IGIHE

Rutangarwamaboko yakoze umuhango gakondo wo gutura Umuganura abakuru (Amafoto)

15 10-08-2019 - saa 17:35, Uwiduhaye Theos

Umupfumu Rutangarwamaboko Modeste Nzayisenga n’umugore we Umuziranenge Sana Cynthia, bakoze ibirori bifite ishusho y’uko byagendaga hambere mu gutura ababyeyi umuganura.

Umuganura ni Umuhango ukomeye mu mateka y’u Rwanda rwo hambere ari nacyo cyatumye Leta y’Ubumwe bw’Abanyarwanda iwugarura ndetse ikawushyiriraho itegeko riwuha imbaraga ku buryo ku munsi wo kuwizihiza mu gihugu hose haba hari ikiruhuko.

Uyu munsi mukuru udasanzwe ushushanya ubumwe bw’Abanyarwanda. Ni umuhango wizihizwa buri wa gatanu wa mbere w’ukwezi kwa Kanama buri mwaka.

Mu 1925 ubwo ubukoloni bwazaga mu Rwanda nibwo umuganura wacitse, leta zikurikiyeho ntizabiha imbaraga, leta y’ubumwe bw’abanyarwanda irangajwe imbere na Paul Kagame niyo yongeye kuwugarura.

Rutangarwamaboko yakoze ibidasanzwe mu Bibungo bya Mukinga, mu Murenge wa Nyamiyaga, mu Karere ka Kamonyi ho mu Ntara y’Amajyepfo aho avuka ahakorera ibirori byo gutura umuganura ababyeyi bitungura benshi ku gasozi kose k’iwabo.

Rutangarwamaboko yabwiye IGIHE ko ibi yakoze ari ukugarura umuco wabagaho kera mu muganura abana bagatura ababyeyi babo.

Ati “Ni ukugarura umuco wa kera mu muganura aho abana baturaga umuganura ababyeyi babo nk’ikimenyetso cyo gushima imbuto n’imigisha babahaye, noneho ababyeyi bakawubasangiza.”

Agaya benshi mu rubyiruko bamara gukura bakajya kwiga mu mahanga cyangwa se kuba i Kigali ababyeyi babo ntibongere kubaca n’irihumye bakazapfa bikubye kandi barabyaye.

Mu byo uyu muryango mugari wa Rutangarwamaboko waganuye harimo umusaruro mwiza w’umwe mu bana bavuka muri uyu muryango wari wasoje icyiciro cya kabiri cya kaminuza witwa Uwase Niyonigenera Clenie wanakoze ubushakashatsi bwashimwe na benshi kuko yatangije uburyo bw’ikoranabuhanga buzajya butuma abantu badatonda umurongo ku bitaro bishyura nk’uko byagendaga ahubwo bigakorwa mu kanya gato kuri telefoni.

Umuganura wo hambere

Mu muco nyarwanda ukiri umwimerere utarinjirirwa n’ibyateye, ababyeyi iyo babyaraga abana barabareraga bakabakuza, bakazanabubakira nabo bakaba abantu bakuru. Mu kububakira rero babahaga imbuto nkuru z’u Rwanda mu gihe babatekeshaga zirimo; uburo, Amasaka, Isogi n’Inzuzi.”

Bababatongeraga babatuka imigisha bati “Bana bacu dore imbuto tubahaye muzabibe mweze, muzatunge mutunganirwe, muzabyare muheke, muzagire ubugiri n’ubugwiza maze namwe muzabone ibyo mutanga nk’uko namwe mubihawe”.

Abana rero iyo bamaraga kubaka bakaremya, bakabyara bagaheka, bagahinga bakeza, bagahaha bakaronka, ntabwo barekeraga aho gusa ahubwo mu mpera za buri mwaka w’Umuganura wa Kinyarwanda, bazirikanaga ikintu gikomeye bakorewe gitumye bariho.

Bakazirikana isoko baturukamo, bakibuka abakuru maze bakegeranya imitwa n’abana n’inshuti n’abandi b’umuryango buri wese aho atuye bagahurira ku mubyeyi wabo mukuru bamutuye amature y’ishimwe ko imigisha yabatutse yinononsoye, ko baje gushimira kubaho kwabo n’uburere buruta ubuvuke bahawe, ko baje kuzirikana ko bafite aho bakomoka ndetse ko Abakuru batariho nabo batabaho.

Bagatura ababyeyi ayo mature agizwe na za mbuto nkuru, bagatura amata n’inzoga z’uburyo butandukanye cyane ikigage nk’amazi y’amasaka, bagatura amafu y’amasaka n’uburo maze bagasusurutsa ababyeyi batyo urugo ntirwigunge ngo n’uko abana barushizemo kuko bakuze bakubakirwa ingo zabo ahubwo bagahora iteka bashishira ababahaye kubaho, ibyo rero bikaba ariwo mugenzo witwaga ‘Gutura Umuganura’ mu muhango w’Umuganura.

Iyo abana bamaraga gutura ababyeyi ayo mature, ababyeyi nabo bafataga kuri ya fu bakavugira umutsima abana bakabazimanira n’ibyo kunywa cyane amata n’ikigage bikaba ari byo byitwa Gutanga Umuganura.

Abana baturaga umuganura abakuru, abakuru nabo bakawutanga bakawusangiza abana n’inshuti n’abaturanyi b’umuryango bikaba ari ikimenyetso cyiza cyasigasiraga ubumwe bw’umuryango ntutatane, ntugire amakimbirane kandi yanaza bakayacoca kuko abasangiye batarasana.

Ubwo kandi ababyeyi bakongera kubaha imbuto bazabiba ubutaha no kongera kubahesha imigisha y’Imana y’i Rwanda ngo bazahorane ishya n’ihirwe nabwo bazongere babone ibibatungisha n’ibyo batura nabo bagatanga bagatungisha abandi no gutura abakuru babatungishije kuko ngo indinda ari ebyiri mu muco nyarwanda: Ndinda Dawe na Ndinda mwana.

Rubanda narwo rwaturaga umuganura abatware nabo bakawutura Umwami nawe akabona akaganuza rubanda, ko ari nako abana batura umuganura ababyeyi nabo bakabona bakabaganuza. Ibi bikaba ikimenyetso gikomeye ko Igihugu cyawe kiguha ibyo wagihaye.

Rutangarwamaboko asanzwe ari umushakashatsi, umwigisha w’ubuzima bushingiye ku muco akaba n’inzobere mu by’umuco, amateka, imbonezabitekerezo (Filosofiya) n’ubuzima bwa muntu bushingiye ku myizerere, imyumvire, imitekerereze, imyitwarire ndetse n’imigirire.

Ni nawe watangije kandi akaba n’Umuyobozi Mukuru w’Ikigo Nyarwanda cy’Ubuzima Bushingiye Ku Muco, Kigamije Iterambere ry’Igihugu rishingiye ku muco biturutse mu bushakashatsi yakoze ku muco n’ubuzima ubwo yasozaga kaminuza.

Umwaka ushize nabwo yakoze ibirori bimeze nk’uko byagendaga hambere mu gusohora umwana no kumwita amazina.

Ubwo yitaga izina umwana we w’umukobwa bamwita w’imfura ye yise ‘Rutangarwamaboko Umugiramana’ mu gushimangira ko afite amahirwe n’imigisha ikomeye ku bwo kuba yaravukiye mu Rwanda.

Abagore n'abakobwa bari bateruye ibyansi
Abana bato basangiye umuganura w'ibyaturutse ku mirimo ya Rutangarwamaboko
Abo mu muryango wa Rutangarwamaboko n'abandi bari bitabiriye iki gikorwa
Abo mu rusisiro bose bari bitabiriye ibi birori bidasanzwe
Bikoreye ibibindi bagiye gutura umuganura ababyeyi
Hakaswe umutsima hishimirwa umusaruro w'imirimo y'amaboko ya Rutarwamaboko
Ab'igitsinagore kikoreye inkangara abagabo bikorera ibibindi
Nyuma y'uyu muhango habaye ibirori byo gususurutsa urugo rw'iwabo wa Rutangarwamaboko
Rutangarwamaboko nabo bari baturukanye i Kigali baparitse imodoka barangije bagenda urugendo n'amaguru bagiye gutura umuganura ababyeyi be
Rutangarwamaboko n'umugore we bakata umutsima
Rutangarwamaboko n'umugore we bakoze umuhango utari usanzwe umenyerewe
Umunezero wari wose iwabo wa Rutangarwamaboko
Umuryango mugari wa Rutangarwamaboko mu byo waganuye harimo umusaruro mwiza w’umwe mu bana bavuka muri uyu muryango wari wasoje icyiciro cya kabiri cya kaminuza witwa Uwase Niyonigenera Clenie
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Eemm 2019-08-22 03:43:35

isi yabaye igihindugembe. none se nubwo uwo muco wa kera warimo ibibi binyurana n’ijambo ry’Imana nk’ubupfumu n’ibindi, tubaye tubyirengagije , wanabagamo imisatsi y’abo kwa Bob Marley? mutubarize abariho kuko Rutanga we si mukuru cyane.

2
Mukunzi 2019-08-13 09:49:33

muvandimwe Rwema wasebeje izina ryawe rwose kuko watutse ibyo utazi kdi ukigaragaza nabi mu gitaramo cy’umuganura mwiza wa Benimana Muganga Rutangarwamaboko yatugaruriye mu muryango atwigisha gutura abakuru umuganura. naho ibyo wise urusatsi utazi ni umusatsi kdi mwiza abawuzi dushima ndetse cyane kuko yadusubanuriye ko ari ikimenyetso cy’amasunzu y’aba kera ariko we yahisemo gutega mu mwimerere wayo atogoshe kuko mu bushakashatsi yakoze asoza kaminuza yagaragaje kogosha ukageza ku mutwe byangiza uruhu ndetse akanabigaragaza yivura we ubwe, binyuze mubyavuye muri ubwo bushakashatsi, imiburu n’ibiheri yagiraga mu maso no mu mpera z’umusatsi hamwe bacongera iyo bamwogoshaga. Ibi njye yigeze no kubivugira kuri televiziyo Rwanda mwirebera n’amaso yanjye ubwo bari bamutumiye. ubwose muvandimwe wowe wiyogoshesha byaba bikugejeje kuki kdi byunguye iki abanyarwanda...? aha nkavuga ko igikomeye atari ukutogosha cg kogosha ahubwo impamvu yabyo n’icyo bimariye abantu. ntukongere rero gutuka iby’utazi muvandimwe.

3
Kawera 2019-08-13 09:21:25

Murakoze cyane Muganga Rutangarwamaboko kubw’iki gikorwa kiza mwagaruye kdi rwose benshi kiradukebuye nk’abanyarwanda cyane ababa hanze no mu mijyi nka kigali kuko kenshi turibagirwa ukaba wagirango niho twavukiye. ndasaba ibintu bibiri:
1. abumva bakunze umuco tbagane tubashyigikire muganga kubikorwa mwatangiye ntibizacike intege ahubwo birusheho kwaguka kuko bisigasira umuco wacu warugiye kuzima. Igihe mwaduha nomero twaboneraho muganga ubwe cg bitakunda mukaduha iza kiriya kigo yatangije tukamenya uko twabageraho tukabunganira n’abakeneye kwivuza bakabagana kuko bigaragara ko ibyo bakora bifatika kdi bishingiye ku bushakashatsi nk’uko nabibonye mu nkuru.
2. Minisiteri y’umuco ikwiye kuba ifite imikoranire n’uyu mugabo Rutangarwamaboko n’ikigo yatangije cy’ubuzima bw’umuco nyarwanda na za gahunda nziza tujya tubona za ’Rwanda Day’ bakadufasha bakatuzanira umwigisha w’umuco nk’uyu wanabikozeho ubushakashatsi kdi bigatanga umusaruro twese tubona kuko nibaza ko byagira umumaro kurushaho cyane ko bakora akazi kagaragara ko kakunganira minisiteri y’umuco n’Igihugu ubwacyo mukugarura no gusigasira umuco wacyo kdi abatembereye n’abize twese tuziko umuco ariwo shingiro, utawubakiyeho ntacyo wageraho. Murakoze cyane, Muhorane Imana y’i Rwanda

4
Kawera 2019-08-13 08:45:42

Murakoze cyane Muganga Rutangarwamaboko kubw’iki gikorwa kiza mwagaruye kdi rwose benshi kiradukebuye nk’abanyarwanda cyane ababa hanze no mu mijyi nka kigali kuko kenshi turibagirwa ukaba wagirango niho twavukiye. ndasaba ibintu bibiri:
1. abumva bakunze umuco tbagane tubashyigikire muganga kubikorwa mwatangiye ntibizacike intege ahubwo birusheho kwaguka kuko bisigasira umuco wacu warugiye kuzima. Igihe mwaduha nomero twaboneraho muganga ubwe cg bitakunda mukaduha iza kiriya kigo yatangije tukamenya uko twabageraho tukabunganira n’abakeneye kwivuza bakabagana kuko bigaragara ko ibyo bakora bifatika kdi bishingiye ku bushakashatsi nk’uko nabibonye mu nkuru.
2. Minisiteri y’umuco ikwiye kuba ifite imikoranire n’uyu mugabo Rutangarwamaboko n’ikigo yatangije cy’ubuzima bw’umuco nyarwanda na za gahunda nziza tujya tubona za ’Rwanda Day’ bakadufasha bakatuzanira umwigisha w’umuco nk’uyu wanabikozeho ubushakashatsi kdi bigatanga umusaruro twese tubona kuko nibaza ko byagira umumaro kurushaho cyane ko bakora akazi kagaragara ko kakunganira minisiteri y’umuco n’Igihugu ubwacyo mukugarura no gusigasira umuco wacyo kdi abatembereye n’abize twese tuziko umuco ariwo shingiro, utawubakiyeho ntacyo wageraho. Murakoze cyane, Muhorane Imana y’i Rwanda

5
Innocent 2019-08-12 01:21:32

Umuganura wabagaho le 1/8 nambere ya 1994, wari umunsi w’ikiruhuko sha! Jya ubeshya utwana duto!! Gusa ntibyashyuhaga cyane ariko ndibuka ko abifite baduhaga tukinywera tukanirira inyama!!

6
Banyangriki Wellars 2019-08-11 07:13:15

Uyumuhango warimwiza tweseturebereho Rutangarwamaboko ikigikorwa yakozenikiza cyokuganuza iwabo

7
Banyangriki Wellars 2019-08-11 07:13:12

Uyumuhango warimwiza tweseturebereho Rutangarwamaboko ikigikorwa yakozenikiza cyokuganuza iwabo

8
mubirigi 2019-08-11 01:25:33

Nibyiza gusigasira umuco ariko ibyo akora aba arimo gutoza bagenzi be bafite ababyeyi bakabirengagiza nkatwe twabijyana he ajye ahwitura bagenzi be bigize abasirimu bakanga kureba abababyaye hariho nabavuga ko ntabo bagira ubundi bakaza baje kubashyingura

9
Gis 2019-08-10 21:45:54

Byari byiza ariko mbonye mubyo barikurya higanjemo amafiriti menshi kandi ataribiryo bya Kinyarwanda

10
Habineza 2019-08-10 18:51:35

Harya úyu ngo ni umupfumu???Ubu se yibutse gutereka ikigara???

Paji: 1 | 2  

Kwamamaza