IGIHE

Impano zitangaje z’urubyiruko rwa Kirehe rwitabiriye ArtRwanda- Ubuhanzi

0 22-06-2022 - saa 21:36, Hakizimana Jean Paul

Urubyiruko rwo mu Karere ka Kirehe rwitabiriye Irushanwa ryo gushaka abanyempano no kuzimurika rya ArtRwanda- Ubuhanzi, runyurana umucyo imbere y’abagize Akanama Nkemurampaka.

Iri rushanwa riri kubera ku rwego rw’akarere mu ijonjora ry’ibanze; kuri uyu wa Gatatu, tariki ya 22 kamena 2022, ryabereye mu Karere ka Kirehe ahashakishwaga abanyempano bahiga abandi mu byiciro bitandukanye.

Urubyiruko rwagaragaje impano mu byiciro birimo Ubugeni, Indirimbo n’Imbyino, Imideli, Ikinamico n’Urwenya, Filimi no gufata amafoto ndetse n’Ubusizi n’Ubuvanganzo.

Tuyisenge Cassien ufite imyaka 28 yamuritse imwe mu mitako yo mu nzu akora yifashishije indodo, ishyirwa hanze n’indi myinshi itandukanye itangaje. Yavuze ko ibihangano akora bimutunze kuri ubu akaba yifuza kubimurikira Isi.

Ati “Narebye ibintu bitwegereye bipfa ubusa njye mpitamo kubibyaza umusaruro. Mu byo nafashe harimo ubudodo, imitako ikoreshejwe uburo. Kuri ubu byatangiye kunyinjiriza amafaranga mu kwezi nshobora kubona ibihumbi 200 Frw.”

Umuhoza Solange we yifashishije ubugeni abumba umuntu ufite ubumuga wikoreye intango agereranya n’ibibazo imbere ye ahashyira izuba rigaragaza ahazaza heza; ku rundi ruhande yahashyize zahabu igaragaza ubutunzi buri imbere.

Mu gusobanura igihangano cye, yavuze ko abantu bafite ibibazo badakwiye kwiheba kuko nyuma ya byo ubuzima bwongera bukamera neza.

Bizimungu Dieudonné we yagaragaje imigongo, utubati n’imitako y’indabo zikozwe mu bikarito, benshi bakunze kujugunya anagaragaza ubuhanga mu kubikoramo ibintu bikomeye bishobora kuramba.

Ishimwe Pharat we yagaragaje robot yakoze mu giti anayiha ubushobozi bwo kuvugisha abantu ndetse ibice byayo bimwe birimo amaboko n’umutwe bikaba bishobora gukora.

Yavuze ko impamvu yitabiriye iri rushanwa ari ukugira ngo agaragaze ubumenyi bwe mu gukora robot hanyuma nagirirwa icyizere agatsinda azabone amahirwe yo kubwongera abe yanakora ishobora kugenda ikanafasha abantu imirimo.

Hagenimana Evode we yagaragaje ubuhanga mu gushushanya umuntu akoresheje ikaramu yonyine aho yashushanyije Umuyobozi w’Akarere ka Kirehe, Rangira Bruno.

Iyi foto yashimishije abitabiriye iki gikorwa kuko babonaga irimo ubuhanga budasanzwe.

Umuyobozi w’Akarere ka Kirehe wungirije ushinzwe Iterambere ry’Ubukungu, Nzirabatinya Modeste, yavuze ko impano z’urubyiruko ziba zarabuze aho zimenera bagiye kuzifasha kumenyekana.

Ati “ Uyu munsi tugiye gutoranya urubyiruko 30 rwarushije abandi bagakurikiranwa ariko n’akarere kazifashisha inzu y’urubyiruko mu gukurikirana abasigaye. Hano ku nzu y’urubyiruko dufite ibikoresho by’umuziki, ibyo gufotora, ibifasha amashusho n’ibindi byinshi. Tuzakomeza kubahugura kugira ngo tubongerere ubumenyi mu mpano zabo.”

Biteganyijwe ko urubyiruko 30 rwatsinze ruzakomeza ku rwego rw’intara, nyuma abazatsinda bagakomeza mu mwiherero ku rwego rw’igihugu aho bazamara igihe bafashwa kunoza no kwagura impano zabo no kwerekwa uburyo bazibyaza umusaruro.

Amarushanwa y’Icyiciro cya Kabiri cya ArtRwanda- Ubuhanzi yatangirijwe ku mugaragaro mu Karere ka Rubavu mu Ntara y’Iburengerazuba ku wa 10 Kamena 2022.

ArtRwanda- Ubuhanzi yatangijwe bwa mbere mu 2018 ariko riza kudindizwa n’Icyorezo cya COVID-19. Abahanzi 68 batoranyijwe mu cyiciro cya mbere cy’iri rushanwa bashyizwe ku isoko ry’umurimo muri Mata 2022.

Tuyisenge Cassien yagaragaje imitako yakoze mu budodo
Imitako ikozwe mu buro
Umuhoza Solange yagaragaje igishushanyo yahanze gitanga icyizere
Umwana wakoze robot izi no kuvuga arasaba ubufasha mu kwagura ubumenyi bwe
Bizimungu Dieudonné we yagaragaje imigongo, utubati n’imitako y’indabo zikozwe mu bikarito
Hagenimana Evode ukoresha ikaramu mu gushushanya yagaragaje ifoto ya Meya Rangira Bruno uyobora Kirehe
Umuyobozi w'Akarere ka Kirehe wungirije ushinzwe Iterambere ry'Ubukungu, Nzirabatinya Modeste, yavuze ko biteguye gushyigikira impano z'abato
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza