IGIHE

Madamu Jeannette Kagame yitabiriye imurikwa ry’igitabo cya Uwineza Celine, ‘Untamed, Beyond Freedom’

3 11-04-2019 - saa 13:17, Ferdinand Maniraguha

Madamu Jeannette Kagame yitabiriye umuhango wo kumurika igitabo ‘Untamed, Beyond Freedom’ cyanditswe na Uwineza Celine, umunyarwandakazi wanditse ku buzima yabayemo we n’umuryango we muri Jenoside yakorewe Abatutsi mu 1994.

Iki gitabo cyamuritswe ku mugoroba wo kuri uyu wa Gatatu muri Kigali Marriott Hotel, aho umuryango, inshuti n’abavandimwe baje kwifatanya na Celine Uwineza mu gihe cyo kumurika igitabo ‘Untamed, Beyond Freedom’.

Iki gitabo cy’amapaji 149 cyanditse mu buryo bwo kubara inkuru, mbese nkuko abantu baganira umwe abwira undi ibyamubayeho.

Uwineza atangirana ibaruwa yandikiye mama we wishwe tariki 10 Mata 1994 hamwe na bakuru be babiri na musaza we, abamenyesha agahinda afite nyuma yo kubabura n’uburyo akumbuye kuzongera kubabona.

Iyo baruwa Uwineza yanditse mu Ukwakira 2015 ntiyari iyo kwishimisha cyangwa urukumbuzi rusanzwe ahubwo ni umuti yari yandikiwe na muganga nyuma y’igihe yari amaze afite ihungabana, ahora arota ibintu bibi, bigaruka ku rugendo yanyuzemo muri Jenoside.

Mu gitabo cye, Uwineza ajyana umusomyi mu minsi ya mbere ya Jenoside ubwo we, ababyeyi be n’abavandimwe be babagaho bishimye kugeza umunsi atangira inzira y’umubabaro tariki 7 ubwo yakangukaga agasanga umusirikare amuhagaze hejuru n’imbunda, akamukurura amujyana aho mama we n’abandimwe bari barindiwe bategereje kwicwa.

Uwineza wari ufite imyaka icumi mu gihe cya Jenoside, abara inkuru y’uburyo mama we yarashwe ukuguru mu maso ye, uko baraye mu bihuru bihishe kugeza tariki ya 10 umunsi umuryango we uvanwa mu kigo cy’ababikira (Les Petites Soeurs de Jesus) ku Kicukiro kuva ubwo ntiyongere kuwubona, n’uburyo yongeye guhura na papa we wari hanze ubwo Jenoside yakorwaga ndetse na musaza we Johnny warokotse.

Nyuma yo kurokorwa n’ingabo za FPR Inkotanyi, Uwineza yagerageje kwiyibagiza ayo mateka ariko aranga aramukurikirana.

Ubwo yamurikaga igitabo cye yagize ati “Nabayeho mfite abantu babiri muri njyewe, umwana w’imyaka icumi ugifashe igitenge cya mama we ufite ibibazo byinshi mu mutwe, nanjye mukuru. Nabayeho ubuzima hanze bigaragara ko nta kibazo ariko imbere mfite agahinda kadashira. Nakoraga ibintu binyibigiza wa mwana w’imyaka icumu ariko inyuma ntibigaragare.”

Mu 2015 yagize ihungabana rikomeye ajyanwa mu bitaro, muganga amutegeka kugenda yandika ibyo yibuka byamubayeho muri Jenoside ngo yiyibutse. Ibyo yanditse ari umuti nibyo byaje kuvamo igitabo.

Ati “Natangiye nandika ku rupapuro, nandika uko niyumva. Nyuma y’imyaka ibiri inkovu zari zigihari ariko cya cyizere tuvuga naracyumvise koko muri njye. Nsubira mu ijwi mama yambwiye (bwa nyuma) ngo genda ubeho. Nasanze narabayeho ntariho mu myaka 22 yose.”

Uwineza yashishikarije abanyarwanda bose kwandika amateka yabo by’umwihariko abarokotse Jenoside yakorewe Abatutsi, kugira ngo bahangane n’abahakana ko itabayeho.

Ati “Nitutandika amateka azibagirana, njye nzandika kugira ngo na wa wundi uhakana Jenoside yakorewe Abatutsi, atazaza ngo ambwire ko itabayeho. Sinzarwana na we nzandika kuko ukuri guca mu ziko ariko ntigushya.”

Murengezi Wilberforce, Papa wa Uwineza yashimye ubutwari umukobwa we yagaragaje yandika igitabo gikubiyemo amateka n’ubuhamya bw’umuryango we.

Yagaragaje ko Imana ariyo yafashije umuryango we kongera kwiyubakamo icyizere nyuma y’ibyo wanyuzemo byose.

Ati “Ikintu cya mbere gikuru kuri twese ni ukumenya Imana kuko niyo ituvanamo ibihu byose tuba dufite mu mutwe. Ushobora kuyisenga ntibivemo, ni ukwicara rero ukayisaba cyane.”

Umuyobozi w’ishami rishinzwe ubushakashatsi n’ishyinguranyandiko muri Komisiyo y’Igihugu yo kurwanya Jenoside, Jean Damascène Gasanabo, yavuze ko igitabo cya Uwineza ari umusanzu ku gihugu, ashishikariza cyane urubyiruko kwandika no gukoresha ubundi buryo bwose kugira ngo amateka ya Jenoside atazibagirana.

Uretse umubyeyi n’abavandimwe be, hari abandi bantu basaga 30 bo mu muryango wa Uwineza bishwe muri Jenoside.

Igitabo Untamed, Beyond Freedom kigurishwa 15 000 Frw. Ubu kiboneka mu iguriro ry’ibitabo rya Ikirezi ndetse no ku iguriro ry’ibitabo ryo kuri internet rya Amazon.

Igitabo 'Untamed, Beyond Freedom' kivuga ubuzima Uwineza yabayeho mbere ya Jenoside, ubwo yakorwaga na nyuma yayo
Abitabiriye imurikwa ry'igitabo cya Uwineza babanje gutembera imurika ry'ibihangano by'ubugeni
Abantu b'ingeri zitandukanye bitabiriye imurikwa ry'igitabo 'Untamed, Beyond Freedom'
Uwineza yashishikarije abarokotse kwandika amateka yabo mu guhashya abahakana n'abapfobya Jenoside yakorewe Abatutsi
Alice Higiro Kamikazi mu mukino ugaruka ku buhamya bw'umubyeyi wapfushije abe muri Jenoside
Alice Higiro Kamikazi na Alain Pierre Sabineza bakina umukino ugaruka ku mateka ya Jenoside
Biganza Isibo (ibumoso) avuga umuvugo afatanyije na Tria Mucyo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Dudu 2019-04-12 09:42:30

Ngewe ndatunguwe, Celine ni umukobwa w uburanga, kd w’umutima,ukunda kd wubaha bose. disi ntawamenya ko nawe wakubitiste gutya! wagirango uri umutesi rwose, gusa Courage si wowe wenyine nasanze burya duhuje byinshi, Impore, komera, Imana yaguhaye iruhande Gilbert uzi gukunda no kubana.aguhoze kd Imana ibimushoboze,Imana niyo yo kwizerwa izabaha ibibondo birusheho kubahoza nubyara uzumva itandukaniro, lv u

2
soleil 2019-04-12 02:13:09

Ihorere kibondo humura kuko Uriho nabo bariho.....

3
MA 2019-04-11 10:31:08

Ihorere Rwanda, ihorere mukobwa mwiza, warakoze kurwana iyi ntambara yo kongera kubaho!!nubwo batabishakaga

Kwamamaza