IGIHE

Benjamin Netanyahu yatangiye gusabirwa kweguzwa

0 19-05-2024 - saa 09:41, Igizeneza Jean Désiré

Uwahoze ari Minisitiri w’Ingabo, ubu akaba umwe mu bagize Guverinoma ya Israel ushinzwe ibijyanye n’intambara, Benny Gantz, yasabye guverinoma kuba yashyize hanze umushinga uhamye wo kurandura Hamas no gushyira akadomo ku ntambara imaze amezi arindwi, bitaba uko akikuriramo ake karenge.

Gantz kuri uyu wa 18 Gicurasi 2024 yavuze ko iyo gahunda igomba kujya hanze bitarenze ku wa 8 Kamena 2024, asaba ko iyo gahunda igomba kugaragaza uburyo Hamas yarandurwa, Abanya-Israel bashimuswe bakabohozwa.

Ni amagambo yatangaje mu gihe Abanya-Israel batangiye kwigaragambiriza Minisitiri w’Intebe, Benjamin Netanyahu, bamusaba kuva ku butegetsi cyane ko bamushinja kuba yarananiwe gushyira ibintu mu buryo abashimuswe na Hamasa bagatahuka.

Gantz yavuze ko mu bigomba kuba bikubiye muri iyo gahunda harimo kureba uburyo muri Gaza gashyirwaho Guverinoma itandukanye n’iyari ihari, Abanya-Israel bakagarurwa mu majyaruguru y’iki gihugu.

Gantz yashimangiye ko Israel igomba gushyiraho umugambi uhamye wo kureba uko umubano w’igihugu cye na Arabie Saoudite wazahurwa ibintu bigasubira mu buryo aho guhora mu ntambara zitarangira.

Uyu muyobozi yavuze ko Minisitiri w’Intebe wa Israel Benjamin Netanyahu, agomba guhitamo intsinzi n’icyo yise “ibiza” cyane ko yatangaje ko ashaka ibiganiro bigamije gushyira akadomo ku ntambara.

Ati “Niba [Netanyahu] yahisemo kuyobora igihugu mu buryo bugamije kugisenya burundu, tuzahitamo kuva muri guverinoma tugarukire abaturage ndetse dukore guverinoma ishobora kugera ku ntsinzi.”

Ni ubusabe Gantz yatanze nyuma y’uko na Minisitiri w’Ingabo w’iki gihugu, Yoav Gallant aherutse kuvuga ko hagomba gushyirwaho gahunda itomoye y’uburyo Gaza izabaho nyuma y’intambara, ndetse anateguza ko atazigera ashyigikira ko Israel yakomeza gutegeka Gaza.

Ku rundi ruhande ariko Ibiro bya Netanyahu byateye utwatsi ibyo byifuzo bya Gantz, bigaragaza ko ibyo ari gusaba bishobora kwangiriza Israel mu buryo bukomeye.

Kuri uyu wa 18 Gicurasi 2024, ingabo za Israel zakomeje ibitero simusiga byayo muri Gaza, aho barwaniye cyane mu Nkambi ya Jabalya, imwe mu munani zikomeye zo muri Gaza.

Ni ibitero bivugwa ko byangije byinshi kuko umuvugizi w’ishami rishinzwe ubutabazi muri Gaza witwa Mahmoud Bassal, yavuze ko inzu zirenga 300 zasenywe, akavuga ko kugeza ubu babonye imirambo igera ku 150 yari yagwiriweho n’inyubako.

Bassal yavuze ko abo ari abo babashije kugeraho, agaragaza ko hari abandi bagwiriweho n’ibyo bikuta, icyakora ntibabone uburyo bwo kujya kubakuramo kubera ibitero bya Israel bikomeje kwiyongera umunsi ku wundi.

Loni ku wa 17 Gicurasi 2024 yashyize raporo hanze igaragaza ko hakiri ikibazo cy’ibura ry’ibiribwa cyane ko aho inkunga yanyuzwaga, ni ukuvuga mu Mujyi wa Rafah hafunzwe nyuma y’uko iki gihugu kihatangije ibitero simusiga ku wa 06 Gicurasi 2024.

Kuva Israel yatangira ibitero simusiga mu Mujyi wa Rafah abaturage barenga ibihumbi 800 bangana na ½ cy’abagize uyu mujyi wose bamaze gukurwa mu byabo nk’uko Loni yabitangaje.

Intambara ya Israel muri Gaza imaze kwangiza byinshi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza