IGIHE

Amashyo, Amashongore, Amashyoro: Inyito z’ubuhangange bw’abatunzi mu Rwanda rwo ha mbere

5 26-06-2019 - saa 13:19, Nsanzabera Jean de Dieu

Buri gisekuruza mu by’Abanyarwanda, kigira imvugo yihariye, yuje ibigwi n’ubwishongore bw’ibihangange mu butunzi byo muri ibyo bihe.

Muri iki gice tugiye kubatekerereza imvugohame igaragaza umwishongoro n’icyizerabutunzi cy’igihe kirekire abatunzi bo mu Rwanda rwo ha mbere bakundaga gukoresha mu mvugo yabo ya buri munsi, ibasobanura abo bari bo n’intego zabo z’igihe kirekire.

Imvugo zakoreshwaga n’abatunzi bo mu bihe byo ha mbere zo ni nyinshi, ariko tugiye kwanzikira ku mvugo imenyerewe ariko benshi batazi inkomoko zayo n’icyo zisobanura. Imvugo twanzikiyeho, ni imvugo zakundaga kuboneka mu ndamukanyo zo ha mbere, zuje kwifurizanya ibyiza n’amahoro muri zo twavuga nka girinka, giramata, girumugabo, girumugore, girabana, amashyo, amashongore n’amashyoro.

Nk’uko tubikesha ibitabo “Intwari z’imbanza, zubatse u Rwanda rugahamya igitinyiro” n’ikindi kitwa “Ikeshamvugo mu Kinyarwanda” byombi dukesha Umusizi Nsanzabera Jean de Dieu, inzobere mu Busizi, Umuco n’amateka y’u Rwanda, tugiye kubatekerereza imvano y’izo mvugo, ibisobanuro byazo n’icyo zamariye Abanyarwanda mu mushinga w’igihe kirekire wo kubaka u Rwanda.

Inka yabaye ishingiro n’inkingi ya mwamba mu kugena ahazaza h’u Rwanda, aho Gihanga I Ngomijana wahanze ingoma y’I Gasabo ari nayo yabaye intango y’igihugu cy’u Rwanda cyagiye cyaguka, yahaye umurongo ubworozi bw’inka mu rwego ruhanitse, anazigira ikintu cyera, kizira, gitagatifu mu mateka y’u Rwanda. Iba ishingiro mu kubaka ubukungu bw’igihugu, ububanyi n’amahanga, kurwanya ubukene mu benegihugu, umuhuza w’imiryango n’igikoresho cya Politiki yo kwigarurira ibihugu bigera kuri 29 byariho mu bihe by’ihangwa ry’igihugu cye cya Gasabo ngo bibe igihugu kimwe, cyubakitse kandi kigwije ubuhangange n’igitinyiro.

Kubera icyo cyerekezo yahaye Inka, byatumye aca iteka ko Inka zigomba kuba nyinshi mu gihugu kandi buri muturage akabasha kugezwaho ibyiza bizikomokaho. Mu bihe bye niho hadutse umuco wo kugabirana inka, aho yabitoje ahereye ku gihugu cy’igituranyi cy’u Buliza cyane cyane mu Murenge wa Jabana, dore ko ari nayo nkomoko y’iryo zina rituruka ku nshinga “Kugabirwa”. Jabana bikaba bishatse kuvuga “Gabirwa”.

Mu bihe by’ingoma ya Gihanga n’abamuzunguye ku ngoma za mbere z’abami b’I Gasabo, nibo badukanye umuco wo gutangaho inka inkwano nk’ikimenyetso gihesha agaciro umukobwa ugiye gushyingirwa mu wundi muryango n’ikamba ry’uburere bwiza, ryagombaga gutegwa ababyeyi be.

Inka yakomeje kugwiza ibigwi mu bihe by’ingoma ya Cyilima Rugwe, aho yabaye ishingiro ry’ubuhake nk’akazi ko mu Rwanda rwo ha mbere, iba n’ishingiro ry’icyiru cyatangwaga k’uwahamwe n’icyaha mu bwere bw’I Rwanda mu butabera bwunga. Mu bihe bya Cyilima Rugwe, niyo yashingiyeho agena ibyiciro by’Ubudehe mu Rwanda rwo ha mbere byaje kuvamo inyito y’Ubuhutu, Ubutwa n’ubututsi mu mugambi w’igihe kirekire wo kuremamo Abanyarwanda umutima w’ihiganwa mu kubaka igihugu n’imiryango yabo, buri wese aharanira kuva mu cyiciro ajya mu kindi.

Muri ibyo bihe kandi, nibwo hadutse ikimenyetso kitwaga: “Amashyoro” cyashyirwaga kugisenge cy’inzu y’umutunzi w’inka ufite amashyo menshi, mu rwego rwo kugaragaza ko yageze ku rugero igihugu kifuza mu mibereho myiza y’abaturage no mu bukungu bw’igihugu. Kikaba n’ikimenyetso cyarangaga umuherwe wageze mu cyiciro cy’ubudehe cya mbere cy’ubututsi, asonewe ihiganwa ryo kwigira yari intego ya Cyirima Rugwe, ubwo yashyiragaho ibyo byyiciro by’ubudehe.

Ku ngoma ya Ruganzu Ndoli, inka yabaye ishingiro n’intwaro yo kwigarurira amahanga mu buryo bw’intambara yo kwagura u Rwanda no kuruhuza, yarimo ivuza ubuhuha mu bihe bye. Inka yazishingiyeho ashyiraho ibyiciro by’intwari zirimo: Uwahabwaga umudende, Impotore n’uwacanye uruti. Aho izo ntwari za. Ni we wanaciye iteka rishyiraho: « Inka y’imirindi» yahabwaga ibigwari byahunze urugamba.

Uko imyaka yarushagaho kwicuma ari nako umushinga wo kubaka u Rwanda urushaho kwatanya ujya mbere, niko inka zarushagaho kugira ibigwi, ari nako zikataza mu kujya mbere zororoka no kurushaho gukemura byinshi mu bibazo igihugu cyabaga gifite n’abaturage bacyo. Bigeze ku ngoma ya Mibambwe Gisanura, azishingiraho arwanya imirire mibi, aho yashyizeho amashyo akamirwa abakene, aho buri gitondo batondaga umurongo baza iwe mu Ruhango rwo mu Majyepfo ndetse n’ahandi henshi mu gihugu yagiye ashyira ayo mashyo y’inka, baje gukamisha. Ibyo binamuhindurira izina, abaturage bakurizaho kumwita: «Rugabishabirenge» kuko yagiraga ubuntu buhanitse.

Mu bihe by’ingoma ya Yuhi Gahindiro inka yagize ibigwi bikomeye inahabwa n’ishingano nyinshi cyane cyane mu kubaka ubukungu bw’igihugu, ubuhahirane n’ubutwererane bw’abenegihugu n’imibereho myiza y’abaturage, ugereranyije n’abamubanjirije, dore ko bari bamaze no kuba ishyanga ritubutse, ubwo byinshi mu bihugu byagombaga guhuzwa n’ igihugu cy’I Gasabo bikaba igihugu kimwe, byari bimaze komekwa ku Rwanda. Ku ngoma ye, yaciye amateka menshi agamije ahanini imibereho myiza y’abaturage.

Aho yagize ati: Nta munyarwanda ukwiye kubaho atagira inka, amata, umugabo, umugore, abana n’ibindi. Mu gushyira mu bikorwa iryo teka, buri muntu wese yahawe inka yo korora, udafite umugabo kubera impamvu runaka baramushyingira, udafite umugore nawe nuko n’abadafite abana ku mpamvu zo kuba inshike n’iz’ubuguma, ababyaye benshi bakabaha abana, abadafite amata kubera inka zabo zatetse cyangwa se zitarabyra, bakayoboka iyo kwa Gahindiro cyangwa se ku batware be, bakajya gukamisha.

Kugira ngo iryo teka ryaciwe na Gahindiro ka Sentabyo rikwire kandi rikurikizwe, yarishyize mu ndamukanyo y’Abanyarwanda. Aho bagombaga kuramukanye bifurizanya ibyo byiza byatuwe mu iteka ry’umwami Yuhi Gahindiro. Aho baramukanyagaga bagira bati: Girinka, Girabana, Giramata, Girumugabo, Girumugore n’izindi.

Gahunda yaciwe n’iteka rya Yuhi Gahindiro, niyo yiswe “Girinka”, iba gahunda ya kabiri mu mateka y’u Rwanda, igamije guteza imbere ubworozi bw’inka, kuko izindi z’abandi bami bubatse u Rwanda bafatiye ku nka, usanga barazifashishije mu gukemura ibibazo by’ubuzima bw’igihugu kuruta kuziteza imbere.

Mu ndamukanyo yuje ibibazo n’ibisubizo ishingiye ku muco w’ibyiza by’inka, yakoreshwaga itya։

Girinka: undi akamwikiriza agira ati: Amashyo n’amagana

Giramata;undi akikiriza agira ati: Ahore ku ruhimbi

Amashyo: Undi akikiriza agira ati:Amashongore

Girumugabo: undi agasubiza agira ati: Ndamukugize iyo yabaga ntawe afite, naho iyo yabaga amufite yaravugaga ati Ndamushimye

Girumugore: undi akamwikiriza agira ati: Ndamukugize iyo yabaga ntawe afite, naho iyo yabaga amufite yaravugaga ati Ndamushimye

Girabana: Undi akamwikiriza agira ati: Hungu na Kobwa

Iyo mvugo yari ikubiye mu ndamukanyo n’izindi zikomora inyito ku buhangange bw’inka, zakomeje kwamamara ziba gature mu muryango nyarwanda, ushaka kwivuga imyato n’ibigwi bye mu butunzi, akazikoresha, ushaka kugaragaza aho avuye n’aho ageze, kugeza na bugingo n’ubu ubwo aya mateka yandikwaga.

Muri zo mvugo n’ibimenyetso bifatiye ku nka, hakaba izatoranyijwe n’ibihangange mu butunzi bw’inka zahisemo nk’ikirango cy’ubudahangarwa n’igitinyiro cyabo. Nk’ imvugo iboneka mu ndamukanyo isubiza bavuga ngo: «Amashongore» baba bashaka kuvuga “Amashyo y’inka, ariko afite kirinda”, adashobora gushimutwa, afite ubushobozi buhanitse bw’ubwirinzi, kuko amashongore ubwayo, bisobanura “Amacumu y’ubwirinzi” atari ayo bajyanaga ku rugamba.

Amashyoro yo yabaga ari “ Uduti tubiri”, bashyiraga ku gisenge cy’inzu ya Kinyarwanda ahagana mu ruhamo rw’umuryango, z’abatunze amashyo y’inka menshi, twajyaga ahirengeye nko ku irembo ryinjirirwagamo na buri wese, nk’ikimenyetso cy’ubututsi n’ubuhangange mu butunzi bw’inka, amashyo atabarika.

Amashyoro yarangaga icyubahiro cy’umuntu utakiri mu rwego rwo gutubura inka ngo zibe nyinshi, watsinze ihiganwa ryo kwigira no gukungahaza igihugu. Bene abo, igihugu cyakundaga kubifashisha mu gutanga inka zo kugabira abakene, abanyamahanga banyazwe bakomekwa ku Rwanda, ingabo zatabarutse urugamba zirutsinze, intwari z’igihugu n’abandi.

Ku ngoma ya Ruganzu Ndoli, inka yabaye ishingiro n’intwaro yo kwigarurira amahanga mu buryo bw’intambara yo kwagura u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Bugingo Nathan 2019-06-27 14:05:18

Ukonukuri ndumugabo wokubihamya inka nikintu gikomeye

2
Bugingo Nathan 2019-06-27 14:05:17

Ukonukuri ndumugabo wokubihamya inka nikintu gikomeye

3
Bugingo Nathan 2019-06-27 14:05:14

Ukonukuri ndumugabo wokubihamya inka nikintu gikomeye

4
Bugingo Nathan 2019-06-27 14:05:14

Ukonukuri ndumugabo wokubihamya inka nikintu gikomeye

5
Bugingo Nathan 2019-06-27 14:05:14

Ukonukuri ndumugabo wokubihamya inka nikintu gikomeye

Kwamamaza