IGIHE

Mbanda yanditse igitabo kigereranya iterambere Perezida Kagame na Xi w’u Bushinwa bagejeje ku baturage

2 21-06-2019 - saa 09:06, Akayezu Jean de Dieu

U Rwanda rukomeje guhangwa amaso n’abatuye Isi nk’igihugu kiri kwihuta mu iterambere nyuma y’imyaka 25 Jenoside yakorewe Abatutsi ibaye igashyirwaho akadomo na Perezida Kagame wayoboye urugamba rwo kurubohora.

Ku rundi ruhande ariko u Bushinwa butuwe na miliyari 1.3 nabwo ni igihugu kiri kwihuta mu iterambere ndetse mu myaka iri imbere nta kabuza ko buzaba bwaciye kuri Leta Zunze Ubumwe za Amerika mu bukungu bitewe n’imiyoborere ya Perezida Xi Jinping.

Umwanditsi akaba n’Umuyobozi w’ishami rishinzwe Itangazamakuru muri RGB, Gerard Mbanda, amaze imyaka isaga ibiri yandika igitabo kigaruka ku mateka y’ibi bihugu byombi, umubano wabyo ndetse by’umwihariko kuri Perezida Kagame na Xi Jinping.

Iki gitabo yise “Rwanda and Chine: Effective Leadership is key to transformation Governance”, kigizwe n’ibice bitanu by’ingenzi bigaruka ku mubano w’ibihugu byombi, amateka yabyo, uko u Bushinwa bwivanye bibazo bya politiki bukazana impinduka mu bukungu.

Umwanditsi agaragaza iterambere ry’u Bushinwa by’umwihariko ku butegetsi bwa Perezida Xi, ibikorwa by’u Bushinwa muri Afurika, intambara y’ubucuruzi hagati y’u Bushinwa na Amerika.

Agaragaza amateka y’u Rwanda n’ibyo Perezida Kagame amaze kugeza ku banyarwanda mu myaka 25 ishize.

Ubwo yamurikaga iki gitabo ku mugoroba wo kuri uyu wa Kane tariki 20 Kamena 2019, muri Kigali Marriott Hotel, Mbanda yavuze ko uburyo Abanyarwanda bakataje mu iterambere bahereye ku busa bihura cyane n’uko Abashinwa bakomeje gutera imbere mu gihe nabo bahereye ku busa.

Yavuze ko igitabo cye kivuze byinshi by’umwihariko ku bayobozi b’ibihugu byombi urebye ibyo bagejeje ku baturage babyo nyuma y’inzitane byanyuzemo.

Ati “Bariya bagabo bose ni abayobozi b’indashyikirwa bafite ibikorwa by’indashyikirwa, ugiye kureba ibyo u Rwanda rumaze kugeraho mu myaka 25 ishize, ugasanga rero Perezida dufite iyo ugiye kureba ibyo yatugejejeho nk’abanyarwanda ntawe utabibona.”

“U Bushinwa rero nabwo iyo ugiye kureba uko bugenda butera imbere, ibihugu byose bitangiye kubutinya kuko iyo urebye ikoranabuhanga bugezeho rirahambaye.Ubona ko aricyo gihugu kimaze gukura abaturage mu bukene.”

Yakomeje agira ati “Niyo mpamvu nagerageje kuvuga icyo abayobozi bagejeje ku baturage babo ugasanga ari abayobozi abaturage babo bishimiye, wenda hari ababivuga ukundi ariko iyo urebye usanga abaturage b’u Rwanda cyangwa ab’u Bushinwa bishimira ibyo bagejejweho n’abayobozi babo.”

U Rwanda ni igihugu gifitanye umubano n’ibihugu byinshi haba mu buhahirane hagati y’abaturage babyo n’u Rwanda, ubufatanye mu bijyanye na politiki umutekano n’ibindi.

Mbanda avuga ko impamvu yahisemo kwandika u Bushinwa n’u Rwanda ari uko mu myaka ya 1970 akiri umusore, umubyeyi we yajyaga amutuma kugura ibinyamakuru byo mu Bushinwa akamusobanurira ibivugwa ku bikorwa by’iki gihugu n’abaturage bacyo, iterambere ry’abaturage n’uburyo bakunda igihugu cyabo.

Yagize ati “u Rwanda ni igihugu cyanjye niho mba, Perezida wacu ndamuzi ariko u Bushinwa nacyo ni igihugu nakunze kubera umubyeyi wanjye ambwira uburyo abantu batangiye ari abakene, uburyo barimo gutera imbere bahinga umuceri numva ari igihugu kinteye ishema.”

“N’aho nagiriye mu mwuga w’itangazamakuru nakomeje gukurikirana u Bushinwa, imizamikure yacyo usanga ari igihugu niyumvamo ko nabonaga ari igihugu gifite icyerekezo, abantu bacyo bakomera ku muco kandi bakunda igihugu cyabo.”

Umwarimu muri Kaminuza y’u Rwanda, Ndabaga Eugène, wasomye iki gitabo yashimye uburyo Mbanda yagerageje kugereranya uburyo u Rwanda n’u Bushinwa ari ibihugu bifite imbaraga zidasanzwe.

Senateri Tito Rutaremara wari witabiriye imurikwa ry’iki gitabo nk’umushyitsi mukuru, yashimye Mbanda watekereje kwandika iki gitabo kigaruka ku miyoborere myiza iranga Perezida Kagame na Xi Jinping.

Ati “Iki gitabo cyibanda cyane ku miyoborere myiza, uko ishobora guhindura igihugu ariko kandi biturutse kuri politiki y’ibyo bihugu, biturutse ku buyobozi bifite. Ari Perezida w’u Rwanda n’uw’u Bushinwa ni abantu bayobora neza kandi bakundwa n’abaturage babo.”

U Bushinwa ni umufatanyabikorwa ukomeye w’u Rwanda mu bikorwa bijyanye by’iterambere, haba mu bucuruzi, umutekano, uburezi n’ibikorwaremezo, mu mubano umaze imyaka isaga 45.

Amateka agaragaza ko ibigo byo mu Bushinwa byabengutswe u Rwanda mu myaka myinshi ishize kuko nka China Civil Engineering Construction Corp. ishamikiye kuri leta y’icyo gihugu, yohereje abakozi bwa mbere mu Rwanda mu 1983, maze imwe mu mishinga ya mbere ibamo kubaka Stade Amahoro yuzuye mu 1986 kuri miliyoni $21.

Minisiteri y’Imari n’Ingenamigambi mu Rwanda itangaza ko nibura mu myaka 12 ishize, ishoramari ry’Abashinwa riza mu Rwanda ryageze kuri miliyoni $352.5 mu nzego zirimo ubukerarugendo, ubucukuzi bw’amabuye y’agaciro n’ubwubatsi.

Mbanda yasobanuye igitabo yanditse kigereranya u Rwanda n'u Bushinwa
Abantu benshi bari bitabiriye imurikwa ry'igitabo kigaruka ku byo Perezida w'u Rwanda n'u Bushinwa bagejeje ku baturage
Abantu batandukanye bashimye igitabo cya Mbanda kivuga ku iterambere ry'u Rwanda n'u Bushinwa
Senateri Tito Rutaremara yavuze ko Perezida Kagame na Xi Jinping bose bakundwa n'abaturage
Ambasaderi w’u Bushinwa mu Rwanda, Rao Hongwei, yashimye Mbanda wanditse igitabo kigaragaza iterambere Perezida Xi amaze kugeza ku Bashinwa
Umuyobozi Mukuru w'Urwego rw'Imiyoborere, Dr Usta Kayitesi ari mu bitabiriye imurikwa ry'igitabo cya Mbanda Gerald
Uhereye iburyo: Senateri Tito Rutaremara,Ambasaderi w'u Bushinwa mu Rwanda, Henry Rao Hongwei, Mbanda Gerald na Ndabaga Eugène wasomye iki gitabo bafata ifoto y'urwibutso

Amafoto: Muhizi Serge

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kumiro 2019-06-21 04:38:01

Yewe we uwapfuye yarihuse atabonye aho u Rwanda rugereranywa nibihangange kuri uno mugabane wa rurema.Nzabanza nsome icyo giyabo mbere yokugiraikindi mvuga.Ni akumiro

2
Mboga 2019-06-21 04:26:00

President Kagame arakora cyane,njye mbona ariminsi mike igihugu ayoboye tugaca kurabo bose.

Kwamamaza