IGIHE

Kabund wahoze ayobora ishyaka rya Tshisekedi yasabiwe kwamburwa ubudahangarwa, Ruto yashinje leta kumuburabuza: Avugwa mu Karere

0 4-08-2022 - saa 15:05, IGIHE

Jean-Marc Kabund wahoze ari Visi Perezida w’umutwe w’abadepite n’umuyobozi w’ishyaka riri ku butegetsi UDPS, yahamagajwe na Komisiyo y’Inteko ishinga amategeko ndetse ashobora kwamburwa ubudahangarwa buhabwa abayigize.

Ni icyemezo cyafashwe mu gihe Ubushinjacyaha bwamaze gusaba uburenganzira bwo kumukurikirana mu nkiko, nyuma y’amagambo yakomeje gukoresha yibasira Perezida Felix Tshisekedi n’ubutegetsi bwe.

Mu kwezi gushize Kabund yashinze ishyaka rye, anatangaza yeruye ko ari ku ruhande rw’abatavuga rumwe n’ubutegetsi.

Ibaruwa Perezida w’Inteko ishinga amategeko ya RDC, Christophe Mboso N’Kodia Pwanga, yandikiye Depite Kabund, ivuga ko ku wa 29 Kanama, Ubushinjacyaha "bwasabye Komite nyobozi y’Inteko ishinga amategeko uburenganzira bwo kumukurikirana no kwamburwa ubudahangarwa bugenerwa abagize inteko ishinga amategeko."

Kabund yahise asabwa kwitaba Komisiyo y’inteko ishinga amategeko kuri uyu wa Kane, aherekejwe n’umudepite umwe cyangwa babiri, cyangwa umwunganizi we mu mategeko.

Ubwo yari amaze kwegura ku buyobozi bw’inteko no mu ishyaka UDPS, Kabund w’imyaka 41 yatangaje ko ubutegetsi bwa Tshisekedi budashoboye.

Yagize ati "Byarangiye, nta kintu na kimwe cyo kwitega kuri Perezida Tshisekedi na UDPS barananiwe. Ubutegetsi buriho ntabwo bushoboye. Ndasaba abaturage kwishyira hamwe ngo birukane Félix Tshisekedi ku butegetsi."

Yashinje Tshisekedi ko ba Guverineri b’intara yabahinduye nk’abahungu n’abakobwa bari mu masiganwa.

Ku bwe, ngo Tshisekedi akwiye kugaragara nk’ikibazo ku butegetsi bwa RDC.

Kabund afatwa nk’umuntu w’ingenzi muri politiki ya RDC, kuko yagize uruhare mu kubaka ihuriro Union sacrée hagati ya Perezida Félix Tshisekedi na Joseph Kabila, ariko ryaje gusenyuka mu mpera za 2020.

Jean-Marc Kabund akomeje kwisanga mu mazi abira

Loni yababajwe n’iyirukanwa ry’umuvugizi wa Monusco

Umuryango w’Abibumbye watangaje kuri uyu wa Kane ko wababajwe n’icyemezo cya Guverinoma ya Repubulika Iharanira Demokarasi ya Congo cyo kwirukana umuvugizi wa Monusco.

Mathias Gillmann yirukanywe azira amagambo adakwiye yavuze nubwo hatigeze hasobanurwa mu magambo arambuye iby’ayo magambo mu itangazo rya Guverinoma.

Umwe mu bayobozi utatangajwe amazina yemereye AFP ko ubu busabe buhuye n’amagambo Gillmann aheruka kuvugira kuri radio mpuzamahanga y’Abafaransa, RFI.

Yagize ati "Amagambo yavuzwe na Gillmann kuri RFI yemeza ko Monusco idafite ubushobozi bwa gisirikare bwo guhagana n’umutwe wa M23, biri ku ntango y’umwuka uhari kuri ubu. Twasabye Monusco ku neza ko ava mu gihugu."

Abaturage bamaze iminsi bamagana MONUSCO, umutwe ugizwe n’abasirikare n’abapolisi basaga ibihumbi 14, bamaze imyaka irenga 20 mu burasirazuba bwa Congo.

Ni umutwe washyizweho n’Umuryango w’Abibumbye mu 1999, uhabwa inshingano zo kurwanya imitwe yitwaje intwaro yakomeje kwibasira uburasirazuba bwa Congo, ngo uhagarure amahoro.

Monusco yavuze ko yababajwe n’iki gikorwa cya leta ya RDC. Iti “Monusco ifite ubushake bwo gukomeza gukorana n’abaturage ba RDC kimwe n’inzego z’ubutegetsi mu gushyira mu bikorwa inshingano yahawe n’Akanama k’Umuryango w’Abibumbye gashinzwe amahoro.”

Ruto yikomye leta ayishinja kumubangamira mu rugendo rwe rwo guhatanira kuyobora Kenya

Vizi Perezida wa Kenya akaba n’umukandida ku mwanya wa Perezida mu matora ateganyijwe ku wa 9 Kanama, William Ruto, yavuze ko guverinoma iri kumubuza amahoro mu minsi ye ya nyuma yo kwiyamamaza.

Mu kiganiro yagiranye n’abanyamakuru kuri uyu wa Kane, yagize ati “Nk’uko mubizi abo duhanganye bagerageje kudukumira aho twagombaga kwiyamamariza.”

Nyuma yo kubuzwa kwiyamamariza kuri Stade ya ‘Nyayo National Stadium’ mu mujyi wa Nairobi, ku munsi wa nyuma ku wa Gatandatu, ishyaka rye ’United Democratic Alliance’ ryajyanye ikirego mu rukiko.

Mu iburanisha ryabaye mu gitondo cyo kuri uyu wa Kane, umucamanza, Joseph Sergon, yanzuye ko Ruto yagombaga kwemererwa gukorera kuri Stade Nyayo nk’uko RFI ibitangaza.

Ruto yavuze ko ashaka kugaragariza rubanda uburyo leta ishaka kumwitambika mu matora yo ku wa 9 Kanama.

Biteganyijwe ko ibikorwa bya nyuma byo kwiyamamaza abikorera i Mombasa kuri iki gicamunsi ariko yagaragaje ko yakumiriwe gukorera ku kibuga cya Tononoka.

William Ruto yikomeye leta ayishinja kumubangamira mu bikorwa byo kwiyamamaza

Afurika y’Epfo: Inzu z’abacukura amabuye y’agaciro mu buryo bwa magendu zatwitswe

Abaturge bo mu gace ka Kagiso gaherereye mu Burengerazuba bw’Umujyi wa Johannesburg muri Afurika y’Epfo bigabije inzu bikekwa ko ari iz’abakora ubucukuzi bw’amabuye y’agaciro butemewe n’amategeko barazitwika ku bw’uburakari bwakuruwe n’igikorwa kigayitse cyo gusambanya abagore bikozwe n’abacukuzi.

Polisi yo muri ako gace yakoresheje kajujuguju irasa imyuka iryana mu maso kugira ngo itatanye abo baturage bari bazabiranyijwe n’uburakari.

Abaturage bakoresheje amabuye ndetse batwika amapine nk’uburyo bwo gufunga imihanda minini muri ako gace.

Ibi byaje nyuma y’icyumweru abagore umunani basambanyijwe mu kivunge hafi y’ikirombe cy’amabuye y’agaciro ubwo barimo bafata amashusho y’indirimbo.

Abagabo bagera ku 130 batawe muri yombi ndetse kuri ubu bakurikiranyweho ibyaha birimo gutunga imbunda n’izindi ntwaro ziturika mu buryo bunyuranyije n’amategeko.

Nta n’umwe muri bo wigeze ahamwa n’icyaha cyo gusambanya ku gahato kuko hagitegerejwe ko hakorwa ibizamini bya ADN nk’uko BBC ibivuga.

Abaturage batwitse inzu bikekwa ko ari iz'abacukuzi b'amabuye y'agaciro babikora mu buryo butemewe nyuma y'uburakari batewe n'abasambanyije abagore ku gahato
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza