IGIHE

Inkomoko y’Insigamugani ’Ntibigira rutangira!’

0 15-08-2019 - saa 10:41, Nsanzabera Jean de Dieu

Uyu mugani bawuca iyo babonye abantu bamwe bari mu makuba akomeye cyangwa se indwara yishe umuryango byo kuwurimbura, babura intsinzi ni bwo bavuga ngo “Ntibigira rutangira.’’

Wakomotse ku Mushambo Rutangira w’i Nduba mu Butare mu Bwanacyambwe (Kigali), ahagana mu mwaka wa 1700.

Ubwo hari ku Ngoma ya Cyilima Rujugira, asimbuye Karemera Rwaka ku ngoma kuko imurashe. (Yamuteye ubumuga bwo guhuma kuko yayihawe itari iye by’irage).

Karemera yari afite umugaragu witwa Rutangira agatura i Nduba mu Bwanacyambwe. Yari yaramugize umutware we wo mu batoni.

Haciyeho iminsi rero Rwaka arahuma ndetse na nyina Rukoni arasara. Rubanda bavuga ko ari ingoma yabarashe. Abiru na rubanda babonye Rwaka ahumye na nyina asaze, batumira Rujugira ngo aze kwima ingoma y’u Rwanda.

Yari yarahungiye se mu Gisaka, amaze kumwicira impfizi yitwaga Ruhashya. Rujugira amaze kugera mu Rwanda baramwimika yitwa Cyilima. Amaze kwima, se Mazimpaka aratanga, Rutangira ariwe utegeka urugo rw’ibwami n’umuryango we w’Abashambo, barakize baradendeza. Rujugira na we amurekera ubwo butware.

Nuko bibaho, kugeza ubwo abanzi ba Rutangira bamuteranyije n’ibwami, nyuma y’igitero cy’Abarundi, Mutaga ubwe yari yatabayemo by’ihururu. Ubundi abapfumu be bamuraguriye ko azatera u Rwanda ku ruhira; we abonye ingabo ze ziteye agira ubwuzu bwazo, yiyemeza kuzitabaramo.
Atwikisha inzu n’ivu rihowe imaze kuzima abyita uruhira, yambara inkindi ajya ku itabaro. Ageze ku rugamba arukomerekeramo; akomeretswa n’Umunyarwanda wari wiguze kuzamwica.

Uwo Munyarwanda ni Rugira rwa Shaza w’i Ntora mu Bwanacyambwe, yari yibwe mu kiraro baramufata bamuzanira Cyilima ngo amuhane.

Baramuboha ingoyi imaze kumurembya, ati “Nimureke nigure.’’ Bati “Urigura iki ngo tukubohore?’’ Abwira Cyilima ati “Mpa umuheto n’imyambi ine nzakwicira Mutaga!’’ Cyilima aramwemerera, baramubohora, bamuha umuheto n’imyambi aratabara.

Koko rero urugamba rw’Abarundi n’Abanyarwanda rwabaye rucyambikana, Rugira aba amaze kuhagera ahubirana n’abandi bari bagiye gucurangisha. Arahagarara araruhuka, abaza abandi, ati “Mutaga ari aha?’’ Mutaga aramwumva asohoka mu rugamba mu rugamba afite ingabo ye Rwamu rw’Abahizi n’amacumu; ingabo ayishinga hagati y’ingamba zombi, ati “Ndahari Sembyariyimana Bibero bikingira abarwanyi.’’

Rugira aba yashyizemo umwambi ararekera, ingabo ya Mutaga arayibarura, amurasa mu gatuza.

Mutaga, ati “Yifungurire yaraye kandi irataha kure ni Rwamu rw’abahizi.’’ Rugira amurasa umwambi mu kibero utunguka mu kindi aramujisha.

Mutaga baramuraha, baramuheka aratabaruka. Ubwo aba araneshejwe, ingabo z’u Rwanda zohereza abavuzi b’amacumu.

Abagiye kuvuga amacumu, abanzi ba Rutangira babagambanaho, bati “Nimugera ibwami muzavuga ko Abanyarwanda bose babaye abagabo uretse Rutangira wenyine wabaye ikigwari bitavugwa.’’

Abavuzi b’amacumu, koko baragenda babivuga gutyo. Cyilima abyumvise akubitiyeho n’ibindi birego basanzwe bamumuregaho, biramurakaza araritsira.

Ingabo ziratabaruka barara inkera barahiga. Rutangira agiye guhiga baramuseka bati “Uyu aragira ibiki!’’ Inkwenene bayivaho bose bamuha inkwekwe bavuga ko icyo gitero yakigizemo ubwoba akaba ikigwari. Cyilima ati “Uretse no kugira ubwoba, ntazi n’imirimo y’ibwami yashinzwe’’. Amunyagira aho, ibye bigabanywa rubanda.

Nuko Rutangira amaze kunyagwa ahinduka umukene karahava, bene wabo b’Abashambo na bo bose ibyabo bibura kirengera bigenda nka Nyomberi, baratindahara.

Rubanda rw’i Nduba bakajya babazanya byo kubannyegura ngo iyo anyazwe n’umuryango wose uhinduka imbwa?!

Ibyo mu Bashambo rero bimaze kuba umwaku, rubanda babifatiraho; babona abantu bari mu makuba y’amaburantsinzi, bati “Ibyabo bigiye nka Nyomberi, ntibigira rutangira!’’.

Kubura rutangira = kubura kirengera n’intsinzi

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza