CHUK:Abarwayi 1000 bategereje kubagwa, ubuke bw’abaganga buracyari imbogamizi

5 6-03-2017 - saa 21:11, Emma-Marie Umurerwa

Umubare w’abarwayi bategereje kubagwa indwara zitandukanye ugenda wiyongera uko bwije n’uko bucyeye mu gihe abaganga b’inzobere muri uru rwego bakiri mbarwa, ibi bikaba ari imwe mu mpamvu ituma abarwayi bashobora kumara igihe kirekire bategereje iyi serivisi.

Dr Faustin Ntirenganya ,umuganga uhagarariye ishami rishinzwe kubaga mu bitaro bya Kaminuza bya Kigali CHUK, avuga ko kuri ubu bafite abarwayi bagera ku 1000 baturutse mu bice bitandukanye by’igihugu bategereje kuzavurwa babazwe mu byiciro bitandukanye. Uyu mubare ngo ni munini ugereranyije n’abaganga b’inzobere mu kubaga ibi bitaro bifite.

Ibi yabitangaje kuri uyu wa 6 Werurwe 2017 ubwo itsinda ry’abaganga baturutse mu Bwongereza no mu Budage batangiraga igikorwa cyo kubaga abarwaye indwara zifata mu myanya y’ubuhumekero ‘Ear ,Nose and Throat’ (ENT) hamwe n’indwara yitwa imisipa ‘Hernie’, ku buntu.

Dr Ntirenganya yagize ati “Abategereje kubagwa ni benshi kuko ubu dufite abagera ku 1000 ariko ni mu byiciro bitandukanye. Muri iki cyiciro cy’abarwaye indwara zifata mu myanya y’ubuhumekero hamwe n’imisipa, dufitemo abarwayi bagera kuri 300 ariko ubu bazadufasha kubaga abarwayi bari hagati ya 80 na100.Urumva rero tuzaba tugabanyijeho.”

Akomeza avuga ko umubare w’abarwayi barwaye indwara zikira ari uko babazwe ukomeje kwiyongera mu Rwanda. Ati “Ikibazo gihari ni uko abarwayi bagenda biyongera uko bwije n’uko bucyeye kuruta abaganga babavura. Iyo abaganga nkaba b’inzobere mu kubaga baje rero badutera ingabo mu bitugu tukagabanya umubare w’abari bategereje kubagwa.”

Mu gihe cy’iminsi irindwi izi nzobere zizamara mu Rwanda, abaganga bari basanzwe babaga mu bitaro bya CHUK boherejwe kubaga mu bitaro bya Ruhengeri hamwe n’ibitaro bya Kibungo.

Hari abarwayi bari bamaze imyaka ibiri bategereje kubagwa
Ntancungu Alexis wo mu Karere ka Rwamagana, amaze imyaka ibiri afite ikibazo cyo guhumeka kubera uburwayi bwamufashe mu myanya y’ubuhumekero.

Yagize ati “Mpumekera mu kanwa birambangamira cyane. Nari narihebye mvuga ngo mu gihe cyo kumvura nibatemera ko nkoresha mituweli nzabigenza gute, ubu rero nishimye cyane kuko bagiye kumvura ku buntu; mfite icyizere ko ngiye kongera guhumeka nk’abandi bantu bazima.”

Umunyarwanda uba mu Bwongereza, Pasiteri Ntavuka washinze umuryango witwa ‘Rwanda Legacy of Hope’ akaba ari na we uzana aba baganga guhera mu mwaka wa 2012, avuga ko yasanze nta kindi yamarira igihugu cye uretse gutera inkunga urwego rw’ubuzima.

Yagize ati “Twazanye abaganga b’inzobere hamwe n’abaforomo bagera kuri 30, tuzana kandi n’ibikoresho tuzasiga mu Bitaro bitandatu turimo gukoreramo. Dufite gahunda y’uko mu kwezi kwa munani uyu mwaka tuzagarukana n’izindi nzobere zibaga amagufwa n’ubundi burwayi butandukanye.”

Pasiteri Ntavuka akomeza avuga ko igikorwa cyo kubaga ‘Hernie’ na ‘ENT’ kiri kubera mu bitaro bya Gahini, Rwamagana, Nyamata, CHUK, Kigeme na Kilinda, mu gihe cy’iminsi irindwi bikaba biteganyijwe ko bazabaga abarwayi bagera kuri 200.

Hernie ni indwara itandura , nta mpamvu ihari izwi iyitera ndetse ibyiciro byose by’abantu bishobora kuyirwara. Iyi ndwara kandi ngo ushobora kubagwa ikagaruka nyuma y’igihe runaka bitewe n’uburyo yabazwe, ariko kuri ubu mu Rwanda hari uburyo bushya ibagwamo igakira burundu.

Umurwayi wa 'Hernie' ari kubagwa n'abaganga b'inzobere
Inzobere z'abaganga ziri kubaga abarwayi bafite indwara z'ubuhumekero
Abarwayi bafite indwara zo mu matwi bari kubagwa
Abarwayi bari kuzavurwa batanze akayabo babazwe ku buntu
Dr Faustin Ntirenganya, Umuganga ubaga akaba ari na we uhagarariye ishami ribaga muri CHUK

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kalisa 2017-03-07 21:41:30

ibi nibaza ko habayeho gufata neza abaganga bahari biruseho byafasha ndetse bikanatinyura abanyarwanda bafite ubushobozi bwo kwiga ibyerekeye no kubaga kuko iyo babona harimo ukuvunika kuri hejuru kandi ntacyintu cyizima bavanamo bizatuma batabishishikaramo cyane bityo iki kibazo cyabaganga badahagije cyizaba iki gihe kirekire!

2
Valentine 2017-03-07 05:55:30

Imana ibahe umugisha

3
ufu 2017-03-07 05:10:52

Nkabanyarwanda tugombakugerageza gushirika ubwoba tukiga .Mubyo kubaga.tukunganira umuganga mwiza Faustin Ntirenganya.ukunda umwuga WE cyane wumunyarukundo.wunva umurwayi!!.ndetse nabanyarwanda.murakoze.

4
Eugenie 2017-03-07 03:35:38

Courage kuri aba baganga na pastor Osee

5
Ngamije 2017-03-07 02:09:04

Iki ni ikibazo gikomereye abaturagee cyane..kuko uza ubababaye bakakubika ...wavunitse ngo uzagaruke mu mezi atatu cg atandatu.Ntabwo ari muri chirurgie kuko n’izindi specialite niko bimeze.Mfite umuvandimwe wavunitse umugongo amaze amezi abiri ategereje igisubizo cya scanner yabuze uyinterpreta..Dr Diane narebe uburyo yasubiza abaganga mu bitaro bahembwe neza kuko baravunika kandi binjiriza leta menshi ba nyakubahwa birirwa mu ma offices bakayihembamo bakibagirwa ababa bavuye abo barwayi .Benshi mu baganga bigiriye mu ma privees abandi bamenyereye bihorera muri za missions akazi kose gakorwa nabaresidents(Abaganga bari mu kwiga specialite) bikageza naho bagwa mu bitaroo.Hashakwe igisubizo naho ubundi abaturage barazahayee..!!

Kwamamaza