IGIHE

Ururimi rw’Igifaransa rwungutse amagambo mashya 109

1 14-05-2019 - saa 12:31, Ishimwe Israel

Igifaransa kivugwa n’abagera kuri miliyoni 300 ku Isi, muri bo 44% babarizwa mu bihugu byo munsi y’Ubutayu bwa Sahara. Mu gukomeza kugiha agaciro no kugikuza, inkoranyamagambo ya Le Petit Robert yinjijwemo amagambo mashya 109.

Umushinga wo gutangaza inkoranyamagambo ya Le Petit Robert izagaragaramo amagambo mashya wamuritswe ku wa Mbere, tariki ya 13 Gicurasi 2019.

Umuyobozi ushinzwe kunoza Imyandikire ya Petit Robert, Marie-Hélène Drivaud, yatangaje ko “Muri uyu mwaka amagambo 109 niyo yafashwe.’’

Iyo nkoranyamagambo igaragaraho umunyendimi w’Umufaransa, Alain Rey ku gifuniko cyahanzwe n’umunyabugeni akaba n’umwanditsi Riad Sattouf.

Le Parisien yatangaje ko ayo magambo azagaragara mu nkoranyamagambo ya Robert Illustré n’iya Petit Robert.

Le Petit Robert ifite amagambo mashya ari mu ngeri zitandukanye z’ubuzima kuva ku ikoranabuhanga, umuco, siporo n’ibindi bijyanye n’icyerekezo cy’Isi.

Le Petit Robert igizwe n’amagambo yose hamwe 300 000, aho amagambo yakuwe (citations) 35 000, impuzanyito n’imbusane 150 000, inkomoko y’amagambo (etymologies) 75 000.

Iyi nkoranyamagambo y’amapaji 2 880, ipima ibilo 2,24, izasohoka ku wa 16 Gicurasi 2019. Izaba icuruzwa 62,50 €.

Le Petit Robert Edition 2020, irimo imvugo zikoreshwa mu Isi ya none, mu kazi n’ahandi, uko zisomwa n’ibisobanuro byazo.

Amwe mu magambo mashya yinjijwe mu nkoranyamagambo n’ibisobanuro byayo:
- Jober: Gukora akazi cyangwa ikiraka cy’umunsi

- Millénial: Umuntu wakuze ahagana mu myaka ya 2000

- Coworking: Gukorana akazi n’abanyamwuga bigenga

- Infox: Amakuru y’impuha cyanga yifitemo kubogama agamije kuyobya abayahabwa

- Cyberharcèlement: Ihohoterwa rikozwe hifashishijwe ikoranabuhanga by’umwihariko ku mbuga nkoranyambaga

- Agrobusiness: Ibikorwa bigamije kuzamura ubukungu, bifitanye isano n’ubuhinzi no kwihaza mu biribwa

Amagambo akoreshwa mu Gifaransa akunda guhindurwa bitewe n’iterambere n’imibereho myiza y’abaturage. Mu Ukwakira 2018, Komisiyo ishinzwe Iterambere ry’Igifaransa yemeje ko ijambo “Infox” rizajya ryifashishwa mu kugaragaza amakuru y’impuha.

Ijambo ‘‘Fake News’’ rikomoka mu Cyongereza ariko ryanakoreshwaga n’abavuga Igifaransa. Rikoreshwa hagaragazwa amakuru y’impuha yatangajwe cyangwa abogamye.

Igifuniko cy'inkoranyamagambo ya Petit Robert cyashushanyijwe n'umunyabugeni akaba n'umwanditsi Riad Sattouf
Le Petit Robert izasohoka ku wa 16 Gicurasi 2019
Nyuma y'inkoranyamagambo ya La Rousse, iya Le Petit Robert na yo yatangaje amagambo mashya yongerewe mu Rurimi rw'Igifaransa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Yewe yewe Rmld 2019-05-15 06:13:29

Nonese kombona harimo amagambo narinsanzwe nkoresha ubwo naba naravumbuye kera rero nange.urugero:agrobusiness narinsanzwe ndikoresha cyane ,naryigishijwe n’a engenieur Kwisanga Norbert.

Kwamamaza