IGIHE

Ibimenyetso byerekanye ko Omicron yagaragaye mu Buholandi mbere y’uko itangazwa na Afurika y’Epfo

0 30-11-2021 - saa 17:50, Bukuru JC

Ubushakashatsi bwerekanye ko hari ibipimo bibiri byafatiwe mu Buholandi ku matariki ya 19 na 23 Ugushyingo, bikaza gusangwamo ubwoko bushya bwa Covid-19 buzwi nka Omicron, kandi icyo gihe Afurika y’Epfo ikaba itari yagatangaza amakuru kuri ubu bwoko.

Ntabwo biramenyekana neza niba ibipimo byagaragayemo Omicron mu Buholandi ari iby’abantu bavuye muri Afurika y’amajyepfo, uretse ko n’ubundi hakomeje gukekwa ko ubu bwoko bushya butagaragaye bwa mbere mu bihugu byo mu Afurika y’amajyepfo.

Minisiteri y’Ubuzima n’Imibereho Myiza muri Botswana, ari nacyo gihugu cya mbere cyagaragayemo ubu bwoko, yari yatangaje ko abantu ba mbere bagaragaweho n’ubu bwoko bushya ari abadipolomate b’abanyamahanga bari muri icyo gihugu kuva ku itariki ya 9 Ugushyingo.

Kuri ubu hari impungenge ko bishoboka kutazamenya intandaro y’ubu bwoko bushya bwa Covid-19, bitewe n’uko bwagaragaye mu bihugu byinshi kandi hakaba ubwo abantu babugaragaweho batari bakoreye ingendo mu bihugu bya Afurika y’amajyepfo, nk’uko byagenze mu Bubiligi.

Ubushakashatsi buzerekana ubukana bw’ubu bwoko buzatwara ibyumweru bishobora kugera kuri bitatu, ariko amakuru y’ibanze yamaze kwerekana ko bushobora kuba bufite ubushobozi buhambaye bwo kwihinduranya cyane, ari nako bwanduza abantu benshi.

Andi makuru avuga ko inkingo zakozwe ziri guhangana n’ubu bwoko, uretse ko ibigo bikora inkingo biryamiye amajanja, ku buryo mu gihe byagaragara ko ubu bwoko bufite ubushobozi bwo guhangara inkingo zakozwe, hakorwa izindi kandi mu gihe gito.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza