IGIHE

Mu Rwanda hagiye gutangizwa Ingoro Ndangamurage ya Muzika

2 15-07-2019 - saa 16:47, Muvunyi Arsène

Ku nshuro ya mbere mu Rwanda hagiye gutangizwa ingoro ndangamurage y’umuziki Nyarwanda mu rwego rwo kubika amateka.

Mu Rwanda habarizwa ingoro ndangamurage umunani zirimo iy’Ubugeni n’Ubuhanzi; iy’Ibidukijije; iy’Umurage yitiriwe Richard Kandt; iy’Amateka y’Urugamba rwo Guhagarika; iy’Abami n’izindi.

Umuryango witwa U&I Ark ugamije guteza imbere impano z’abahanzi, watangije igitekerezo cyo gushinga ingoro ndangamurage ya muzika nyarwanda, ahazabikwa amateka y’abahanzi n’ibihangano byabo, ibikoresho bya muzika kuva ku bya kera kugeza ku by’ubu, imyambaro y’abanyamuziki, imbyino n’ibindi bifite aho bihuriye na muzika.

Mu kiganiro IGIHE yagiranye n’Umuyobozi wa U&I Ark, Patrick Habarugira, yavuze ko iki gitekerezo cyaje mu rwego rwo gusigasira amateka ya muzika Nyarwanda bigaragara ko adafite aho abikwa.

Yagize ati “Iki gitekerezo cyaje nyuma y’aho dusanze hari ibihangano bigenda bizimira ndetse ntibisaba igihe kinini mu myaka itatu hari indirimbo ziba zitacyumvwa. Twabonye ko twashyiraho ingoro ndangamurage ibika ibihangano bitandukanye kugeza n’aho ubuvivi bwacu buzabasha kumva ibihangano byagiye bibaho.”

Iyi nzu kandi yashyizweho mu rwego rwo gushyigikira ubukerarugendo bushingiye ku muco Leta y’u Rwanda yashyize imbere nka kimwe mu biyinjiriza amadovize.

Umuryango wa U&I Ark ufite intego yo kuzubaka ingoro ndangamurage ya muzika Nyarwanda ariko mu ntangiriro izajya ikorera ahasanzwe hari Ingoro Ndangamurage y’Ubugeni n’Ubuhanzi iri ahahoze ari kwa Habyarimana i Kanombe.

Mu rwego rwo gutangiza iyi ngoro, hateguwe icyumweru cyahariwe imurikamateka ya muzika Nyarwanda “Kigali Music Exhibition Week” kizatangira tariki ya 22 kugeza ku wa 27 Nyakanga 2019, kizajya kibera muri Car Free Zone.

Nyuma y’iri murika hazahita hatangizwa ibikorwa by’Ingoro Ndangamurage ya Muzika Nyarwanda aho ababyifuza bazajya bayisura.

Ingoro Ndangamurage y'Ubugeni n'Ubuhanzi ni yo izaba icyicaro cy'iya Muzika Nyarwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
R. Eliel 2019-07-15 10:48:02

Uyu ni umushinga mwiza rwose, uje wari ukenewe! Mu izina rya #Kigali Talents School of Art

2
Irankunda Jerome 2019-07-15 10:28:31

Mwiriwe neza,

Ubwo ejo - bundi hazafungurwa n’inzu ndangamurage ya filime cg ya cinema! Hakwiye kwigwa uburyo ibintu bifitanye isano byahurizwa hamwe aho kugenda hafungurwa inzu ndangamurage kuri buri kintu gishya kije mu bitecyerezo, mwicare muganire neza mwitonze, mushyire ibintu ndangamurage byose hamwe hagendewe ku byiciro navuze haruguru!

Murakoze cyane,
Irankunda Jerome

Kwamamaza