USA: Abantu 12 barasiwe mu kabari bahasiga ubuzima

4 8-11-2018 - saa 20:17, IGIHE

Umugabo wahoze mu ngabo za Amerika bikekwa ko yari asigaye afite ibibazo byo mu mutwe, yarashe abantu 12 mu kabari kamwe muri leta ya California bitaba Imana.

Ubu bwicanyi bwatangiye ahagana saa 9:20 mu gitondo kuri uyu wa Kane ku isaha y’i Kigali (ni ku wa Gatatu 23:20 ku isaha ya California), ubwo nibura abantu bagera kuri 200 bari mu kabari kitwa Borderline Bar and Grill, kabyinirwagamo n’abanyeshuri.

Polisi yatangaje ko uwaba yakoze ayo mahano ari Ian David Long w’imyaka 28. Yatangaje ko yahageze igasanga yamaze gupfa, umurambo we ugasangwa mu kabari mo imbere.

Nk’uko CNN yabitangaje, nta byinshi byasobanuwe. Minisiteri y’Ingabo ivuga ko Long yabaye mu gisirikare hagati ya Kanama 2013 kugeza muri Werurwe 2018.

Mu ntangiriro z’uyu mwaka, Ishami rya polisi rikurikirana ibibazo byo mu mutwe ryaramuhamagaje rimuhata ibibazo ariko riza kumurekura, nyuma y’uko abashinzwe umutekano bari bamaze kuvuga ko agaragaza imyitwarire iteye amakenga.

Polisi yatangaje ko ukekwaho iki gitero yari yambaye imyenda y’umukara, yinjira mu kabari abanje kurasa uwari ushinzwe umutekano ku muryango.

Umwe mu babibonye yavuze ko yabanje kunagamo igiturika kizamura imyotsi myinshi, akabona kumisha amasasu ku bari muri iyi nyubako.

Polisi ivuga ko yari atunze imbunda ya masotera byemewe n’amategeko, ariko ngo yari yitwaje amasasu arengaho ku ruhande.

Abanyeshuri barimo imbere bahise bakwirwa imishwaro basohokera aho bishoboka hose.

Kugeza ubu abantu bakomeretse bamaze kumenyekana bagera ku 10. Mu bapfuye harimo n’umupolisi.

Ian David Long ushinjwa kurasa aba bantu mu kabari
Aho aba bantu barasiwe
Abanyeshuri bari mu birori byabo bahise bakangarana
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mahoro jack 2018-11-09 02:18:12

Ibi nibwo bwisanzure n’umutekano Amerika yigisha abandi?

2
Oo 2018-11-09 00:44:00

Harya ibi bibabaho niyo demokarasi badushinja kutagira? Ndabona bakwiye kuza Kwiga ahubwo kuko nibo bakwiye gukura imbunda mu baturage.

3
MM 2018-11-08 23:44:31

IBYIHEBE BIRAGWIRA

4
Muhire 2018-11-08 15:44:20

Mukosore mwibeshye mwanditse 2018-2013 aho kuba 2008-2013

Kwamamaza