IGIHE

Abanyamakuru bari birengeje umuyobozi muri Amerika kubera inkomoko ya COVID-19 (Video)

0 24-11-2022 - saa 11:59, IGIHE

Dr Anthony Fauci ushinzwe ibikorwa byo kurwanya COVID-19 muri Leta Zunze Ubumwe za Amerika yakozanyijeho n’abanyamakuru bamubajije icyo yakoze kugira ngo inkomoko y’iki cyorezo ibashe kumenyekana.

Iki kiganiro cyabaye ku wa Kabiri muri ’White House’ cyari kigamije kwereka itangazamakuru uko ubuyobozi bwa Leta Zunze Ubumwe za Amerika bukomeje kwitwara mu bikorwa byo kurwanya COVID-19.

Ibyari ikiganiro byaje guhinduka akavuyo ubwo umunyamakuru wa New York Post (NYP), Diana Glebova yabazaga Dr Anthony Fauci yakoze kugira ngo inkomoko ya COVID-19 imenyekane kuko kugeza n’ubu ikiri ihurizo.

Ubwo Diana Glebova yari amaze kubaza iki kibazo, abanyamakuru bagenzi be bahise batangira gusakuza bose basubira mu kibazo uyu mugore yari abajije.

Nyuma yo kubona ko ibintu birushijeho gufata indi ntera, Karine Jean-Pierre ushinzwe itangazamakuru muri ’White House’, yahise afata indangururamajwi kugira ngo ahoshe aba banyamakuru.

Karine Jean-Pierre yakomeje agira ati "Hano tugira uburyo ibintu bikorwa [...] ntabwo nahamagaye abantu bo kuza gusakuza, muri kugaragaza agasuzuguro kuri bagenzi banyu ndetse no ku mushyitsi wacu. Ntabwo turi bukomeze nimukomeza gusakuza, muri gutakaza umwanya kandi Dr Fauci agomba kugenda mu minota mike."

Ibyakozwe na Karine Jean-Pierre byabaye nko gukongeza umuriro kuko aba banyamakuru barushijeho gusakuza no kubaza iki kibazo, ndetse bituma uyu mugore yivumbura avuga ko "adakomeza gushyogozanya nabo."

Simon Ateba ukorera Africa Today yahise asaba ko ikibazo cyabajijwe na mugenzi we cyasubizwa ndetse yemeza ko Dr Fauci ariwe muntu ufite igisubizo gikwiriye.

Mu burakari bwinshi, Karine Jean-Pierre yahise avuga ati "Ikibazo ndacyumva! ariko ntabwo ari wowe utegeka uko ibintu bigenda hano! ibi ni agasuzuguro. Simon nta kindi ndibukubwire."

Uku kutumvikana kwatumye Dr Fauci agenda adasubije iki kibazo.

uguhangana nk’uku kw’itangazamakuru n’abayobozi ba Leta Zunze Ubumwe za Amerika kwaherukaga kugaragara mu 2018, ubwo umunyamakuru wa CNN, Jim Acosta yateranaga amagambo na Donald Trump wayoboraga iki gihugu ku kibazo cy’abimukira bava muri Mexique.

Karine Jean-Pierre ushinzwe itangazamakuru muri ’White House’ yateranye amagambo n'abanyamakuru karahava
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza