IGIHE

Inkomoko y’Insigamugani “Umugizi wa neza si we uyigarurirwa”

3 10-06-2019 - saa 11:53, Nsanzabera Jean de Dieu

Uyu mugani bawuca iyo babonye umuntu wihebeye undi akamugirira neza bitavugwa, ariko we yajya kumwitura akarenga akamwitura nabi, ni bwo bimyoza bagira bati “Koko umugizi wa neza si we wayigaruriwe”.

Wakomotse kuri Rwampembwe i Buhoro bwa Reramacu h’i Musambira mu Nduga, abonye ahemukiwe na Nyamudede yagarukiye akamwimana ku rugamba rugeze mu mahina; ahagana mu mwaka w’i 1900.

Rugeramibungo na Nyamudede, bombi bari Abashakamba bakaba n’intwari. Icyakora ntibumvikanaga ariko babikoraga bigwendetse ntiberure kuko Abashakamba batakundaga kwangana gitindi.

Nyamara byageze aho Nyamudede we abyerekana, ubwo Rwabugili yateraga i Gikore cy’Abarihira muri Kigezi. Muri icyo gitero, Rugeramibungo yagiriye Nyamudede akamaro kanini cyane.

Nyamidede yarakomeretse cyane, undi yemera guhara amagara kandi basanzwe batabana bihagije,nyamara Nyamudede ntiyanyurwa, ahubwo inyiturano iba kumwambura iminyago anamusabira ko inka ze zinyagwa.

Bamaze gutabaruka, Rwampembwe yabwiye Abashakamba, ati “Mugendere hamwe mwese tuzarinda tugera i Buhoro, maze tuziyereke Rwabugili tukiri kuri gahunda abandi batazadutanga umwanya w’imbere”.

Yarabihanangirije cyane ababwira ko uzarenga kuri iryo tegeko azabihanirwa bikomeye. Bashyira nzira baratabaruka. Rugeramibungo arengaho yinyurira iwe yibwira ko aharara bwacya akajya mu bandi Rwampembwe atarabimenya.

Ageze iwe asanga hari urusizi rw’amayoga y’impisho kuko bari baratumye ko batabarutse. Amayoga ayarara inkera aramukana intege nke yirirwa yiryamiye. Aho abyukiye arongera bituma arara ubwa kabiri. Iryo joro Rwampembwe aramubaza aramubura, aramurakarira.

Bukeye ingabo zitaha i Buhoro bwa Reramacu. Rugeramibungo arabura. Rwampembwe yibaza icyo yabaye biramuyobera. Abiganyira Nyamudede “Kandi kugira ngo ncyure ingabo Rugeramibungo atarimo birababaje.” Nyamudede aba abonye uburyo bwo kurega Rugeramibungo.

Abwira Rwampembwe, ati “Jyana ingabo ibwami uzereke nyirazo utazakerererwa bikakubera icyaha; naho ibya Rugeramibungo byo mbizi neza ndabikubwira”, ati “Ntateze kuza yarakwanze, ndetse n’inka ze nyinshi zimaze kugera mu Nkore, izindi yazihishe muri babyara be bene Badahakana mu Baha; Hasigaye izigera kuri 30 zo kugukinga mu maso, nazo kandi ziraye ziri bwambuke hamwe n’abana be.”

Rwampembwe abyumvise arababara cyane. Abaza Nyamudede ati “Ese ngo namutwaye iki gituma anyanga?” undi ati “Rwabugili ni we wamureheje amwoshya gucika nyuma akazamutumira akaza akamwihakira kuko wowe wamufashe nabi.”

Rwampembwe arabyemera kuko yari abibwiwe n’umutoni. Nyamudede aboneraho, ati “Mbese nyagutunga ntiwanyihera utwo dusigaye n’ubwatsi nkabwiragirira uduka twanjye ?” Rwampembwe ati “Ndabiguhaye” Nyamudede ati “Ese nabibona gute?” Rwampembwe ati “Uzamutere umunyage”, Nyamudede, ati “Namutera nte ko ntamurusha ubugabo simurushe n’inshuti ?”

Nyamudede arakomeza ati “Umutumire kuko atazi ko yamenye iby’uko yakwanze, maze uzamufate umubohe nanjye mucukure inka ariko ari ku ngoyi.”

Rwampembwe arabyemera, yohereza intumwa kuri Rugeramibungo ngo naze yitabe. Intumwa ikigenda ihurira na we mu nzira yari aje; irabimubwira, Rugeramibungo ati “Ni amahoro se ?” undi ati “Baragutegereje ubuze bakuntumaho ngo wakerereje ingabo ntizajya kwiyereka umwami bitararombera.” Iyo ntumwa yari inshuti ya Nyamudede; ni cyo cyatumye itamubwira ukuri, kuko yatekerezaga iti “Namubwira ko atumirijwe kubohwa yakwisubirira inyuma agacika”.

Nuko Rugeramibungo amujya imbere baragenda ariko atangira kugira ubwoba. Bageze i Buhoro kwa Rwampembwe, inshuti za Rugeramibungo zirabimusobanurira neza kuko byari bimaze kumenyekana. Bamujyana ku kiraro baramufungurira bagaruka kwa Rwampembwe.

Aho Rwampembwe aviriye mu rugo, Rugeramibungo aramusanga ngo amusuhuze. Undi amubonye aramurakarira arabisha! Na we arihangana aramusuhuza. Undi aramwihorera. Bugorobye bacana umuriro ikambere. Rwampembwe ahamagaza inzoga ebyiri: iy’Inyambo n’iy’Imbungiramihigo, bose bari imitwe mirumuna y’Abashakamba.

Bamaze kuzisogongera, Rwampembwe abwira abazifata. Umwe afatira Inyambo, undi afatira Imbungiramihigo. Bose bamaze gusoma hatangira inkera y’imihigo. Abaririmbyi batangira kuririmba ingabo, baririmba uwa mbere. Yagombaga kuba Rugeramihigo. Bagaca kuri Rugeramihigo bakaririmba abandi. Uko Rwampembwe yabongoreye.

Bagejeje ku bantu bane, ab’inshuti za Rugeramihigo baramubwira bati “Nibongera kuririmba uhaguruke uhige, naho n’udahiga muri bene ubwo buryo nturi buhige kuko wanzwe; kandi uraba wiyemeje icyaha warezwe”. Undi arabyemera. Bongera kuririmba uwa gatanu, Rugeramibungo aranamiza; ati “

“Ndi inkeragutabara ya Rutishisha”
Ndi umusore w’ishema sinshoboka ku nkomeri;
Ndi inkaka ikabura iminega!
Iyo numvise induru sinikandagira nk’inkenzi
Ndikabura nkagenda imbere
Abari intwari bakirasana ntuwuzira!
Ati “Ndi umugabo utera ababisha ubwoba
Wa Rutajomwa, ndi Umushakamba rwose!
Abatwara inyamusozi narabakumiriye:
Rugarama rwa Gikore nimanye Ruhambanacyuma
Mwima Abahirika, mwima Abinika,
Mwima n’ihururu iturutse kwa Nyakamwe;
Bose baje ari abahizi ndabarahira
Ko ntimuharitswa n’imyambi
Ari Inyambo ndi twarabyirukanye!”

Ati “Niciye ku ibuga rya Kigina
Niciye ku ibuga rya Runyinya hakiri i Ndorwa.
Niciye ku irebero ry’Abakwiye,
Niciye ku ibare kwa Rukomo
Niciye ku irembo kwa Mugeni
Niciye ku Nyanja y’i Bukimbili
Kigeli yatabaye nijoro
Gakuba ka Bihaningabo,
Karekezi ka Mutuganyi
Inyambo twateye i Murambi
Mu nunga z’i Bumpaka umwami yimiriye ingabo
Niciye ku Kavumu k’inyana ka Bangiro
Ku Kavumu k’i Nduga ibwami bandore
Kuri Ndago nimugoroba,
Mu Gashanga hamwe na Tanza,
Mu mbuga za Mihanda
Kuri Ndago induru yanze guhora,
Mu Gashanga hamwe na Tanza mu mbuga za Mihanda.
Umuhima w’ibisage twavunnye Ingangurarugo
Umuhima w’uruhu rwera twakurikiye Uruhitambazi!

Arangije kuvuga ababisha yishe akoma mu mashyi abwira Rwampembwe, ati “Ndi umugabo kandi ndi umuyoboke!”

Rwampembwe aramubaza ati “Harya uwo numvise wimye Abahirika ukamwima Abinika, ukamwima ihururu riturutse kwa Nyakamwe, bose baje ari abahizi ukabarahira yuko utamuharishwa n’imyambi ari Inyambo ni nde?”
Rugeramibungo ati “Ni Nyamudede Ruhambanacyuma”.

Rwampembwe ahindukirana Nyamudede ati “Ni koko Nyamudede?”

Nyamudede ati “Ni koko mba nkuroga ntakubeshya”. Rwampembwe ati “Cyose Nyamudede… ! koko Rugeramibungo yahaze amagara ye agira ngo akize ayawe, none uramusabira inka ze ngo uzitunge we abe umutindi ?” arakomeza ati “Umugizi wa neza siwe uyigirirwa.”

Arongera ati “Rugeramibu, Nguhaye inka za Nyamudede”. Abari aho bamukurira ubwatsi, ariko basabira Nyamudede imbabazi. Arazimuha ariko amuca inka 60 z’imbyeyi zo guha Rugeramibungo. Abari aho batanga injyishywa zabo habura imwe. Rugeramibungo atanga iye arayimuguriza ziruzura. Baziha Rugeramibungo arazishima; ariko azisubiza bene zo, ati “Ni zo zibatunze nimuzijyane niziteka muzabone kuzimpa.”

Nuko Rugeramibungo akira ikinyago atyo, kandi barabunga ntibongera kwangana. Ni aho rero bendeye uyu mugani baca iyo babonye umuntu wagiriye undi ineza itavugwa, ariko bikarenga we akamwitura inabi; ni bwo bimyoza bagira bati “Umugizi wa neza si we uyigarurirwa !”.

Uyu mugani bawuca iyo babonye umuntu wihebeye undi akamugirira neza bitavugwa, ariko we yajya kumwitura akarenga akamwitura nabi,
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
J 2019-06-10 17:29:49

Inkuru nk’ izi umuntu yazikura he ko nzikunda

2
Rwabugili 2019-06-10 12:05:33

Ariko bavuga umugizi wa nabi? Iwacu tuvuga umugiranabi, cyangwa se umugizi wa neza? Iwacu tuvuga umugiraneza, ni ikimenyimenyi hari abantu Bitwa na Mugiraneza, sindumva uwitwa mugiziwaneza.

3
Bf 2019-06-10 06:11:53

Mbega inkuru nziza,urumwandi wumuhanga.izi nkuru ndazikinda.abantu bakera bari imfura.

Kwamamaza