IGIHE

Impamvu u Budage budashaka kohereza muri Ukraine ibifaru byabwo bigezweho

0 24-01-2023 - saa 18:59, Ferdinand Maniraguha

Umwuka ntumeze neza mu bihugu bigize Umuryango w’Ubutabarane, NATO, nyuma y’uko u Budage bwanze kohereza muri Ukraine ubwoko bw’ibifaru bigezweho bizwi nka Leopard 2.

Ni ibifaru Ukraine imaze iminsi isaba kugira ngo ibashe gutsinsura ingabo z’u Burusiya, zigiye kumara umwaka zigaruriye tumwe mu duce two mu Burasirazuba bwa Ukraine.

Kuwa Gatanu ushize mu Budage habereye inama y’abayobozi bo mu bihugu bigize NATO, biga ku nkunga nshya y’intwaro bashobora koherereza Ukraine. Byari byitezwe ko u Budage bwemera kohereza ibifaru byabwo byo mu bwoko bwa Leopard 2 ariko siko byagenze.

Pologne yashinje u Budage kugenda biguru ntege mu gufasha Ukraine kuko idashaka ko ibifaru byayo bya Leopard 2 bihabwa Ukraine.

Leopard 2 ni ubwoko bw’ibifaru bifatwa nk’ibigezweho mu ntambara ku Isi. Ni ibifaru bipima toni 62, bikagenda ku muvuduko wa kilometero 72 ku isaha, bikaba bifite ubushobozi bwo kurasa mu birometero 500.

U Budage bwatangiye gukora ibyo bifaru mu myaka ya 1970, ngo bisimbure ibyari bigezweho icyo gihe byakorwaga na Leta Zunze Ubumwe za Amerika byitwa M48 Patton.

Ibi bifaru byagiye bivugururwa kugira ngo bijyane n’igihe, kuri ubu bikaba ari bimwe mu bigezweho ku Isi ndetse bikoreshwa n’ibihugu bisaga 13 mu Burayi.

Bivugwa ko hari ibifaru 3500 by’ubwo bwoko biri hirya no hino ku Isi, Ukraine yo ikaba yarasabye ibifaru 300 ngo isubiza ingabo z’u Burusiya inyuma.

Mu masezerano u Budage bugirana n’ibihugu byaguze Leopard 2, ni uko nta handi bemerewe kubitanga cyangwa kubigurisha mu gihe u Budage butabahaye uburenganzira. Ibyo bivuze ko n’ibindi bihugu bigize NATO byabiguze, bitemerewe kubiha Ukraine.

Mu nama yabaye kuwa Gatanu ushize, u Budage bwavuze ko buzemera gutanga ibyo bifaru, mu gihe Leta Zunze Ubumwe za Amerika nazo zizemera gutanga ibifaru byazo bigezweho bizwi nka Abrams.

U Budage buri kwirinda gutanga intwaro zigezweho kuri Ukraine bwirinda kurushaho kuzambya umubano wabwo n’u Burusiya, dore ko icyo gihugu gisanzwe gifitanye ubucuruzi bukomeye n’u Burusiya.

Ikindi u Budage buri kwirinda, ni ukurushaho gukomeza intambara kubera ko u Burusiya bwavuze ko Abanyaburayi nibohereza intwaro zikomeye cyane muri Ukraine, bizatuma u Burusiya nabwo busubira mu bubiko bwabwo kuzana intwaro zisumbuyeho, zishobora kwangiza byinshi.

Indi mpamvu ni umurongo u Budage bwafashe guhera nyuma y’intambara ya kabiri y’Isi, wo kutishora cyane mu ntambara cyangwa kugira uruhare mu bishobora gutuma intambara itarangira.

Pologne yatangaje ko u Budage nibukomeza kwinangira kohereza Leopard 2, yo izabitanga itabanje gutegereza uruhushya rw’u Budage.

U Budage bwo buvuga ko nubwo bushinjwa kwanga gufasha Ukraine, nta gihugu gisanganywe Leopard 2 kirabusaba gutanga uburenganzira ngo kibwimane, mu gihe ibyo bifaru bitazaba bivuye mu bubiko bw’u Budage.

Ukraine imaze iminsi isaba guhabwa ibifaru bigezweho birimo Leopard 2, byakozwe n'u Budage
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza