IGIHE

Ibyo utamenye ku gitabo “Umpangare Nguhangare” cyuzuyemo ibitutsi nyandagazi

22 5-12-2018 - saa 13:18, Muvunyi Arsène

Gutukana bifatwa nk’umuco w’abashumba, abantu batagira indero, batakuriye mu muryango; nyamara Sibomana Antoine wari intiti yaminuje yaricaye yandika igitabo cyuzuyemo ibitutsi acyita “Mpangara Nguhangare”.

Sibomana yavutse mu 1946, ni umwe mu banyarwanda bize ibijyanye n’indimi kera. Yabanje kubyiga mu iseminari, akomereza mu yahoze ari Kaminuza Nkuru y’u Rwanda, icyiciro cya gatatu ajya kucyiga muri Canada aho yize Umuco n’Iyigandimi.

Yakoze mu nzego zitandukanye za leta nko muri Minisiteri y’Ubushakashatsi, iy’Ubutegetsi bw’Igihugu, aba Burugumesitiri, yandika ibitabo, akora ikiganiro cy’Umuco kuri Radiyo Rwanda ndetse ari mu bagize uruhare mu kunonosora imyandikire y’indirimbo yubahiriza igihugu, “Rwanda Nziza.”

By’umwihariko Sibomana yamenyekanye kubera igitabo kirimo ibitutsi yise “Umpangara Nguhangare” yanditse mu 1987 kijya hanze mu 1991.

Ni igitabo gitungura benshi bagisoma bitewe n’ibitutsi nyandagazi byuzuyemo, ku buryo bibaza ukuntu umuntu nk’uyu wari umunyabwenge, mu kanwa ke havamo amagambo n’ayo, akagera n’aho ayashyira mu nyandiko.

Muri iki gitabo harimo imigani y’imigenurano ariko ivugitse mu buryo buteye isoni, uturingushyo, byenda gusetsa n’ubundi buvanganzo butandukanye.
Ibitutsi byinshi bigikubiyemo bigaruka ku myanya y’ibanga y’ababyeyi b’abagore. Umwanditsi asobanura ko ‘gutukana ku babyeyi b’abagore, bishingiye ku mpamvu enye z’ingenzi: kubabaza uwo utuka, kwiganzura ubutegetsi, kurengera uwawe no gupfobya ibyo uzira cyangwa udashoboye kwigondera.’

Yavuze ko ‘iyo usesenguye ibitutsi, usanga mo bimwe mu bigize ishingiro ry’umuco wa kinyarwanda kuko icyandagazwa iyo abantu batukana ari uko ku busanzwe kiba cyubahitse kandi cyubashywe: gutukana rero ni ukubahuka ibisanzwe byubahitse’.

Sibomana ntakiriho kuko yitabye Imana mu 2013, gusa yasize abana, bazi iby’iki gitabo cye kuko yajyaga abibaganiriza.

Umwe muri abo ni umuhererezi witwa Cyubahiro Bonavanture, akaba ari umunyamakuru wa Radiyo Mpuzamahanga y’Abafaransa mu Ishami ry’Igiswahili, ari nawe waganirije IGIHE byinshi ku bikorwa bya se.

Uretse ‘Mpangara Nguhangare’, Sibomana yanditse n’ikindi gitabo cyitwa ‘Agataramo k’Abana’. Cyubahiro avuga ko umubyeyi we yibandaga cyane ku muco, dore ko ari nabyo bintu yize kuva mu mashuri yisumbuye kugera aminuje.

Igitabo cyumviswe nabi

Mu busanzwe ‘Umpangare Nguhangare’ ni ugutukana kwabaga hagati y’abashumba mu gihe babaga baragiye inka. Bakoreshaga ibitutsi bikomeye, cyane cyane ibivuga ku babyeyi b’abagore, inka, n’ibindi.

Abatacengeye neza iby’iki gitabo batekereje ko Sibomana yashakaga kwimakaza umuco mubi wo gutukana wakorwaga n’abashumba.

Umuhungu we avuga ko ubwo iki gitabo cyasohokaga yari akiri muto, ariko amaze kuba mukuru yagize umwanya wo kugisoma, anaganira na se.
Yabwiye IGIHE ko intego yacyo yari ugukebura ababyeyi bari barateshutse ku nshingano zo kurera abana babo.

Ati “Ntabwo byari ukwandika ibitutsi n’ubwo abantu babifata kuriya. Kiriya gitabo cyari kigamije gukebura ababyeyi batitaga ku nshingano zo kurera abana.”

“Umwana akarinda agira imyaka 18 azi ko umwana avuka aturutse mu mukondo, umwana byamuteraga amatsiko akajya kubishaka mu bashumba.”

Ubwo yari gusoza amasomo y’icyiciro cya gatatu cya Kaminuza muri Canada, Sibomana yakoze ku bijyanye n’umuco wo gutukana, aba ari na ho avana umugambi wo kwandika iki gitabo.

Cyubahiro ati “Ajya kurangiza amashuri ye muri Canada, nibyo yakoze mu kwimenyereza, arabyandika, agaragaza uburyo rimwe na rimwe ababyeyi bata inshingano, ugasanga umwana arajya gushaka amakuru mu bashumba, amaze kurangiza amashuri ye akomerezaho yandika ibitabo.”

Mu rwego rwo kubona ibi bitutsi, Sibomana yifashishije abashumba batandukanye kuko ari bo babaga babizi, ubundi agenda abikusanya, abibumbira mu gitabo kimwe.

Ati “Ntabwo ari ibitutsi bye yihimbiye, ni ibyo yagiye akura ahandi hantu, cyane mu bashumba kuko n’ubundi babikoreshaga iyo babaga baragiye.”

Sibomana ngo mu buzima bwe ntabwo yakundaga abana batukana, yewe uyu muco ntiyigeze awugira kuko yari umuntu ukunda gusenga, akaba yari yaranatangiye urugendo rwo kwiha Imana ariko birangira abaye umulayiki.

Yasize umurage

Cyubahiro Bonaventure yateye mu kirenge cya se, haba mu gukora itangazamakuru no kwandika ibitabo. Avuga ko ubu yatangiye kwandika igitabo yise Akamaro k’Impyisi mu Rwanda, igitabo kizaba kigaragaza uburyo inyamaswa y’impyisi yafatwaga.

Ati “Nanjye hari igitabo nshaka gusohora, ntabwo ndashyiramo imbaraga nyinshi, bikunze cyasohoka vuba. Kigaragaza akamaro k’impyisi mu muco nyarwanda, ni nako cyitwa. Buriya inka n’impyisi bijya kugira amazina amwe n’uko inka bayivuga neza, impyisi bakayituka.”

Uretse iki gitabo kandi ngo ari gutunganya n’ibindi bibiri umubyeyi we yasize yandikishije intoki, ku buryo mu gihe cya vuba bizajya hanze.

Cyubahiro Bonaventure asaba abanyarwanda gusobanukirwa n’iki gitabo, bakirinda kukigoreka. Ati “Ujya gusoma igitabo ntabwo agihera hagati.”

Bimwe mu bice by'iki gitabo cyuzuyemo ibitutsi ku myanya y'ibanga y'ababyeyi
Cyubahiro Bonevanture, Umuhungu wa Sibomana wanditse Umpangare Nguhangare
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
Alexis 2019-04-02 06:53:58

Nsanze ibitutsi bimwe bisa nuvyiwacu. Nagomba kubasaba mukindungikire

2
Rwakagara 2018-12-09 22:55:29

Ushaka igitabo nyandikira kuri [email protected] nkigihe, turusheho kumenya umuco wacu,.. Abatumva ibyiki gitabo nuko bataragisoma kandi abikoma umwanditsi muzandike ibyanyu

3
Didy 2018-12-06 02:09:11

Ntimugashyigikire amafuti rwose,ubwose aho harimo izihe nyigisho cyangwa uburere muha urubyiruko?murabigisha iki àTravers ibyo bigambo byuzuyemo ubujiji? Ari uwanditse icyo gitabo ndamugaye.

4
Theo 2018-12-05 23:19:33

@Bona,kiriya gitabo n’igihangano cy’umubyeyi wawe, ahubwo gishyire kw’isoko tukigure tumenye bimwe mubigize umuco!
Ninde se udatukana?

5
Nkusi Norbert 2018-12-05 14:50:19

Nyumvira mbese! Ubwo uhagaze kumaguru yombi ugiye kuvugira so ko yanditse amashitani usibyeko nawe yari yo! Iso ndamuzi cyane yari Burugumesitiri wacu imbazi usibye no kubyandika yaranatukanaga wibeshya abantu! Ntasoni uti yari umukristo hahah uzabeshye abatamuzi sinzi icyo wise ubukristo ariko ubundi umukristo nufite imico ya Kristo! Nonese umukristo aricana ko so yakoze genocide ndetse yanapfiriye muri gereza nuko numvise uyu munyamakuru yabihishiriye sinzi impamvu! Ijambo yabwiye papa wanjye bajya kumwica muntambara ndaryibuka sindivuze ndamuzi cyane birantangaje kumva umuvugira ngo yari umukristo! Ngo igitabo cyumviswe nabi ikitumvikana niki subwo! Umuntu muzima tena umuyobozi ata umwanya we akajya mubashumba kubabaza ibitutsi yandika! Yewe kiriya gihe urwanda ntirwari igihugu rwari igihuru.

6
Nzabishaka 2018-12-05 12:52:04

Ushaka aka gatabo anyandikire kuri e-mail nkamuhe ari soft copy. Iyo e-mail ni [email protected]

7
Kimironko 2018-12-05 11:19:28

Dore aho abanyarwanda rero baber’indyarya. None se ibi bitutsi nibyo mubonye byoroshye kurush’ibyivugo byanyu? Umuntu kwigamba ko yish’abantu akagarik’ingogo maze mugakoma mu mashyi nibyo byiza kurusha uyu muhanga? Umuntu urimo kuvug’amazina y’inka mu bukwe burimo n’abanyacyubahiro ati" Yarimukubitiye mu gihubi risohokan’ibyano, inkongoro zihag’amafunguro." Ati ndi Rutikuran’inkubito ya Ruvusha narimucumise mu rubavu abamwambariye baranyiyambaza ngo hato bataba abatabazi batarabyara abazabatabarira" Ati nishe Nyiragore umwami arangororera". N’ibindi byivugo byose muzi mu muco wacu kandi 100% byose bivuga ku bwicanyi. Tutibagiwe ko n’umuco wo kubandwa no guterekera wavugwagamo amagambo mwe mudashaka kumva nk’aho ibishyimbo babyitag’ibishino, inzoga bakayita ibindi ntavuze. None se aba bivuga ntitubah’amashyi ngo ubukwe cyangw’ibirori byaryoshye? Kugez’uyu munsi ntabwo abanyarwanda barasobanukirwa n’ubukungu buri mu muco wabo ahubwo ibi bib’ishyano iyo bashatse kubigereranya n’iterambere ry’ubu kuko ari ryo babona ari ryiza. Amazina bwite yasimbujw’amazina y’inyunge ndetse n’asanzwe yaraciwe. Urugero uvuze ngo nyoko arihe bibaza aho warerewe bakayoberwa. Ariko iyo uvuze ngo maman wawe arihe, aho ho rwose murajyana. Nongere mbabaze; kuvuga umushino n’umusundi no kuvug’icumu ryuzuy’amaraso ikibangamiy’ikiremwa muntu n’iki? Ibi byose byarangag’uko twari tubayeho mu myororokere yacu ndetse n’ayo macumu ni intwari zabaga zarwanye zikuvan’umwanzi ubundi societe ikonger’igasugir’igasagamba ababyeyi bakongera bagaheka. Njye ni uko mbyumva rwose.

8
Magayane no 2 2018-12-05 11:15:27

ndishimyeeeeeeeeeeeeeeeeeeeeeeeeeeee, nari narakibuze, harimo ubuhanga bwinshiiiiiiiiiiiiiiiiiiiiiiiiiiiiiiiiiiii, umuco ni mugari
iki gitabo kiboneka he, muduhe telephone ze
ahuiuiuiuiuiiiiiiiiiii, nasetseeeeee narizeeeeeeee

9
Cla 2018-12-05 09:51:39

Niko sha,ubwo nawe uri proud yuko so yanditse igitabo cyuzuyemo ibitutsi

10
bebe 2018-12-05 08:51:17

igihe turabashimiye cyaneeeeeeeeeeeeeeeeeeeeeeeeeeeeeeeeeeeeeee kubwiki gitabo twari twarabuzepe abanyamakuru bi gihe com ndabashimyepeeeeeeee

Paji: 1 | 2 | 3  

Kwamamaza