IGIHE

U Rwanda rumaze gusuzuma Ebola abantu basaga miliyoni 29 barimo 14 bayiketsweho

2 3-09-2019 - saa 15:28, Evariste Nsengimana

Guverinoma y’u Rwanda ikomeje gukora ibishoboka mu gukumira ko icyorezo cya Ebola kimaze umwaka cyibasiye Repubulika Iharanira Demokarasi ya Congo (RDC) cyagera ku butaka bwayo.

Birimo gusuzuma abanjira mu gihugu, gukingira no guhugura abaganga batanga ubufasha ku waba yayigaragayeho.

Muri Kanama 2018 nibwo Minisiteri y’Ubuzima muri RDC yatangaje ko Ebola yongeye kugaragara ku butaka bwayo ku nshuro ya 10. Iyi minisiteri igaragaza ko mu bantu 2,976 bayiketsweho, 2,871 basanga bayirwaye naho hafi 2000 imaze kubahitana harimo abana basaga 600.

Kuva icyo gihe Guverinoma y’u Rwanda yahise itangira gushyiraho ingamba zitandukanye zo gukumira ko icyo cyorezo cyagera ku butaka bwayo, ndetse kuva bitangajwe ko abayirwaye bagaragaye muri Kivu y’Amajyepfo na Goma bihana imbibi, igira inama abaturage yo kudakorera ingendo aho bashobora kugira ibyago byo guhura nayo.

Gusa kugeza uyu munsi imipaka y’u Rwanda yose irafunguye, icyakajijwe ni ingamba zo gukumira ko hari uwagera mu gihugu afite virus ya Ebola akaba yayikwirakwiza mu baturage.

Minisiteri y’Ubuzima mu Rwanda igararagaza ko mu ngamba yashyizeho harimo gusuzuma abantu bose binjiye mu gihugu banyuze ku mipaka no ku kibuga cy’indege. Imibare mishya igaragaza ko abantu 29.392.099 aribo bamaze gusuzumwa Ebola barimo 34,619 basuzumiwe ku bigo byagenewe gutanga ubufasha kuri Ebola.

Minisante igaragaza ko kugeza uyu munsi nta muntu uragaragaraho Ebola ariko ko muri abo bantu miliyoni zisaga 29 basuzumwe, 285 bari bayiketsweho n’abafitiwe impungenge z’uko bashobora kuba bayifite (Bayikanzweho).

Muri abo 285, abagera kuri 14 nibo bari bayiketsweho naho 271 bari bagiriwe impungenge ko bashobora kuba bayifite. Muri abo 14 harimo 10 basuzumiwe ku bigo nderabuzima, babiri basuzumirwa ku mipaka n’abandi babiri basuzumiwe mu giturage ariko birangira ntayo basanganywe.

Minisante kandi igaragaza ko imaze gukingira abaganga, abaforomo, abakozi b’ibitaro, abajyanama b’ubuzima, abakorerabushake n’abahuguriwe gushyingura abishwe na Ebola barenga ibihumbi bitatu.

Mu cyumweru cya nyuma cya Kanama, mu basuzumwe harimo bane bari bafitiwe impungenge barimo batatu bo ku kigo cyateganyirijwe gutanga ubufasha kuri Ebola cya Nyarushishi.

Muri rusange hamaze guhugurwa abaganga, abaforomo, abakozi b’ibitaro, abapolisi, abajyanama b’ubuzima, abakorerabushake b’Umuryango Utabara imbabare, abakora isuku, abacunga umutekano bagera kuri 23.657 bo mu Turere 15 dufite ibyago byo kuba Ebola yageramo byoroshye.

Minisiteri y’ubuzima yakoreye umwitozo ugamije gukumira, guhangana no gutanga ubufasha ku murwayi wa Ebola ku bitaro bitandukanye hirya no hino mu gihugu.

Hari kandi ubukangurambaga bushishikariza abantu kwimakaza umuco w’isuku bagakaraba intoki n’amazi meza n’isabune, kwirinda gukora cyangwa guhura n’amaraso cyangwa amatembabuzi by’umuntu wagaragaje ibimenyetso byayo, uyirwaye cyangwa uwo yishe.

Hari kandi kwirinda gukora no kurya inyama batazi aho zakomotse no kwihutira kumenyesha inzego zibishinzwe mu gihe bahuye na kimwe muri ibyo bimenyetso cyangwa ikibazo badasobanukiwe bagahamagara ku murongo utishyurwa wa 114 cyangwa bakamenyesha abajyanama b’ubuzima na Polisi.

Virus ya Ebola ni imwe mu zikaze kuko yandurira mu gukoranaho k’umuntu uyifite n’utayifite binyuze mu matembabuzi. Umuntu uhuye n’uwanduye Ebola ahita ahabwa urukingo agakurikiranwa ari ahantu ha wenyine mu gihe cy’iminsi 21.

U Rwanda rwafashe ingamba zikomeye zo gukumira Ebola

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Jyampayinka 2019-09-03 20:52:42

Ngo miliyoni zingahe😂😂😂😂

2
Kaka 2019-09-03 13:07:44

U Rwanda rufite abaturage bangahe ubwo?twese baradupimye hiyongeraho nabazavuka?????

Kwamamaza