguzi

Umuryango wa Afurika Yunze Ubumwe, AU, watangaje ko hasigaye ibihugu bine kugira ngo Amasezerano ashyiraho Isoko Rusange rya Afurika (AfCFTA) atangire gushyirwa mu bikorwa, ubwo azaba amaze kwemezwa burundu n’ibihugu 22 mu bigize umuryango.

Aya masezerano yasinyiwe i Kigali muri Werurwe 2018 mu nama idasanzwe ya AU. Ku ikubitiro yemejwe n’ibihugu 44 bingana na 80% by’ibigize uyu mugabane, binemeranya ko azatangira gushyirwa mu bikorwa niyemezwa burundu n’ibihugu 22.

Biteganywa ko aya masezerano azahuriza ku isoko rimwe miliyari 1.2 z’abatuye Afurika, rifite umusaruro mbumbe wa tiriyali 2.19$.

Umuvugizi wa Perezida wa Komisiyo ya AU, Ebba Kalondo, kuri uyu wa Gatandatu yatangarije kuri Twitter ko ibihugu 22 byari bikenewe biri hafi kuboneka.

Yagize ati “Ibihugu 18 muri 22 bikenewe byamaze kwemeza amasezerano burundu. Tchad, Congo, Côte d’Ivoire, Djibouti, Eswatini, Ghana, Guinea, Kenya, Mali, Mauritania, Namibia, Niger, Rwanda, Senegal, Sierra Leone, Afurika y’Epfo, Togo, Uganda nibyo byabanje. Bine byonyine nibyo bisigaye.”

Akangurira n’ibindi bihugu kwemeza burundu aya masezerano. Gusa Kalondo yagaragaje ko impungenge ko nubwo ibihugu birimo kwemeza aya masezerano mu mategeko yabyo, ibyo mu majyaruguru ya Afurika bigenda biguru ntege.

Ati “Dufite abayemeje burundu mu bice byose by’umugabane ukuyemo Amajyaruguru ya Afurika. Dutegereje igihugu cyo mu Majyaruguru ya Afurika muri 22 bizakora amateka bigatuma AfCFTA itangira.”

Uretse AfCFTA, ibihugu bikeneye no kwemeranya ku rujya n’uruza rw’abantu na serivisi. Ubwo aya masezerano yasinyirwaga I Kigali muri Werurwe 2018, iyo ngingo yasinywe n’ibihugu 27.

Abakuru b’ibihugu bya Afurika bafite icyifuzo ko inama ya AU iteganyijwe i Niamey muri Niger muri Kamena 2019, yazaba iyo kwishimira ko aya masezerano amaze imyaka myinshi yifuzwa atangiye gushyirwa mu bikorwa.

Imibare igaragaza ko ubucuruzi hagati y’ibihugu bya Afurika byonyine bungana na 16%, mu gihe uruhare uyu mugabane ufite mu bucuruzi bukorwa ku Isi muri rusange rungana na 3.5%. Isoko rusange ry’ubucuruzi muri Afurika ryitezweho gukuba kabiri ubucuruzi hagati y’abanyafurika nibura mu 2022 bukaba bugeze kuri 25%.

AU isobanura ko amasezerano ya AfCFTA ari imwe muri gahunda z’ukwihuza kwa Afurika nk’uko biteganywa mu cyerekezo cyayo 2063, akaba abumbatiye kugira ijwi rimwe nk’umugabane no kuzamura ubucuruzi bukorwa hagati y’ibihugu bya Afurika, buri hasi cyane ugereranyije n’ubwo bikorana n’u Burayi na Aziya.

U Rwanda ruri mu bihugu byemeje burundu AfCFTA ku ikubitiro
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Mark 2019-01-13 04:40:35

Ibyo bihugu nibitugirire vuba biyasinye pe

2
Nitwa vivens 2019-01-12 06:00:15

Yego gushyiraho irisoko nibyiza ark harebwe cyanecyane kubatuye Africa murirusange kuko usanga akenshi biba unyungu za politike kurusha kuba inyungu zabatuye umugabane

Kwamamaza