IGIHE

Mushiki wa Kim Jong Un yandagaje abayobozi ba Koreya y’Epfo na Amerika

0 24-11-2022 - saa 11:06, IGIHE

Mushiki wa Perezida wa Koreya ya Ruguru, Kim Jong Un yatutse abayobozi ba Koreya y’Epfo n’Aba Leta Zunze Ubumwe za Amerika arabandagaza, kubera ko baherutse gutangaza ko bashobora kongera ibihano bafatiye iki gihugu.

Kim Yo Jong yavuze ko kuba Amerika na Koreya y’Epfo bahanika ibihano bafatiye Koreya ya Ruguru nta musaruro bizatanga, uretse gukomeza kuyirakaza no gutuma irushaho gukora ibikorwa by’ubuhezanguni.

Amakuru dukesha ikinyamakuru cyo muri Koreya ya Ruguru, KCNA avuga ko Kim Yo Jong usanzwe ari mushiki wa Perezida w’iki gihugu, yavuze ko Perezida wa Koreya y’Epfo ari ’igicucu n’imbwa’ igendera mu kwaha kwa Leta Zunze Ubumwe za Amerika.

Ati "Niba batekereza ko bashobora kwikura mu bibazo bihari uyu munsi binyuze mu kudufatira ibihano, bagomba kuba ari ibicucu kuko batazi ibyiza byo kubaho mu mahoro n’umutuzo."

Yakomeje avuga ko iyi migambi ya Amerika na Koreya y’Epfo nta musaruro izatanga uretse gukomeza kurakaza igihugu cye.

Ati "Turongera kuburira aba banyagasuzuguro n’ibicucu ko ibihano n’igitutu cya Amerika n’ibikoresho byabo byo muri Koreya y’Epfo bizarushaho gukomeza kuzambya ibintu no kuzamura umujinya."

Kim Yo Jong atangaje ibi nyuma y’iminsi mike Minisitiri w’Ububanyi n’Amahanga wa Koreya y’Epfo avuze ko bafite gahunda yo gushyiriraho Koreya ya Ruguru ibihano birimo n’ibijyanye n’ikoranabuhanga.

Amerika na Koreya y’Epfo bifite gahunda yo gukaza ibihano kuri iki gihugu ngo kuko kimaze iminsi kigerageza ’missiles’ zitandukanye ndetse kikaba cyaranze kuvirira umugambi wo gukora ibisasu bya kirimbuzi.

Kim Yo Jong yatutse abayobozi ba Leta Zunze Ubumwe za Amerika na Koreya y'Epfo arabandagaza
Kim Yo Jong ni umwe mu bantu bakomeye mu butegetsi bwa musaza we, Kim Jong Un
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza