IGIHE

U Bushinwa bwamaganye ubushotoranyi bwa Amerika muri Taiwan

0 5-08-2022 - saa 13:31, IGIHE

Minisitiri w’Ububanyi n’Amahanga w’u Bushinwa, Wang Yi, yashinje Leta Zunze Ubumwe za Amerika ubushotoranyi no gushaka guhungabanya ubusugire bw’igihugu cye.

Ubwo yari mu nama yahuje ba Minisitiri b’Ububanyi n’Amahanga b’ibihugu byo muri Aziya y’Uburasirazuba, Wang, yagarutse ku ruzinduko rwa Nancy Pelosi muri Taiwan, avuga ko Leta Zunze Ubumwe za Amerika zarenze ku itegeko mpuzamahanga, zisubiza irudubi ubushake bwo kubana neza, zihungabanya amahoro muri Taiwan.

Yakomeje ashinja iki gihugu cy’igihangange gushyigikira amakimbirane, gushaka gucamo abantu ibice, gushotora abaturage b’u Bushinwa n’ibihugu bishaka amahoro mu karere buherereyemo.

Wang yavuze ko imikorere ya Nancy Pelosi, yashyize mu kaga politiki ya Leta Zunze Ubumwe za Amerika, dipolomasi mpuzamahanga, yongera gushinja iki gihugu gusenya amahoro muri Taiwan no guteza akaga mu karere irimo.

Wang yongeyeho kandi ko byerekana uburyarya bwa Amerika ndetse n’indimi ebyiri mu bibazo birebana n’amategeko mpuzamahanga.

Yagize ati “Niba u Bushinwa butamaganye imyitwarire y’ubusazi, kwigira ntibindeba ndetse n’ubugoryi bya Leta Zunze Ubumwe za Amerika, ihame ry’umubano mpuzamahanga ryo kubaha ubusugire n’imbago by’ibihugu byaba ari ibipapuro ntacyo bivuze”.

Yateguje ko mu gihe ibikorwa by’ubuhezanguni bya Amerika byakomeza muri Taiwan, hashobora kuzabaho ihungabana ry’umutekano mu karere.

Wang yavuze ko u Bushinwa bwakoze ibishoboka byose mu gukoresha imbaraga za dipolomasi kugira ngo ibibazo bikemuke ariko ku rundi ruhande ntibuzigera bwemera ko inyungu zabo z’ibanze ndetse no kubaka igihugu bibangamirwa n’uwo ari we wese.

Yavuze ko u Bushinwa butazicara ngo burebere Leta Zunze Ubumwe za Amerika ikina ikarita yayo muri Taiwan, ngo yimakazeyo politiki yayo ndetse inagendere ku byifuzo by’abanyapolitiki bayo.

Ati “U Bushinwa ntabwo buzihanganira ibikorwa byo guhembera umwuka mubi, gushyigikira amakimbirane ndetse no gucamo ibice ibihugu”.

Hari amakuru avuga ko u Bushinwa bukomeje imyitozo ya gisirikare hafi ya Taiwan. Wang yavuze ko ari ingamba bwafashe mu kwitegura guhangana n’umwanzi no kurinda ubusugire bw’igihugu n’umutekano wacyo.

Ati “Izi ngamba ziri mu murongo w’amategeko mpuzamahanga n’ayo mu gihugu imbere, ni izo kuburira abashotoranyi kandi zizafasha mu gusigasira umutekano mu karere n’amahoro muri Taiwan”.

Guverinoma y’u Bushinwa n’iya Leta Zunze Ubumwe za Amerika bimaze imyaka myinshi bisa n’ibitavuga rumwe kuri Taiwan.

U Bushinwa buvuga ko iki kirwa ari icyabwo ari naho buhera buvuga ko imyitwarire ya Amerika yo gushaka kugaragaza Taiwan nk’igihugu cyigenga ari ubushotoranyi.

Minisitiri w’Ububanyi n’Amahanga w’u Bushinwa, Wang Yi yavuze ko Amerika ikwiye guhagarika ubushotoranyi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza