IGIHE

Inkomoko y’Insigamugani:Yishyize intorezo ku gakanu!

0 1-07-2019 - saa 13:26, Nsanzabera Jean de Dieu

Uyu mugani bawuca iyo bumvise umuntu wagushije ishyano yisengeye ni bwo bamunenera, bavuga ngo “Yishyize intorezo ku gakanu reka yumve!”.

Wavuye kuri Nzigiye ya Rwishyura w’i Mukarange (Byumba); ahagana mu mwaka w’i 1900, ubwo yacererezaga Rutaburingoga rwa Ndungutse kuri Rwabugili, kuko yari yaricishije Nyantaba wari umwiru ukomeye ku ngoma ya Mutara Rwogera.

Mutara Rwogera yamaze kurwara igituntu abwira abiru ko ingoma ye ayiraze Kigeri Rwabugili, abwira umwiru Nyantaba ko ari we mutabazi w’inka z’u Rwanda; amubwira ko azajya gushingura icumu rya Gahaya umwami w’i Ndorwa akagwayo, nawe Rwabugili asiga amugize umutabazi w‘igihugu wa bucengeri; akazatabara i Burundi akurikije Gihana cya Cyirima Rujugira.

Ubwo Rwogera amaze gutanga, Nyantaba yasigaye abangikanye na Rutaburingoga rwa Ndungutse nawe w’umwiru. Ubwiru bwa Nyantaba bwakomokaga kuri Nyiramuhanda wabaye umucengeri ku ngoma ya Gahindiro.

Bukeye rero Rwabugili abaza Nyantaba ubwiru. Nyantaba aramuhakanira ati “Ndakuzi nta two nakubwira ubwiru bwa Rwogera kuko wabwandarika ukabibwira rubanda n’abatwa.”

Amaze kumwangira, Rwabugili abwira Rutaburingoga uko Nyantaba yamubwiye. Rutaburingoga aramusubiza, ati “Mbese wamubarizaga iki ubwo bwiru bw’abashi bwavuye he?» Icyatumye Rutaburingoga avuga atyo ni uko Nyiramuhanda yari umunyagano wavuye i Bunyabungo. Ubwo Rwabugili ahera ko anyaga Nyantaba; arakena cyane hamwe na bene wabo.

Bamaze gukena batuka Nyantaba bati “Ubwo bwiru ugundiriye wabumubwiye ko ari ubwabo aho kugira ngo turinde gupfa uru rupfu.” Nyantaba arabahakanira ati “Ntabwo najya kwandarika ubwiru bwa nyarubuga; mbubwira kiriya kirara yamara gusinda akabubwira abatware na rubanda”.

Bakomeje gukena, bene wabo bose baramutera; bati “Wa cyontazi we wabwiye Rwabugili ubwiru bwabo ntiturinde gupfa uru rupfu”. Bamaze kumugondoza baramuganza aremera; arahaguruka asanga Rwabugili mu rya Gisegenya muri Nshiri (Gikongoro) akoma yombi barasuhuzanya. Nyantaba ati “Shaka umwanya tubonane nta muntu n’umwe turi kumwe ndetse nta n’inyoni ihatamba”.

Rwabugili abyumvise arishima kuko agiye kubwirwa ubwiru. Babwira abanyagihe baheza abantu bose ntihagira usigara mu rugo; bose bajya ku karubanda. Nyantaba na Rwabugili basigara mu rugo. Nyantaba ati “Nazanywe no kukubwira ubwiru ariko ndabukubwirira ahagaragara ejo utazava aho uvuga ko hari umuntu watwumvirije bimaze kwandagara muri rubanda.”

Aratangira ati “Inyarubuga yasize ambwiye ko turi abami twembi, njye ndi umutabazi w’inka, naho wowe uri umutabazi w’u Rwanda. Jye nzajya i Ndorwa kwa Gahaya nshingure icumu rye ngweyo; nkaba ntabariye inka z’u Rwanda ntizizashire, naho wowe uzajya i Burundi guhangura Gihana ukazagwayo.”

Rwabugili yumvise amagambo Nyantaba amubwiye aramubabaza, batandukana nta cyo ashubije. Nyantaba arabibona ku mutima ati “Ndarikoze”.

Rwabugiii asubira mu nzu, Nyantaba na we yigira ku kiraro. Rwabugiii arihezura yambara imyambaro ya cyami, araboneza no ku karubanda, ahasanga abatware na rubanda; ahagarara hagati yabo arangurura ijwi, ati “Rubanda rw’umwami ubu ndi mu rugero ki?” Bati “Uri umusore w’akeza mu Rwanda.”

Arongera ati “Ubu se nsa nte?” Rubanda batera hejuru bati “Usa n’umwami gusa”. Arongera ati “Ubu se uwavuga ko nkwiye gupfa we yaba akwiye iki?” Rubanda bati “ Aragapfa ari we! Aragapfa, aragapfusha nta kindi”.

Ubwo inkuru iba iragiye igera ku kiraro cya Nyantaba; bamubwira amagambo Rwabugili yabwiye rubanda. Nyantaba amenya ko ariwe yavugaga; na we ararimba asanga Rwabugili, amujyana ukwe; ati “Sinakurahiye ko nindamuka nkubwiye ubwiru uzabwandarika”, ati “Undi wakubwiye ko ukwiye gupfa utari jye ni nde?”

Yungamo ati “Ndabizi uzanyica nta kabuza, ariko dore ubu niraburiye umukecuru wanjye, uzabe uretse nere, maze nimara kwera uzabone kunyica, kuko unyishe neze ariho nibura mwazagira agaka muhonora.”

Rwabugiii ateranya abiru ababwira uko Nyantaba yamubwiye; bose baratangara barumirwa. Rutaburingoga yongera kuvuga rya jambo rya mbere, ati “Mbese ubwo bwiru bwo kwa Nyiramuhanda bwaturutse he?”

Nuko Nyantaba asezera kuri Rwabugiii arataha ajya kwerera nyina. Amaze kwera Rwabugiii aramutumira, aramutanga bamujyana i Bugesera mu rwa Bayanga (Nkondo) bamurohamo, ni kwo bicaga abiru n’ibikomangoma.

Nyantaba amaze gupfa, Rutaburingoga asigara ari we mwiru ukomeye i bwami wenyine. Noneho baba bamubajije ubwiru bukomeye, ati “Ibyo byari bizi Nyantaba”.

Abivuze atyo iminsi, Nzigiye ya Rwishyura aramubwira, ati “Kandi ga Ntwari y’inyatanyi wenze intorezo uyishyira ku gakanu! harya Nyantaba yazira amaseke?”, Ubwo yibutsaga Rwabugiii ko Rutaburingoga ari we wamwicishije avuga ko atazi ubwiru, nyuma yamara gupfa icyo bamubajije ati “Cyari kizi Nyantaba”.

Haciyeho iminsi, babonye muryamo yaciye ibintu mu nka baramutanga. Ibyari byanyazwe Nyantaba babikomorera umuhungu we Kampayana. Nawe Nyirayuhi amaze kumutanga babiha murumuna we Kayijuka. Aho Nyirayuhi amumeneye amaso na we, bigabanwa na Rwamanywa rwa Mirimo. Abivuyemo bigabanwa na Sebagangari ba Runanira, aba umutware wa Nyaruguru n’Ubwerimana.

Nuko rubanda babonye Rutaburingoga atanzwe n’uko ariwe wisambuye nk’inopfu, bati “Uwiyishe ntaririrwa yishyize intorezo ku gakanu reka yumve”.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza