Imvano y’ "Igiti cy’Icubya” gifitanye isano n’imvugo ‘u Rwanda ruratera ntiruterwa’

5 10-07-2018 - saa 21:48, Iradukunda Desire

Igiti cy’umuvumu kizwi nk’ “igiti cy’Icubya” gicubya abanzi, giherere mu Murenge wa Rutunga mu Karere ka Gasabo, cyatewe n’umuhungu w’Umwami Cyilima Rujugira ari we Ndabarasa, kikagira amateka akomeye ku busugire bw’u Rwanda no ku butwari bw’Abanyarwanda mu kurinda igihugu cyabo.

Iki giti cyatewe ahayinga mu 1700 ku ngoma y’Umwami Cyilima Rujugira, ubwo u Rwanda rwahuraga n’akaga gakomeye rugahagurukirwa n’ubwami bune bwari burukikije bushaka kurwigarurira, burimo Indorwa, u Burundi, u Bugesera n’Igisaka.

Rutabingwa Faustin w’imyaka 75, umwe mu basaza b’inararibonye baturiye iki giti akaba n’umwe mu batoranyijwe ngo bajye basobanurira abasura amateka yacyo, yavuze ko gifite amateka akomeye uhereye mu bihe u Rwanda rwari rusumbirijwe.

Yagize ati “Hari ibintu bakoraga babanje gutegura. Gutegura rero bivuze kuraguza no kwereza. Kubera abo bose bashatse gutera u Rwanda, Cyilima yateguye ikintu bita urugerero. Kubera ibyo bihugu byose byari bigiye guterera u Rwanda rimwe, Cyilima yaremye imitwe y’ingabo itandukanye ayishyira ahantu bakahita ku rugerero.”

Rutabingwa yakomeje avuga ko Cyilima Rujugira yifashishije imitwe y’Ingabo irimo Urukatsa, Imvejuru, Abadahemuka, Inyaruguru, Inyakare, Ababanda, Abakemba, Ababito, Intarindwa n’izindi, kugira ngo abashe gutsinda ibihugu byose byashakaga kwigarurira u Rwanda.

Urugamba rwatangiriye ku Burundi bidatinze buba buratsinzwe n’umwami wabo aricwa; u Bugesera bwo bwari nk’indagizo y’u Rwanda bwo ntibwateye ariko Ndorwa yarateye ifata Gasabo.

Rutabingwa yakomeje agira ati “Gasabo yafashwe n’Abanyendorwa ibyumweru bibiri. Cyilima atuma umuhungu we Ndabarasa ati ‘genda kubohoza Gasabo; yaraje araharwanira, ubwo arabatsinda. Ndabarasa yaraje ararwana barahabohora bagenda barwana i Fumbwe barahabohora.”

“Bamaze kubohora Gasabo Cyilima yahise ategeka Ndabarasa kuza gutura i Gasabo kugira ngo itazongera gufatwa ukundi. Noneho atera iki giti, iki cyitwa Icubya ricubya abanzi noneho ahavugira ko ‘u Rwanda rutera rudaterwa’.”

Iki giti kibangikanye n’igiti cy’Umurama, kimwe mu byari bifite akamaro gakomeye mu Rwanda rwo hambere kuko ari cyo cyacanwaga gusa i bwami, kikaba kinakoreshwa mu kwitira amata (mu kuyaha impumuro nziza).

Umuyobozi w’Akarere ka Gasabo wungirije Ushinzwe Ubukungu, Mberabahizi Raymond, yatangarije IGIHE ko aha hantu ndangamateka hatandukanye hari mu aka karere harimo na Rutunga, bari mu mishinga yo kuhabungabunga mu buryo bwihariye.

Yavuze ko hari n’ibikorwa bitandukanye biteganyijwe kuhakorerwa birimo nko kuhubaka inzu ndagamateka cyangwa kuhagira igicumbi cy’itorero ry’igihugu.

Yagize ati “Twakoze inyigo ijyanye n’uburyo aho hantu habungwabungwa ndetse turi kuganira n’inzego zishinzwe umuco kugira ngo tunarebe n’ukuntu twahashyira ingoro ndangamateka. Cyane cyane ko hariya ari naho itorero ry’igihugu ryatangiriye, ndetse no kuganira na Komisiyo y’itorero ry’igihugu kugira ngo tunarebe niba hatakongera kugirwa igicumbi cy’itorero.”

Mberabahizi yakomeje avuga ko babanje gahunda yo kwegeranya amateka ari ahantu hatandukanye mu Karere ka Gasabo, bityo bakaba bateganya ko muri gahunda y’imyaka itandatu bizeye ko bazaba bamaze kubona ubutaka bwo gukoreraho ibikorwa byo kubungabunga amateka n’umurage bikarimo.

Muri aka karere ni ho Umwami Gihanga Ngomijana yahangiye u Rwanda rwahoze ari urwa Gasabo nyuma rukaza kwaguka kugeza ubwo abakoloni baje kurugabanya rukaba uko turubona ubu.

Igiti cyIcubya giteye mu murenge wa Rutunga mu Kerere ka Gasabo,
Igiti cy'umurama kibangikanye n'igiti cy'Icubya
Rutabingwa azi amateka yuzuye y'aha hantu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
ziz 2018-07-13 06:36:24

Murakoze kutugezaho ayo mateka .Ntabwo yitwa RUTABINGWA yitwa RUTABAGIRWA yambereye umurezi mwiza amateka arayasobanukiwe .

2
Jojo 2018-07-11 03:59:33

Iyo mvugo siyo kuko rumaz imisi rutegwa knd rwamy rutegwa

3
Patrick K. 2018-07-11 02:59:31

Mujye mukurikira neza igihe mutegura inkuru. Uwo mugabo ntago yitwa RUTABINGWA yitwa RUTABAGIRWA ntimukabeshye abasomyi.

4
Bizimana Jean Baptiste 2018-07-11 02:08:44

Uriya wavuze amateka y’u Rwanda rwa Gasabo ntabwo ari Rutabingwa Faustin, ahubwo yitwa RUTABAGIRWA Faustin.

5
mukiza eliezer 2018-07-10 16:24:33

tubashimiy kumatek mutugejejeh birakwiy kumeny amatek yaranz urwatwibaruts ndavug u Rda muzatubwir amatek ya nyirarucaba

Kwamamaza