IGIHE

Rihanna yongewe mu ntwari za Barbados

0 30-11-2021 - saa 12:15, Uwiduhaye Theos

Umuhanzikazi Robyn Rihanna Fenty wamamaye nka Rihanna wari usanzwe ari ambasaderi wa Barbados guhera mu 2018, yashyizwe mu ntwari z’iki gihugu.

Iki gihugu cyashyize Rihanna mu ntwari ubwo cyishimiraga kuba cyabaye Repulika yigenga mu muhango n’uyu muhanzikazi usanzwe aba muri Amerika yari yitabiriye.

Minisitiri w’Intebe w’iki gihugu, Mia Mottley, yatangaje ko uyu muhanzikazi w’imyaka 33 yagizwe intwari kubera ibikorwa byiza yakoze.

Ati “Uzakomeze kurabagirana nka zahabu kugira ngo uheshe ikuzo igihugu cyawe binyuze mu kazi kawe n’ibikorwa ukora.”

Barbados yari isanzwe ifite izindi ntwari 10 guhera mu 1998 ubwo umunsi wazo watangiraga kwizihizwa muri iki gihugu. Akenshi umuntu agirwa intwari muri iki gihugu nyuma yo kuba indashyikirwa mu bikorwa bitandukanye akora.

Barbados iri mu bihe byo kwizihiza imyaka 55 ishize ibonye ubwigenge ubwo yigobotoraga ubukoloni bw’Abongereza. Guhera ku wa 30 Ugushyingo iki gihugu cyatangiye icyerekezo gishya cyo kwigenga burundu, kireka kugengwa n’ubwami bw’u Bwongereza, kiba Repubulika.

Mu kwezi gushize ni bwo Ikirwa cya Barbados cyatoye Dame Sandra Mason w’imyaka 72 nka Perezida wa mbere usimbura Umwamikazi Elisabeth II w’u Bwongereza.

Garfield Sobers wagizwe intwari ya Barbados mu 1998 ahoberana na Rihanna nawe bamaze kwinjira mu cyiciro kimwe
Perezida mushya w'iki gihugu, Sandra Mason mu muhango wo kwishimira ko cyabaye Repubulika
Rihanna asuhuzanya na Dame Sandra Mason wagizwe Perezida wa Barbados
Rihanna yari yagiye iwabo kwifatanya n'igihugu cye kwishimira urugendo rushya cyatangiye
Rihanna yashyizwe mu ntwari za Barbados
Ubwo Rihanna yatangazwaga nk'intwari ya Barbados
Umuhanzikazi Rihanna yashimiwe ibikorwa bye yagiye akora
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza