IGIHE

Abanyarwanda batuye muri Buffalo biyemeje gufata iya mbere mu guhangana n’abapfobya Jenoside yakorewe Abatutsi

0 28-06-2022 - saa 00:06, IGIHE

Abanyarwanda n’inshuti z’u Rwanda batuye mu Mujyi wa Buffalo muri New York biyemeje gukomeza kurwanya ingengabitekerezo ya Jenoside aho iva ikagera. Hari mu gikorwa cyo kwibuka ku nshuro ya 28 Jenoside yakorewe abatutsi cyabaye ku wa Gatandatu tariki 25 Kanama 2022.

Umunyarwanda uhagarariye bagenzi be mu Mujyi wa Buffalo, Pascal Karangwa yavuze ko batagomba guha amatwi abagoreka amateka ya Jenoside yakorewe Abatutsi dore ko hari abashaka kuyihakana bavuga ko atari Abatutsi gusa bapfuye.

Karangwa yasabye Abanyarwanda n’inshuti z’u Rwanda kudaha bene abo umwanya kuko amateka agaragaza neza uburyo Abatutsi bahizwe kuva mu 1959 kugeza mu 1994 ubwo Jenoside yashyirwaga mu bikorwa.

Umunyamabanga wa mbere muri Ambasade y’u Rwanda i Washington D.C, Mulindwa Francis, wari uhagarariye Ambasaderi Mathilde Mukantabana, yagaragaje uburyo abashyize hamwe, bafite ubushake n’umurongo uhamye ntacyo batageraho.

Yatanze urugero ku buryo Inkotanyi zahagaritse Jenoside nta wakekaga ko zabishobora. Yanerekanye n’uburyo u Rwanda rwishatsemo ibisubizo ngo rukemure ibibazo byatewe na Jenoside yakorewe Abatutsi.

Yasabye abari muri uyu muhango guharanira ko Jenoside itazongera ukundi «bimakaza ubumwe ndetse bakigisha urubyiruko amateka y’ukuri.”

Ubutumwa bw’umuyobozi w’umujyi wa Buffalo, Byron Brown, bwatanzwe na Emmerson Barr III ushinzwe ubufatanye hagati y’umujyi wa Buffalo n’indi itandukanye ku isi.

Uyu muyobozi yashimiye Abanyarwanda baba muri Buffalo avuga ko kwifatanya na bo ari bimwe mu byo aha agaciro kandi uburyo bitwara neza mu duce batuyemo bigaragaza ishusho y’uburyo u Rwanda rwiyubatse.

Iki gikorwa cyaranzwe n’indirimbo zo kwibuka, ubuhamya bw’uwarokotse Jenoside yakorewe Abatutsi ndetse n’ibiganiro bitandukanye byibanze ku mpamvu-muzi za Jenoside n’uburyo bushya bw’ipfobya n’ihakana ryayo.

Cyanabaye umwanya wo kuganira hagati y’Abanyarwanda n’inshuti z’u Rwanda ku bikorwa bitandukanye byo gukomeza guteza imbere u Rwanda.

Umujyi wa Buffalo ufitanye umubano n’Umujyi wa Muhanga wo mu Ntara y’Amajyepfo. Hari ibikorwa uyu mujyi wagiye ufashamo Muhanga birimo gutanga ibikoresho bitanga amashanyarazi aturutse ku mirasire y’izuba no gutanga inka. Hari n’amahugurwa y’abarimu atangwa binyuze mu mushinga witwa Anna-Frank project ukorera muri Kaminuza ya State University of New York College.

Umunyarwanda uhagarariye bagenzi be muri Buffalo, Pascal Karangwa yasabye kurwanya abapfobya Jenosie yakorewe Abatutsi
Francis Mulindwa, Umunyamabanga wa mbere wa Ambasade y'u Rwanda i Washington
Inshuti z'u Rwanda zasobanuriwe amateka yaranze Jenoside yakorewe Abatutsi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza