IGIHE

Koreya ya Ruguru: Imiti gakondo yabaye imari ishyushye mu guhangana na Covid-19

0 20-05-2022 - saa 10:10, Rosine Ingabire

Ubuyobozi bwa Koreya ya Ruguru bwatangiye gushishikariza abaturage gukoresha uburyo bwose bushoboka mu kwirinda Covid-19 burimo n’imiti gakondo, mu gihe icyo gihugu cyugarijwe bikomeye n’icyo cyorezo.

Iki gihugu cyo mu Burasirazuba bwa Aziya, cyatangiye gufata ingamba zikakaye zirimo kongera umubare w’imiti yifashishwa mu guhashya Covid-19 n’ibikoresho byifashishwa mu gupima umuriro.

Ikinyamakuru cyegamiye kuri Leta, KCNA cyatangaje ko imiti gakondo ifite ubushobozi bwo guhangana n’indwara zikomeye, nubwo nta bushakashatsi burerekana niba na Covid-19 irimo.

Mu cyumweru gishize ni bwo Koreya ya Ruguru yatangaje ko yibasiwe n’icyorezo gikomeye aho abakirwaye bagaragaza umuriro, nyuma biza kwemezwa ko ari Covid-19 .

Nibura abantu basaga ibihumbi 262 bamaze kugaragaza ibimenyetso by’umuriro, nubwo hatagaragazwa abamaze gupimwamo Covid-19.

Mu bantu bose bamaze gupimwa umuriro, abantu 63 ni bo byemejwe ko bishwe na wo.

Mu gihe imiti isanzwe ihangana na Covid-19 ndetse n’umuriro ari mike muri Koreya ya Ruguru, KCNA yashishikarije abaturage gukoresha imiti gakondo nk’amazi arimo umunyu, icyayi cya tangawizi n’ibindi.

Mu bindi abaturage bashishikarijwe gukoresha harimo imiti igabanya uburibwe nka ibuprofen na amoxicillin.

Nubwo Koreya ya Ruguru yugarijwe na Covid-19, yanze ubufasha bwa Koreya y’Epfo na Leta Zunze Ubumwe za Amerika bw’abaganga n’izindi nzobere zibafasha guhangana n’icyo cyorezo, nkuko The Guardian yabitangaje.

Abatuye Koreya ya Ruguru bamaze iminsi bashishikarizwa gukoresha imiti gakondo mu guhangana na Covid-19
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza