IGIHE

Ububiko bw’amateka: Umudugudu wa Nyirabwana wahoze ari igicumbi cy’ingoma y’u Bwanacyambwe

1 2-12-2019 - saa 11:59, Nsanzabera Jean de Dieu

Abantu benshi bakunze kwibaza uko ubutaka bw’u Rwanda bwo mu bice bimwe na bimwe bwari buteye bukiri amashyamba, butaraba igihugu gituwe kandi gihingwa, abandi bagakomeza kwibaza cyane ku bugenge n’ubuhanga bukabije buvugwa ku bami bagenganga ibihugu bw’ibikorwa by’ubuhangange bagezeho kandi nta bikoresho bihambaye bari bafite.

Muri iki gice, tugiye kubatekerereza bimwe mu bimenyetso ndangamateka, bigaragaza imiterere y’imwe mu misozi y’u Rwanda rwo hambere, rutaraturwa ngo rube insinsiro zisakayemo abantu.

Nkuko tubikesha igitabo “Imizi y’u Rwanda’’ n’igitabo “Intwari z’imbanza, zubatse u Rwanda rugahamya igitinyiro’’, byombi dukesha umwanditsi n’umusizi Nsanzabera Jean de Dieu, tugiye gutekerereza hamwe amateka y’umudugudu wa Nyirabwana wo mu Kagali ka Kibagabaga mu Murenge wa Kimironko ho mu Karere ka Gasabo ahahoze ari ingoma ngabe y’igihugu cy’u Bwanacyambwe mu bihe byo hambere.

Hariho nka kimwe mu bimenyetso bibitse amateka akomeye agaragaza imiterere y’igihugu cy’u Bwanacyambwe mbere y’uko gihangwamo igihugu, n’ikimenyetso kigaragaza bene cyo uburyo bakuturanyije bakagitunganya kikaba igihugu kiganje.

Ubu butaka butaraba igihugu cy’u Bwanacyambwe bwari ubutaka bw’imigina n’ibishanga by’imifunzo by’amasanzure y’umugezi wa Nyabugogo n’Akagera, n’ikiyaga cya Mugesera.

Mu bihe byo hambere, igihugu cy’u Bwanacyambwe cyari gikikijwe n’ingoma y’i Gisaka cy’Abagesera b’Abazirankende mu Burasirazuba, Gasabo y’Abanyiginya mu Majyaruguru, Nduga y’Ababanda mu Burengerazuba bw’Amajyepfo, u Buliza bw’Abongera mu Majyaruguru y’u Burengerazuba n’ingoma y’u Bugesera bw’Abahondogo yari mu Majyepfo.

Igihugu cy’u Bwanacyambwe kimwe n’icy’u Buliza, byagengwaga n’Ibikomangoma by’Abongera, bakomoka kuri Mwongera wa Rurenge Sekuruza wabo. Aho cyari giherereye kugeza ubwo aya mateka yandikwaga, ni mu Karere ka Nyarugenge, Akarere ka Kicukiro, Akarere ka Gasabo y’Amajyepfo (Mu Mirenge ya Gisozi, Kinyinya, Kimihurura, Remera na Kimironko) hamwe n’Akarere ka Rwamagana y’Iburengerazuba (Mu mirenge ya Karenge, Nyakariro, Nzige, Muyumbu na Gahengeri).

Amacishirizo y’ihangwa ry’icyo gihugu, akaba agaragaza ko cyahanzwe mu mizo ya mbere y’iyaguka ry’ibihugu byagengwaga n’Abasinga b’Abasangwabutaka, aho cyahanzwe ahasaga mu wa 450, nyuma ya Yezu Kirisitu.

Mu ihangwa ry’igihugu cy’u Bwanacyambwe, ryanzuwe n’umuhungu wa Rurenge witwaga Mwongera n’umugore we w’inkundwakazi Nyirabwanacyambwe, ari na we wakurijweho kwitirirwa icyo gihugu kikitwa’’ u Bwanacyambwe’.

Agasozi gakuru ari nako kabarwa nk’ubutaka gakondo bw’Abongera, kitwaga Nyirabwanacyambwe, niko ubu kabumbye imidugudu ya Nyirabwana, Ramiro, Rindiro na Kageyo yo mu Kagali ka Kibagabaga, mu Murenge wa Kimironko wo mu Karere ka Gasabo. Ingoma ngabe y’Abongera ikaba yari itetse mu Mudugudu wa Nyirabwana ( Nyirabwanacyambwe) wiswe izina ry’impine, aho kuryuzuza ngo witwe ’’Nyirabwanacyambwe".

Nyuma y’imyaka amagana, ingoma ngabe yaje kwimurirwa mu Mudugudu wa Amahoro mu Kagali ka Rukiri II mu Murenge wa Remera wo mu Karere ka Gasabo ko mu Mujyi wa Kigali, ari naho hashyiriweho iherezo ryayo ubwo u Bwanacyambwe bwatsindwaga n’u Rwanda mu gitero cyagabwe na Kigeli Mukobanya ahasaga mu wa 1378, akivugana Nkuba ya Nyabakonjo watwaraga u Bwanacyambwe muri ibyo bihe.

Ubutaka bw’Umudugudu wa Nyirabwana, ni kimwe mu bimenyetso karundura, kigaragaza ko ingoma y’u Bwanacyambwe yabayeho, kandi ikagaragaza n’inkomoko y’iryo zina, n’aho yatangiriye mu bwaguke bwayo.

Agasozi ko mu Mudugudu wa Rindiro gateganye n'Umudugudu wa Nyirabwana, kari mu ndeka gakondo y'ingoro y'ubwami bw'u Bwanacyambwe
Ibiro by'Akagali ka Kibagabaga, karimo Umudugudu wa Nyirabwana
Muri uyu Mudugudu wa Nyirabwana, habonekamo n'ibyicaro bikuru by'ibigo bikomeye nka Radio Maria Rwanda, kiri mu mudugudu wa Nyirabwana mu Kagali ka Kibagabaga
Urwibutso rwa Jenoside yakorewe Abatutsi rwa Kibagabaga, ruboneka mu Mudugudu wa Nyirabwana
Aho Ingoro ya nyuma y'ubwami bw'u Bwanacyambwe bw'Abongera yari yubatse, mu Kigo cya SAR MOTOR, ibi ni ibigabiro biharanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Dumbuli 2019-12-02 05:35:21

Ibiro by’akagali ka Kibagabaga ntibiryoshye biri gutanga isura itari nziza mu Rwanda no mu mahanga,ubuyobozimu ni hagire igikorwa pe, nakwibaza niba muri gasabo akagali ari kuriya nakwemeza ko mu cyaro ari amahoro

Kwamamaza