IGIHE

U Burusiya bwaburiye NATO ihembera ’intambara y’intwaro kirimbuzi’; bwatakaje Umujyi wa Kharkiv

0 14-05-2022 - saa 12:46, Bukuru JC

Dmitry Medvedev wigeze kuva Perezida w’u Burusiya hagati ya 2008 na 2012, yatangaje ko ibikorwa by’u Burayi na Amerika byo guha intwaro Ukraine, gutoza abasirikare bayo ndetse no gukorera imyitozo hafi y’u Burusiya ari ikibazo gikomeye cyane kuko gishobora gutuma impande zombi zinjira mu ntambara yarwanwa hifashishijwe intwaro kirimbuzi.

Ibi yabigarutseho nyuma y’uko Amerika imaze igihe mu migambi karundura yo guha Ukraine intwaro izakomeza kwifashisha mu ntambara n’u Burusiya.

Uyu mugabo yavuze ko abayobozi ba NATO bakwiriye kureka kwishuka kuko imvugo zabo zishobora gukongeza intambara yagira ingaruka ku bukungu bwabo mu buryo buhambaye.

Uyu muyobozi kandi yavuze ko icyemezo cya Finland cyo kwaka ubusabe bwo kwinjira muri NATO ndetse n’ubushake bwayo bwo kuyakira, ari ibintu u Burusiya bushobora gufatira ingamba zikomeye, asaba abayobozi ba NATO kwirinda kugwa muri uwo mutego, nk’uko Dail Mail yabitangaje.

Hagati aho, Igisirikare cya Ukraine cyatangaje ko gishobora kuba cyarangije intambara n’u Bursiya bitarenze uyu mwaka, kikavuga ko ibimenyetso byerekana ko ingabo z’u Burusiya zacitse intege mu buryo bufatika.

U Burusiya bwaburiye NATO iri kwifuza 'Intambara y'intwaro kirimbuzi'

U Burusiya bwatakaje Umujyi wa Kharkiv

Mu Ntambara ikomeje guca ibintu muri Ukraine, ikigo gikora ubushakashatsi ku migendere y’intambara, Institute for the Study of War (IOW), cyatangaje ko Ingabo z’u Burusiya ziri kuva mu Mujyi wa Kharkiv, ari na wo Mujyi wa kabiri muri Ukraine, nyuma y’Umurwa Mukuru Kyiv.

BBC ivuga ko uyu Mujyi uherereye mu Majyaruguru ya Ukraine uri mu y’ibanze ingabo z’u Burusiya zafashe mu ntangiriro y’intambara ariko amakuru akavuga ko bitewe no kubura ubufasha bw’izindi ngabo, gushirirwa n’ibikoresho ndetse n’uburyo ingabo za Ukraine zikomeje kotsa igitutu iz’u Burusiya, byatumye hafatwa icyemezo cyo gusubira inyuma.

Perezida Volodymyr Zelensky wa Ukraine, yatangaje ko iki ari ikimenyetso simusiga cyerekana ubudahangarwa bw’ingabo za Ukraine, asobanura ko nta gice na kimwe kizasigara mu maboko y’umwanzi. Uyu muyobozi kandi yavuze ko hari inyubako zirenga 1000 ingabo ze zambuye u Burusiya.

U Burusiya bwatakaje Umujyi wa Kharkiv

Ukraine yagaragaje impamvu ikeneye intwaro za Amerika

Amakuru avuga ko nubwo ibikorwa by’u Burusiya bisa nk’ibiri kugenda biguru ntege ugereranyije n’uko byari bimeze mu ntangiriro y’intambara, umubare w’ingabo za Ukraine zigwa muri iyi ntambara ukomeje kwiyongera.

Umudepite mu Nteko Ishinga Amategeko ya Ukraine, Oleksandra Ustinova, yavuze ko “Ibintu biri kurushaho kugana habi, turi gutakaza abasirikare benshi muri ibi bihe kurusha uko byari bimeze mu ntangiriro z’intambara.”

Uku gutakaza abasirikare benshi ni imwe mu mpamvu ikomeye iri gutuma Ukraine isaba Amerika n’ibindi bihugu kongera intwaro biyiha kugira ngo ikomeze kurushaho kwirwanaho, nk’uko Al Jazeera ibivuga.

