IGIHE

Amateka y’inzira y’umusaraba yagejeje kuri Jenoside yakorewe Abatutsi (Igice cya Gatatu)

1 17-04-2019 - saa 17:36, Nsanzabera Jean de Dieu

U Rwanda rwanyuze mu nzira zirimo amahwa, rwikorera umusaraba utamirijwe ingorane n’ubugome butisukirwa n’uwo ariwe wese w’ikiremwamuntu. Nyamara abarwikoreje uwo musaraba nabo bari abantu bafite umubiri n’amaraso, bagakwiye kugirira impuhwe ikiremwamuntu by’umwihariko Abanyarwanda bazengereje bakabacura bufuni na buhoro, bakababurabuza mu mashyi no mu mudiho.

Muri iyi nkuru turibanda cyane ku byabaye mu bihe bya Repubulika ya Mbere n’iya kabiri.

Igitabo “Intwari z’Imbanza zubatse u Rwanda rugahamya igitinyiro”, cyanditswe n’Umusizi Nsanzabera Jean de Dieu, kidutekerereza neza ibirari by’inzira y’umusaraba u Rwanda rwanyuzemo ikarugeza kuri Jenoside yakorewe Abatutsi mu 1994.

Iki gice cya gatatu cy’iyi nkuru, cyo kiribanda cyane cyane ku byabaye mu bihe bya Repubulika zombi, byaranzwe n’umuco wa kinyamaswa w’abayoboye muri ibyo bihe, ari bo Kayibanda Grégoire, Habyarimanana Juvénal na Sindikubwabo Théodore, wo kwikiza abatumvikana nabo cyane cyane mu miyoborere n’amabwiriza acamo ibice Abanyarwanda.

Bimwe mu byakajije inzira y’umusaraba mu bihe bya Repubulika ya Mbere n’iya Kabiri, muri byo twavugamo nk’itotezwa n’ihezwa ry’Abatutsi.

Ku butegetsi bwa Kayibanda, Abatutsi babuhuriyemo n’akaga katabaho, abari barahunze mu wa 1959 bimwa uburenganzira bwo kugaruka mu gihugu, abatahutse bakabacisha iy’ubusamo bakabica n’abasanzwe mu gihugu bagahora batotezwa babita ibyitso by’abagiye.

Ubutegetsi bwa Kayibanda wabaye Perezida wa Kabiri mu Rwanda rwa Repubulika, bwaranzwe no gukomeza kunegekaza umushinga wo kubaka igihugu mu buryo bwimbitse, intwaro ye ikomeye yari irondakoko, iheza Abatutsi mu myanya yose y’ubuyobozi kandi ibashyiriraho imipaka mu kubona imyanya mu mashuri nibyo bikorwa by’indashyikirwa yakoze ku ngoma ye.

Kayibanda Geregoli ni umwe mu bashenye u Rwanda, yirukana abarutuyemo, irondakoko riba igikoresho cyo guheza bamwe kigatonesha abandi, abantu bagapfa bahagaze ku bwo kwimwa uburenganzira bwo kubaho n’ibyo bagombwa nk’ikiremwamuntu ngo babeho. Niwe wahaye ibirari bikomeye Jenoside, igategurwa imyaka myinshi, ibyo byose nibyo byashoreye u Rwanda birugeza kuri Jenoside yakorewe Abatutsi mu wa 1994.

Politiki y’iringaniza mu Mashuri

Nyuma yo kwica abanyapolitiki bakomokaga i Gitarama bahiritswe ku butegetsi mu wa 1973, ikigayitse Repubulika ya kabiri yari iyobowe na Habyarimana yakoze ni ugushyiraho Politiki bise “ Iringaniza”.

Iringaniza ryabaye igikorwa cy’ubugome n’ubugizi bwa nabi buhanitse. Nicyo gikorwa kimakajwe n’ingoma ya Habyarimana ku buryo buhanitse, kikamamazwa kigasakara hose mu gihugu mbere ya Jenoside yo mu wa 1990-1994. Ryiswe iringaniza kandi ari ikandamizwa ryo mu rwego rwo hejuru.

Habyarimana akimara gufata ubutegetsi mu ijambo rye rya mbere, yahamije ko iringaniza rigomba gukurikizwa, ibyo akaba yarabivuze mu mbwirwaruhame ye yo ku wa 1 Kanama 1973, ubwo yatangazaga ku mugaragaro gahunda y’ibikorwa bya Leta yari amaze kwambura Kayibanda.

Kugeza mu wa 1990 byagaragariye buri wese ko iringaniza ari ribi, Politiki y’iringaniza ni inyundo karundura yakoreshejwe mu gusenya no kumomora burundu umushinga wo kubaka u Rwanda, cyane cyane inkingi y’ubumenyi, ubumwe n’imibereho myiza y’abaturage, byose byagombaga kubageza ku iterambere riramye.

Politiki ishingiye ku kinyoma

Ikindi kintu kibi Leta ya Habyarimana yazanye mu buyobozi cyangiza igihugu n’imitima y’abagituye, ni ugutegekesha ikinyoma no gukoresha iyitirira mu butegetsi, aho yafataga Umututsi umwe cyangwa se babiri, akabaha umwanya ugaragara, maze akavuga ko ahagarariye bene wa bo, ndetse akavuga ko Abatutsi na bo bari mu butegetsi, maze yiga ubucakura bwo gushyiraho za Animasiyo mu baturage zirirwa ziririmba Ubumwe n’Amahoro mu gihugu mu rwego rwo kuyobya amahanga ngo batamenya ibibera mu Rwanda.

Politiki ishingiye ku kinyoma yabirinduye burundu umushinga wo kubaka u Rwanda, Inkingi zari zigize Indangagaciro y’Abanyarwanda yo kwizerana iragenda irazima, buri wese aba nyamwigendaho, umuntu wese uri mu karere cyangwa ubwoko bwahawe akato akagenda yikandagira yikanga urunturuntu, abandi baba ba mpemuke ndamuke. Ruswa n’ubwigomeke bishinga imizi mu bantu.

Amacakubiri ashingiye ku moko no ku turere

Habyarimana afata ubutegetsi akabwambura Kayibanda, yitwaje ko agiye gukemura ikibazo cy’irondakoko ryari ryarabase ubutegetsi bwa Kayibanda. Nyamara we yakajije umurego mu kwimakaza amacakubiri mu buryo busumbye cyane ubwa Kayibanda.

Amacakubiri yo ku bwa Kayibanda yari ashingiye ku moko, naho ayo mu gihe cya Habyarimana ashingiye ku turere no ku moko. Kayibanda yibasiye Abatutsi gusa, ntabwo yarebaga Abahutu hagati ya bo, naho ku ngoma ya Habyarimana, ironda rye ryashingiraga ku irondakoko n’irondakarere.

Abaturage basigaye barapfuye bahagaze ubwizerane bwarashize, urwikekwe ari rwose mu bantu, kwishishana no kutabwizanya ukuri byarashinze imizi.

Guheza impunzi z’Abanyarwanda hanze y’igihugu. Mu ijoro ryo ku wa 5 Nyakanga 1973, ubwo Habyarimana yari amaze guhirika ubutegetsi bwa Kayibanda, yahise atangaza ubutumwa bw’Amahoro n’Ubumwe. Icyo gihe icyizere cy’ahazaza cyatashye mu mpunzi z’Abanyarwanda ziri hirya no hino ku Isi, cyo kuzasubira mu gihugu cyabo, intero ya bose yari iy’ibyishimo, bakungikanya amajwi yabo bagira bati “Dore umugabo w’Amahoro n’Ubwiyunge uzadusubiza mu gihugu cyacu.”

Ukuboza 1988 mu Nama nkuru ya MRND, nibwo yatangaje ku mugaragaro ijambo rikomeye cyane rishwishuriza impunzi ibyo gutaha kwazo agira ati “U Rwanda ni nk’ikirahure cyuzuye amazi, uramutse wongeyemo andi, yameneka. Ku bwabyo impunzi zishaka gutahuka zibe zibiretse, ahubwo ibihugu bizicumbikiye bizihe ubwenegihugu, bihamire iyo bari”.

Inama zarakomeje zisozwa n’iyabereye i Dakar muri Senegal mu wa 1989, yari iteranyijwe no kwiga ku bibazo by’impunzi z’Abanyarwanda ziba mu mahanga. Izo zose ntacyo zatanze ku guhindurwa umugambi wokamye Leta ya Habyarimana wo kwimakaza amacakubiri no kudaha agaciro ikiremwa-muntu.

Gutegura umushinga wa Jenoside yakorewe Abatutsi

Mu bikorwa byose byakozwe na Leta ya Habyarimana byari ukugenda akata imizi-shami y’igiti, akazaherukira ku muzi remezo ari nawo ufasha igiti gushinga imizi mu butaka. Nubwo yimakaje irondakoko n’irondakarere, yatangiye kwiga no gutegura uburyo abo Batutsi birirwaga baburagizwa bazarimburwa burundu, maze bakabona bagahumeka. Ku butegetsi bwe niho hateguwe imirongo migari y’uburyo Jenoside y’Abatutsi yazakorwa, ndetse bayishyira mu bikorwa, yemwe n’igerageza rya Jenoside ryarabaye kugira ngo barebe niba izashoboka koko.

Ku ndunduro y’itegurwa ry’uyu mushinga kirimbuzi wa Jenoside, nibwo noneho hatangiye gutozwa abazawushyira mu bikorwa, icyo gihe urubyiruko rwari rwibumbiye mu mashyaka Rushenyi, arirwo Interahamwe n’impuzamugambi, Amasasu, Interamwete batangiye gutozwa rwihishwa ubwicanyi buzibasira imbaga y’Abatutsi n’abandi batavugaga rumwe n’ubutegetsi bwa Habyarimana.

Dogiteri Sindikubwabo Tewodori wari umaze gukorera Habyarimana mu ngata, yashyize mu bikorwa umugambi wateguwe n’Abaperezida bamubanjirije bahawe ubucurabwenge n’abakoroni b’Ababiligi.

Muri make, Jenoside yakorewe Abatutsi ikura umuzi mu iyinjira ry’abakoroni mu Rwanda bakorewe mu ngata na Leta Nyarwanda ya nyuma y’ubukoroni ku butegetsi bwa Kayibanda, Habyarimana na Sindikubwabo.

Ntabwo Jenoside yakorewe Abatutsi yaje giturumbuka nkuko benshi babivuga, ahubwo yateguranywe ubuhanga ndetse inashyiranwa mu bikorwa itegurwa rihanitse kuko yageze ku ntego zayo mu minsi mike bitewe n’uruhare rukomeye Leta yayigizemwo n’ukurebera guteye isoni k’Umuryango w’Abibumbye.

Ng’ayo ng’uko!! Ng’uko inzira y’umusaraba Abanyarwanda banyuzemo mu gihe cy’imyaka isaga 99, ikageza kuri Jenoside yakorewe Abatutsi muri Mata 1994, igasiga ishenye ibitagira ingano, by’umwihariko Abatutsi basaga Miliyoni.

Ubutegetsi bwa Habyarimna na Kayibanda bwanogerejwemo umugambi wa Jenoside yakorewe Abatutsi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
sezekeye 2019-04-18 06:08:33

Politike irasetsa.Aba bagabo bali inshuti magara.Nyamara Habyarimana yishe Kayibanda.Nkuko bavuga,muli Politike ntihabaho ubucuti,habaho inyungu.Niyo mpamvu Compaore yishe Sankara.Igitangaje nuko ababikora bitwa abakristu.Iyi niyo mpamvu Yesu yasabye abakristu nyakuri kutivanga mu byisi,ahubwo bakarangwa no kujya mu nzira bakabwiriza ubwami bw’imana,kugeza igihe azagarukira ku munsi wa nyuma.Politike niyo itera intambara,inzangano,ubwicanyi,amatiku,amanyanga,ruswa,etc...

Kwamamaza