IGIHE

Umudage yanditse igitabo ku buhamya bw’abafashwe ku ngufu muri Jenoside

1 7-04-2019 - saa 16:12, Ishimwe Israel

Umudage Olaf Heine uzobereye mu gufata amafoto yakusanyije akubiyemo ubuhamya bw’abakobwa n’abagore bafashwe ku ngufu muri Jenoside yakorewe Abatutsi mu 1994, yashyize mu gitabo cye yise “Rwandan Daughters.”

Jenoside yakorewe Abatutsi yahitanye abarenga miliyoni mu minsi 100, yasize ibikomere byo ku mubiri no ku mutima ku bayirokotse bitewe n’ubuzima busharira banyuzemo bwo guhigwa bukware amanywa n’ijoro.

Olaf Heine w’imyaka 51 yakusanyije amafoto agaragaza ubuhamya bw’abagore bafashwe ku ngufu muri Jenoside ndetse n’imibereho y’abana babavutseho nyuma y’imyaka 25.

“Rwandan Daughters” ni igitabo kivuga byimbitse ku rugendo Abatutsi banyuzemo mu bihe bya Jenoside kugeza no ku bana bibarutse. Amashusho n’ibiganiro bikirimo byafashwe n’abanyamakuru b’Abadage Antje Stahl na Andrea Jeska.

Abana bavutse mu ifatwa ku ngufu ry’ababyeyi babo muri Jenoside yakorewe Abatutsi babihiwe n’ubuzima kuko bamwe bisanze batishimiwe na ba nyina kubera ibihe banyuzemo babatwise, bakaba batazi na ba se.

Mu minsi 100 y’ibihe by’akaga kagwiriye u Rwanda, abagore benshi bafashwe ku ngufu n’Interahamwe n’ingabo zatsinzwe.

Umuryango w’Abapfakazi ba Jenoside yakorewe Abatutsi, AVEGA-Agahozo, uvuga ko ufite abanyamuryango bagera ku bihumbi 20, muri bo 1599 bakaba baranduye agakoko gatera SIDA kubera gufatwa ku ngufu ndetse bakaba bafite n’abana 1122 bavutse ku bafashwe ku ngufu muri Jenoside.

Mu buhamya bw’abafashwe ku ngufu mu gitabo “Rwandan Daughters”, ngo babanje kwanga abana bibarutse kuko ngo babibutsa ibihe bikomeye banyuzemo n’ingaruka byabagizeho. Hari abagerageje gukuramo inda ariko banga guheranwa n’agahinda bakunda abana babo.

Mu magambo y’umwe muri bo yavuze ko “Ndamutse nanze umwana wanjye w’umukobwa, sinaba ntandukanye n’abicanyi bashatse kutwica no gusenya igihugu cyacu kubera urwango rwabokamye.’’

Umwana wavutse ku wafashwe ku ngufu we yavuze ko yashenguwe no kubazwa na mwarimu kuri se kandi “Ntarigeze mumenya.’’

Bamwe mu bana bahuye n’imbogamizi zo kutamenya ba se ndetse bakangwa cyane bitewe no kuba ababyeyi babo barandujwe SIDA, banicirwa imiryango yabo mu maso.

Umwe mu batangabuhamya yagize ati “Ni njye njyenyine warokotse mu muryango wanjye. Sinongeye gushyingirwa. Mbana n’umwana wanjye kandi ubuzima buragenda.’’

Heine utuye i Berlin mu Budage mu gitabo cye avuga ko gufata amafoto byari bigoye, kandi byasembuye amarangamutima ubwo yumvaga abagore bavuga ku ihohoterwa bakorewe.

Yavuze ko bamuviriye imuzi inkuru y’ubuzima banyuzemo. Yagize ati “Inshuro nyinshi muri uyu mushinga, nahuye n’abagore bari kurira, ariko buri wese yihaga akanyabugabo akagerageza gusoza icyamuzanye.’’

Yakomeje avuga ko “Sinashatse kuyobora uko amashusho afatwa. Narebaga uko umubyeyi n’umwana bitwara imbere ya camera no kutugaragariza umubano bafitanye.’’

Igitabo “Rwandan Daughters”cya Heine kizatangazwa n’inzu y’ibitabo ya Hatje Cantz Verlag iri mu zikomeye mu Budage aho ifite icyicaro mu mijyi ya Stuttgart na Berlin.

Amafoto ari mu gitabo “Rwandan Daughters” agaragaza ababyeyi bari kumwe n’abana babyaye nyuma yo gufatwa ku ngufu, yafatiwe aho basambanyirijwe.

Umushinga wo gufata aya mafoto yafotowe hagati ya 2016-2018, watewe inkunga n’Umuryango utanga ubufasha wa Ora Kinderhilfe, ufashijwe na Solace Ministries yita ku bapfakazi ba Jenoside.

Bamwe mu babyeyi bafashwe ku ngufu muri Jenoside bibumbiye mu Muryango SEVOTA (Solidarité pour l’Épanouissement des Veuves et des Orphelins visant le Travail et l’Autopromotion L’Association) washinzwe ku wa 28 Ukuboza 1994, ukaba ugizwe n’abapfakazi n’abakobwa bafashwe ku ngufu muri Jenoside bagaterwa inda.

Mbere yo gufatwa ku ngufu, uyu mubyeyi yiciwe umugabo we n'abana batatu mu maso
Amafoto yafatiwe aho ababyeyi bagiye bafatirwa ku ngufu mu gihe cya Jenoside yakorewe Abatutsi mu 1994
Igitabo “Rwandan Daughters” kiva imuzi ubuhamya bw'abagore bafashwe ku ngufu muri Jenoside nuko bongeye kwigarurira icyizere cy'ubuzima
Jenoside yakorewe Abatutsi yasize ibikomere bitandukanye ku bayikorewe n'ababakomokaho
Ubuhamya bw'uyu mubyeyi bukubiye mu minota itanu kuko muri icyo gihe Interahamwe zari zimaze kwica umuryango we no kumufata ku ngufu
Umubyeyi uri mu batanze ubuhamya mu gitabo “Rwandan Daughters” n’umwana we wavutse nyuma ya Jenoside yakorewe Abatutsi
Umuryango w'umubyeyi we warishwe mu gihe cya Jenoside, aba ariwe urokoka wenyine anafatwa ku ngufu
Uyu mubyeyi avuga ko umukobwa we asobanuye byinshi ku buzima bwe nubwo yahuye n’ibihe bikomeye mu gihe cya Jenoside
Uyu mubyeyi yafashwe ku ngufu afite imyaka 15 y’amavuko byatumye abaho igihe kirekire yigunze mbere yo guhura na bagenzi be bigatuma yigarurira icyizere cyo kubaho
Yabwiye Olaf Heine wanditse igitabo ko akibyara umwana yabanje kumwanga ariko urukundo rwe no kumwitaho bigenda bikura
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Bwiza Joyce 2019-04-07 15:32:41

Imana ikomeze kabaha kwihangana bashiki bacu mwe.

Kwamamaza