Ubusanzwe Amerika yahaga Ukraine intwaro nto zidakeneye amahugurwa menshi kugira ngo zitangire gukoreshwa, gusa kuko iyi ntambara bigaragara ko izamara igihe kinini, Ukraine yatangiye gusaba Amerika kuyiha intwaro nini zirimo n’izikenera amahugurwa ashobora gutwara igihe kirekire.

Muri izo ntwaro zifuzwa harimo indege za Amerika na missile karundura zishobora kuraswa kure. Ukraine ivuga ko kubera gukoresha intwaro z’u Burusiya nyinshi, bigoye ko muri ibi bihe bahanganye bashobora kubona ibikoresho byo kuzisana cyangwa kubona intwaro nshya.

Hagati aho Sena ya Amerika igomba kwemeza umushinga wo kohereza muri Ukraine intwaro zifite agaciro ka miliyari 40$, nyuma y’uko uyu mushinga wemejwe n’Abadepite ariko Senateri Rand Paul akawanga, avuga ko udasobanura neza uburyo amafaranga azakoreshwa.

Ukraine irifuza guhabwa intwaro nyinshi na Amerika kugira ngo ikomeze kwirwanaho

U Buhinde bwahagaritse kohereza ingano mu mahanga

U Buhinde busanzwe ari ubwa kabiri mu guhinga ingano nyinshi ku rwego rw’Isi, bwatangaje ko buhagaritse kuzohereza mu mahanga mu rwego rwo kwirinda ko zishobora kugabanuka mu gihugu, nyuma y’uko umusaruro ukomoka mu Burusiya na Ukraine, ugize 14% by’ingano zicuruzwa ku rwego rw’Isi, uhungabanyijwe n’intambara iri guhuza impande zombi, nk’uko CNN ibivuga.

Perezida Zelensky yatangaje ko u Burusiya buri gukoresha inzara nk’intwaro y’intambara, yaba imbere muri Ukraine ndetse no hanze yayo, asaba abayobozi b’Isi guhagurukira iki kibazo kuko ‘Ikiguzi cyo kuzahangana n’ingaruka z’inzara itewe n’u Burusiya kiruta icyo kubuza icyo gihugu gushyira mu bikorwa uwo mugambi.’

Ibi byashobotse nyuma y’uko u Burusiya bwigaruriye igice kinini kiri mu Majyepfo ya Ukraine ahari icyambu gihuza Ukraine n’Inyanja y’Umukara, ari na cyo gikoreshwa mu kohereza no kwakira ibicuruzwa biturutse mu mahanga.

U Buhinde bwahagaritse kohereza ingano mu mahanga

Finland igiye gufungirwa umuriro uturuka mu Burusiya

Nyuma y’uko Finland na Suède bitangaje umugambi wo kwinjira muri NATO, ingingo yamaganywe n’u Burusiya, kuri ubu iki gihugu cyamaze gutangaza ko kigiye guhagarika umuriro cyohereza muri Finland bitewe n’uko iki gihugu kitishyuye uwo cyahawe kuva ku itariki ya 6 Gicurasi uyu mwaka.

CNN ivuga ko umuriro ungana 10% ukoreshwa muri Finland uturuka mu Burusiya, gusa ubuyobozi bw’iki gihugu bwavuze ko iri hagarikwa ry’umuriro nta ngaruka rizagira ku bukungu bwa Finland kuko iki gihugu kiri kuvugana na Suède ku buryo cyakongera umuriro kigurayo, ndetse kikaba gikomeje umugambi wo kongera umuriro cyikorera imbere mu gihugu.

Finland na Suède ni ibihugu bihana imbibi n’u Burisiya, ari na yo mpamvu icyo gihugu cyamaganye imigambi yabyo yo kwinjira muri NATO. Uyu mugambi kandi ushobora gukomwa mu nkokora na Turukiya isanzwe ari umunyamuryango wa NATO, yavuze ko idashyigikiye uwo mugambi kuko Finland na Suède bicumbikiye abahungabanya umutekano muri Turikiya.

U Burusiya bushobora guhagarika umuriro w'amashanyarazi bwohereza muri Finland
U Burusiya bwatakaje Umujyi wa Kharkiv mu ntambara burimo na Ukraine
Kwamamaza
Kwamamaza

Izindi nkuru wasoma

0 0 19-05-2022
0 0 18-05-2022
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza