IGIHE

Nyirawizeye yanditse igitabo kivuga ku gihirahiro yanyuzemo nyuma ya Jenoside

0 18-04-2019 - saa 10:54, Uwiduhaye Theos

Umunyarwandakazi witwa Irène Nyirawizeye Dallaire yanditse igitabo gikubiyemo ubuhamya igihirahiro yanyuzemo nyuma ya Jenoside yakorewe Abatutsi yaburiyemo abo mu muryango we.

N’ubwo amateka ya Jenoside yakorewe Abatutsi mu 1994 yashegeshe benshi, kuyibagirwa ntibyaba ariwo muti ndetse hari abambariye kuyasigasira babinyujije mu bihangano bitandukanye kugira ngo n’abazavuka ejo bazamenya ukuri ku byabaye.

Ntabwo biba byoroshye kuri bamwe, cyane ababa babara inkuru mpamo y’ibyo banyuzemo ariko na none birabaruhura bagasangiza benshi ibyabaye mu Rwanda.

Irène Nyirawizeye Dallaire uri mu bagizweho ingaruka zikomeye na Jenoside yakorewe Abatutsi mu 1994 akabura ababyeyi be n’abavandimwe, yahisemo kwifashisha inganzo mu gusobanura amaganya asobetse umutima we mu gihe cya Jenoside.

Iki gitabo cya Nyirawizeye kitwa ‘Improbable destin d’Irène’ gikubiyemo ishavu n’inzira y’umusaraba yanyuzemo muri Jenoside yakorewe Abatutsi mu 1994.

Kirimo ubuzima bwihariye ariko yacyanditse ashaka gutanga ubutumwa kuri benshi banyuze mu bibazo uruhuri nk’ibyo yanyuzemo mu rwego rwo kubakomeza no kubereka ko imbere ari heza.

Nyirawizeye ni umwe mu bana batatu barokotse iwabo cyane ko ababyeyi be bishwe muri Jenoside yakorewe Abatutsi mu 1994.

Se yishwe igitangira naho nyina n’umuvandimwe we muto bicirwa mu maso we ku bw’amahirwe ararokoka, uyu mukobwa wari ufite imyaka umunani muri Jenoside yarwanye kuri musaza we wari ufite imyaka itatu abasha kurokokana nawe n’ubwo byari ibintu bikomeye.

Iki gitabo cya Nyirawizeye yagifatanyije na Sonia Reid ndetse ni nawe wagize uruhare rukomeye mu iyandikwa ryacyo ryatangiye umwaka ushize.

Ubu Nyirawizeye akora ubushabitsi bwerekeye ubuvuzi cyane ko ari nabyo yize muri kaminuza, afite abakozi 25 aha amavuriro akabakoresha iyo yabuze abantu bayakorera, mu gifaransa babyita ‘Agence de placement infirmiers’.

Nyuma yo kubura ababyeyi be muri Jenoside, Nyirawizeye umwaka ushize yabonye umuryango umukurikirana aba umwana w’umuzungukazi witwa Sylvie Dallaire mu buryo bwemewe n’amategeko babana muri Canada.

Igitabo ‘Improbable destin d’Irène’, ubu kiboneka kuri internet ku rubuga rwa Amazon ariko abantu bari i Burayi no muri Canada bakibona byoroshye, ateganya kuza kukimurika mu Rwanda mu mpeshyi y’uyu mwaka aho avuga ko gishobora no kuzaba cyarashyizwe mu zindi ndimi nk’Icyongereza.

Nyirawizeye yanze guheranwa n'ishavu ahubwo ahitamo gusangiza isi yose amateka ye binyuze mu gitabo yanditse
Dénis Coderre wigeze kuba Meya w'umujyi wa Montréal ari kumwe na Nyirawizeye ubwo yamurikaga igitabo cye muri uyu mujyi
Felix Auger Aliassime wamamaye mu mukino wa Tennis muri Canada ari mu bashishikajwe no kumenya amateka u Rwanda rwanyuzemo muri Jenoside yakorewe Abatutsi
Igitabo cya Nyirawizeye kirimo ubuhamya bukomeye bw'ubuzima bwe
Igitabo cya Nyirawizeye benshi bifuza kugitunga kubera ubuhamya bukubiyemo
Aho agiye kumurika igitabo abantu benshi baba bitabiriye bashaka kumenya byimbitse amateka ya Jenoside yakorewe Abatutsi yabaye mu Rwanda mu 1994
Irène Nyirawizeye Dallaire ni ubwa mbere yari yanditse igitabo
Iyo Nyirawizeye avuze inzira y'inzitane yanyuzemo muri Jenoside benshi basesa urumeza
Nyirawizeye avuga ko ari umuhigo ukomeye yesheje wo kubasha kubika amateka y'ubuzima bwe
Ubuhamya bwa Nyirawizeye butuma benshi bongera gutekereza ku mahano yagwiririye u Rwanda

Amafoto: Egide Foxworth

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza