IGIHE

USA: Hateguwe ibiganiro bikomeye hirindwa ko ibikorwa bya guverinoma byongera gufungwa

0 11-02-2019 - saa 22:05, IGIHE

Aba-democrates n’aba-republicains, bateguye ibiganiro mu nteko ishinga amategeko, hashakishwa uburyo bakwemeranya ku ngengo y’imari igomba gukoreshwa, hirindwa ko habura ubwumvikane maze ibikorwa bimwe bya leta bigahagarara kubera kubura ingengo y’imari.

Ni ingingo aya mashyaka yombi atavuzeho rumwe mu minsi ishize, kubera ko aba-democrates badashyigikiye ko Perezida Donald Trump abona ingengo y’imari yo urukuta ku mupaka wa Mexico.

Ibikorwa bya guverinoma byaherukaga guhagarara mu minsi 35 kugeza ku wa 25 Mutarama, akaba ari nacyo gihe kirekire cyabayeho mu mateka ya Amerika.

Inteko Ishinga amategeko ifite kugeza ku wa Gatanu ngo ibe yemeranyije ku ngengo y’imari y’igihe kiri imbere, mbere y’uko iy’igihe gito iheruka kwemezwa irangira. Itegeko rishya rigena ingengo y’imari niritemeranywaho mu badepite no muri Sena, ibikorwa bimwe bya leta bizafungwa guhera ku wa Gatandatu.

Ku wa 26 Mutarama nibwo hemejwe itegeko rigena ingengo y’imari y’igihe gito igenewe ibikorwa bya leta, itarimo miliyari 5.7$ Perezida Trump akeneye zo kubaka urukuta rutandukanya Amerika na Mexique.

Nizo zikomeje guteza ikibazo kuko ikibazo kijya gutangira, umushinga w’itegeko rigena ingengo y’imari wemejwe n’abadepite aho ishyaka ry’aba-republicains Trump akomokamo rifite ubwiganze, ugeze muri Sena aba-Democrates bawutera utwatsi.

Iyo ngengo y’imari yose ntiyemejwe ngo isohoke, uretse igice kigenewe serivisi zikomeye nk’Ingabo, uburezi, ubuvuzi, amazi n’amashanyarazi.

Abakozi bamwe ba leta babaye bahagaritse akazi kubera kudahembwa no kutagira ingengo y’imari yatuma bakomeza imirimo, inzego zidashobora guhagarika akazi ngo ubuzima bw’igihugu bukomeze nka Secret Service irinda abarimo perezida wa Amerika, abacungagereza n’abakozi b’Urwego rwa Amerika rushinzwe Ubugenzacyaha, FBI, bakomeza gukora badahembwa.

Ku wa 25 Mutarama Sena n’Umutwe w’Abadepite bemeje ku bwiganze ko ingengo y’imari y’igihe gito iba isohotse ariko hatarimo ayo kubaka urukuta. Trump yijeje abakozi bose ko bahita bahabwa imishahara yabo yose.

White House ariko yatangaje ko Trump yasinye iri tegeko rigena isohorwa ry’ingengo y’imari y’ibyumweru bitatu kugeza ku wa 15 Gashyantare.

Trump yavuze Sena nitemeza vuba ingengo y’imari irimo igenewe urukuta, azakoresha ububasha ahabwa n’itegeko nshinga mu kwemeza ko igihugu kiri mu bihe bidasanzwe, bityo akemeza ko ingengo y’imari igenerwa ibikorwa ashaka, aho yava hose, nubwo yaba yari igenewe ibindi bikorwa cyangwa urwego rwa leta.

Perezida Trump avuga ko amafaranga yo kubaka urukuta ari ikintu gikwiye guhabwa ubwihutirwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza