Ibibazo by’ingutu bibangamiye imihango yo gushyingura muri iki gihe

24 11-07-2018 - saa 07:57, Ferdinand Maniraguha

Inteko Nyarwanda n’Ururimi n’Umuco (RALC) igiye kumurika ubushakashatsi imaze iminsi ikora ku bibangamiye umuhango wo gushyingura muri iki igihe n’ibyakorwa kugira ngo bikosoke.

Ubu bushakashatsi bwatangiye gukorwa muri Mutarama 2018, bwakorewe mu bice bitandukanye by’igihugu.

Umuyobozi ushinzwe Ishami ry’Umuco muri RALC, Dr Nzabonimpa Jacques, yatangarije IGIHE ko bajya gukora ubushakashatsi byaturutse ku makuru menshi bahabwaga y’uko gushyingura muri iki gihe bihenze kandi bigoranye ndetse ko hari bamwe bibera umusaraba.

Mu 2013 hatowe itegeko ryemerera ababishaka kujya batwika umurambo w’uwabo witabye Imana hakabikwa ivu, byari byitezwe ko iri tegeko rizafasha igihugu mu kurondoreza ubutaka butwarwa no gushyinguraho ariko bisa n’aho ntacyo byatanze kubera ko nta bagaragaje kubyitabira nubwo n’ibyuma byifashishwa mu gutwika imirambo bitaraboneka.

Kubera guhenda kw’ibigenda mu gushyingura, hari abarwaza abantu babo bamara kwitaba Imana bakabasiga mu bitaro ngo bizirwarize mu kubashyingura.

Dr Nzabonimpa avuga ko ikibazo cy’ibanze cy’ingutu basanze mu baturage ari amarimbi adahagije, n’ahari amwe akaba ari kure cyane.

Yagize ati “Icya mbere ni amarimbi adahagije, aho usanga mu byaro abaturage bakora urugendo rurerure, ugasanga nk’imirenge ibiri, cyangwa itatu ifite irimbi rimwe kandi naho usanga harangira vuba. Ikindi kibazo twabonye ni uko n’amarimbi ahari akoreshwa nabi, ugasanga uburyo akoreshejwe bitayafasha kumara igihe kirekire.”

Guhenda kw’amarimbi n’ibyifashishwa mu gushyingura Nzabonimpa avuga ko nabyo byagaragajwe nk’ibibangamye.

Urugero nko mu irimbi rya Rusororo, imva ya make iri ku 15 000 Frw mu gihe ihenze irenza 700 000 Frw. Aha hiyongeraho n’ibindi bikoreshwa mu gushyingura kuri ubu nk’amasanduka, ibyambikwa umurambo, ibigenda mu gukaraba, imyenda y’abo mu muryango n’ibindi.

RALC ivuga ko imyinshi muri iyo mico yinjiye mu gushyingura ari iyavuye mu mahanga ku buryo yatumye byongera igiciro.

Nzabonimpa ati “Hari ugushaka kwigana abanyamahanga bashyingura mu bintu bidasanzwe. Ugasanga umuntu bamushyinguye mu kintu yakundaga, amasanduku adasanzwe, isanduku ihagaze hafi miliyoni.”

Yavuze ko hari uburyo byagakwiye kujya bikorwamo ntibihende, atanga urugero rw’uburyo abayisilamu bashyingura abayoboke babo bitabye Imana, aho umurambo ushyingurwa nta bintu byinshi bikoreshejwe.

Ati “Ntibivanaho ko wa muntu aherekejwe neza kandi aherekejwe n’abe. Ntibivanaho ko inshuti n’abavandimwe bari buze ku bitekereza. Ni imyumvire gusa.”

RALC igaragaza ko imihango yo gushyingura yatangiye kwinjirirwa n’imico y’amahanga ku mwaduko w’abakoloni, by’umwihariko ubwo amadini ya mbere yatangiraga kuza mu Rwanda.

Nzabonimpa yabwiye IGIHE ko icyo gihe bamwe mu bayoboke babwirwaga ko nibabatizwa cyangwa ngo bagashyingurwa mu marimbi rusange ari bwo bazajya mu ijuru.

Ati “Bababwiraga ko upfuye yabatijwe akanahambwa mu irimbi rya misiyoni ajya mu ijuru. Byatumaga haza abantu benshi. Ibyo by’ivangamuco byatangiye icyo gihe, ubu byageze aho bifata indi ntera kubera ubuhanga n’ikoranabuhanga.”

Ibyo abaturage bifuza

Mu Rwanda rwo ha mbere uretse umwami n’abandi bantu bakomeye b’ibwami, rubanda rusanzwe rwashyingurwaga mu buryo budakaganye.

Umurambo washyirwaga mu kirago cyangwa ingobyi ku bifite, ugashyingurwa mu mva icukuwe mu gitaka gusa. Ibyo kubakira imva nta byabagaho.

Nzabonimpa avuga ko bimwe mu bitekerezo abaturage batanze ubwo hakorwaga ubushakashatsi ari uko ibyo kubakira imva byavaho kuko bimara ubutaka n’ubikoze agacibwa umusoro.

Ati “Hari abifuza ko ibi bintu byo kubakira imva byavaho kuko bitwara ubutaka. Bagasaba ko n’abashaka kubikora bajya babarihisha imisoro nkuko barihisha inzu zabo.”

Hari abandi bagaragaje ko habaho uburyo bwo gushyingura mu mva rusange, hakaba sosiyete zibishinzwe.

Ati “Bakavuga bati ‘nta buryo abantu bajya bashyingurwa nko mu cyobo kimwe hakajyamo abantu benshi ariko byifashishije ikoranabuhanga. Abantu bakaza bagasezera ku muntu wabo, bamusezereye ahantu hamwe noneho ya sosiyete ishyingura ikubaka icyumba muzajya mumusezereraho, bo baracukuye imva iteganyijwe kuzajyamo nk’imirambo ibihumbi icumi.”

Ubundi buryo bwagaragajwe ni ugushyiraho inzu zo gushyinguramo zizwi nka ‘Catacombe’, aho uko imirambo igenda ubora bayihuriza hamwe ntitware umwanya munini.

Nzabonimpa avuga ko ubu bushakashatsi bushobora kwifashishwa nka kimwe mu bisubizo bigamije gukemura ibibazo byo gushyingura biriho.

RALC ivuga ko ibyavuye muri ubu bushakashatsi bizamurikwa vuba aha nyuma yo guhurizwa mu gitabo kimwe.

Irimbi rya Rusororo rigiye kuzura mbere ho imyaka 10 ku gihe ryateganyirizwaga
Catacombe ni inzu zibikwamo imirambo; zishobora gutangira kwifashishwa mu Rwanda mu gihe kiri imbere
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
patrick 2018-07-12 05:19:41

imashini itwika niyo izabicyemura neza kuko umutungo wigihugu urashirira kubapfu kandi basize imiryango

2
eliab 2018-07-12 03:56:00

@Gatare, ubwo mwumva mutari abatekamutwe iyo mwigisha ijuru na yesu mutazi? Nonese ko uvuga ko hari abazazukira ubugingo buhoraho, kuki ahubwo batabaho nyiteka?

3
eliab 2018-07-12 03:55:54

@Gatare, ubwo mwumva mutari abatekamutwe iyo mwigisha ijuru na yesu mutazi? Nonese ko uvuga ko hari abazazukira ubugingo buhoraho, kuki ahubwo batabaho nyiteka?

4
Mami 2018-07-12 02:48:36

@Analyst. Uri umu conservateur w’amafuti,umuco se ntukura??? Noneho niba ushaka umuco tuzongere twambare ishabure. Nakumvise ubwo uranaterekera. Uri nkuyu ngo ni "M"w’umunyamatiku. Jye ahubwo ndumva uwitwa "G". yazatumirwa mu nteko akazabasobanurira neza uko ibyo bintu bikorwa tukaba ari byo tuzakora.

5
Nina 2018-07-12 02:25:56

Muri ubu bushakashatsi ndabona iyi Catacombe ariyo yakorwa kuko iri smat, naho gutwika umurambo rwose wumva ari agashinyaguro.

6
Umusomyi wa Igihe 2018-07-11 21:26:28

Hahahahaha, zino comments rwose ni rurangiza hari uvuze noneho ngo tubahinge hejuru yewe ga yewe!!
Ndabizi ko twese tuzapfa Ariko izo mpfu za hato na hato zadutse zikaba zimaze no kugwira ni hatagira igikorwa ngo zikumirwe mu gihe gito u Rwanda rwose ruzaba irimbi, ndababwiza ukuri. Njye nawuzantwikira uwanjye.

7
kanakintama 2018-07-11 16:12:12

Buliwese afite uko abyumva, aliko uyu muntu witwa muja duhuje igitekerezo, kuko natwe twashyinguye ababyeyi bacu kera mwisambu, aliko ubu ntiwahamenya.

8
Natal 2018-07-11 13:06:13

Oya rwose ibi biriho nta gahunda. Icyibo cya 2m kigashyirwamo umuntu umwe? Ndibuka tukiba mu camps z’impunzi muri Zaïre uko bashyinguraga. Bafataga umurambo bagashyira aho bakawubakira hejuru yawo undi n’uwundi gutyo gutyo kdi ugasanga bifite gahunda. Ibi nibyo bikwiriye muri iki gihe cg mushobore mubatwike ku tegeko. Ndemeranya n’uwitwa @Innocent rwose.

9
Hakizimana 2018-07-11 10:21:37

1. Tujye dushyingura nk’ababikira b’Abizeramariya i Save. Nibinanira kandi ntibibuza ko bubaha azashyingurwa. Kera ariko hazongera hakoreshwe. Tujye dushyingura mu murima yacu ku bakihafite, ikibazo cyo kubura aho gucukura imva kizoroha cyane. Yezu ati : " yemwe abarushye n’abaremerewe nimunsange nzabaruhura". Ibi byose n’ingaruka zo kwigerekaho imitwaro tudashoboye twigana ahandi, dukwiye kumenya uko tureshya no gushyira mu gaciro.

10
rwamuhungu 2018-07-11 09:30:02

murakoze iki nikibazo gikomeye njye kugiti cyanjye nemera gutwika muzatubalize niba icyuma cyashyizwe imageragere alicyo kizatwika mutubwire naho biyandikishiliza murakoze

Paji: 1 | 2 | 3  

Kwamamaza