IGIHE

Byahishuwe ko Trump yingingiye Kim Jong Un kwinjira mu ndege ye undi akamutsembera

0 22-02-2021 - saa 11:10, Ntabareshya Jean de Dieu

Uwahoze ari Perezida wa Leta Zunze Ubumwe za Amerika Donald Trump burya ngo yigeze kwinginga Perezida wa Koreya ya Ruguru, Kim Jong Un, amusaba ko bajyana mu ndege ye ya Air Force One ariko undi aramutsembera.

Ntibasanzwe ko Perezida w’igihugu afata urugendo agahitamo kwifatira gari ya moshi kandi aho yerekeje ari urugendo rurerure, biragoye kandi kwiyumvisha ko umuyobozi w’igihugu runaka amara iminsi ibiri mu rugendo atari yagera iyo ajya kandi yashoboraga gukoresha amasaha abiri gusa.

Ibi byabaye kuri Kim Jong Un wa Koreya ya Ruguru mu 2019 ubwo yajyaga guhura n’uwahoze ari Perezida wa Leta Zunze Ubumwe za Amerika, Donald Trump muri Vietnam, dore ko yahisemo kwifatira iya gari ya moshi izabanza kunyura no mu Bushinwa ibintu byamusabye igihe kibarirwa mu minsi kugira ngo agere mu Mujyi wa Hanoi ahabereye ibiganiro.

Muri Gashyantare 2019 nibwo Trump na mugenzi we wa Koreya ya Ruguru Kim Jong Un bagiranye ibiganiro bigamije guhagarika burundu ikorwa ry’intwaro za kirimbuzi n’igeragezwa ryazo byabereye muri Vietnam mu Mujyi wa Hanoi.

Mu cyegeranyo cya BBC hagaragaramo ko ubwo ibiganiro hagati y’abo bombi byari birangiye, Trump yasabye Kim ko yakwemera akamutwara mu ndege ya Perezida wa Amerika ikamugeza muri Koreya ya Ruguru ngo kubera ko Trump yari afite amakuru ko Kim Jon Un yageze i Hanoi akoresheje iminsi myinshi muri gari ya moshi.

Uwari Umujyanama wa Donald Trump, Matthew Pottinger, yemeje ko Trump yasabye Kim Jong Un kwemera ko bakamugeza muri Koreya.

Trump ngo yabwiye mugenzi we ati “Nshobora kukugeza mu rugo mu masaha abiri niba ubyifuza” ariko Kim Jong Un amukurira inzira ku murima.

Hari abavuga ko iyo Kim Jong Un yemera kujyanwa n’indege ya Perezida wa Leta Zunze Ubumwe za Amerika byari guteza ibibazo bikomeye kubona indege ya Perezida wa Amerika mu kirere cya Koreya ya Ruguru.

Trump yashatse kujyana mu ndege na Kim Jong Un ariko we arabyanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza