IGIHE

Ibiciro by’ibikomoka kuri peteroli bikomeje kumanuka ku isoko mpuzamahanga

0 26-11-2022 - saa 12:23, Zigiranyirazo Bajecteur

Hari hashize igihe ibiciro by’ibikomoka kuri peteroli ku isoko mpuzamahanga bizamuka umusubizo, icyakora kuri ubu hari inkuru itandukanye kubera ko icyumweru kibaye icya gatatu ibi biciro bimanuka ubutitsa kuri iryo soko.

Ibi biciro byagabanutse ku ijanisha rya 2,1% bituma akagunguru kagera ku madolari 76,28 ndetse mu biganiro byahuzaga aba diplomate bo mu Burayi, hifujwe ko yanagera ku giciro kiri hagati y’amadolari ya Amerika 65 na 70.

Ku wa mbere w’iki cyumweru, muri Amerika ibi biciro byagabanutse ku ijanisha rya 4% mu gihe mu byumweru byabanje ibi biciro nabwo byari byagabanutse ku ijanisha rya ku 10% na 4%.

Impamvu yagaragajwe nk’iri gutera iri hanantuka ry’ibiciro ku isoko mpuzamahanga, ni ukuba icyorezo cya Covid-19 cyarongeye kubyutsa umutwe mu gihugu cy’u Bushinwa ku buryo bimwe mu bice byacyo biri muri gahunda ya Guma mu Rugo kandi cyari gisanzwe kizwiho gukoresha ingano nini y’ibikomoka kuri peteroli nk’igihugu cya kabiri gikize ku Isi.

U Bushinwa ni cyo gihugu cya mbere ku isi, cyinjiza ibikomoka kuri peteroli imbere mu gihugu kibivanye mu mahanga, impamvu ituma ibiciro byabyo bikomeje kumanuka n’uko hari imirimo myinshi itakiri gukorwa mu gihe hari umubare w’abatarage utari muto washyizwe muri gahunda ya Guma mu Rugo.

Ku wa Kane w’iki cyumweru, ni bwo u Bushinwa hatangajwe umubare munini w’abanduye Covid-19, aho hagaragajwe ko uwo munsi bageze ku 31 656, impamvu nyamukuru yatumye utugunguru tw’ibikomoka kuri peteroli twagurwaga tugabanukaho utugera kuri miliyoni ku munsi ugendeye ku tugera kuri miliyoni 13 twagurwaga ku munsi.

Uretse impamvu zavuzwe haruguru, hanavugwa ku kuba abayobozi bo mu bihugu by’u Burayi batarabashije kumvikana neza ku giciro nyakuri cyashyirwaho ku bikomoka kuri peteroli, bakanimura ibiganiro byabahuzaga biteganyijwe ko bizongera gusubukurwa mu cyumweru gitaha.

Ibiciro by’ibikomoka kuri peteroli bikomeje kumanuka ku isoko mpuzamahanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza