IGIHE

Byinshi ku ndwara ya Hepatite ihangayikishije Isi: Ikiganiro na Dr Serumondo

1 28-09-2019 - saa 08:54, Twarabanye Venuste

Isi ya none ihangayikishijwe cyane n’indwara ya Hepatite ifata umwijima, aho usanga ivugwa cyane ari iterwa na virusi ya B na C ariko muri rusange hakaba hari ubwoko butanu bw’indwara za Hepatite ziterwa na virus, zose zangiza umwijima.

Mu kiganiro cyihariye na IGIHE, Dr. Janvier Serumondo uyobora ishami rishinzwe ubuvuzi bw’indwara za hepatite n’izandurira mu mibonano mpuzabitsina, mu kigo cy’igihugu cy’ubuzima (RBC) yasobanuye ko nubwo hepatite B na C arizo zizwi hari ubwoko butanu bw’indwara za Hepatite ziterwa na virus, ari bwo A,B,C,D na E.

Dr. Serumondo avuga ko abantu benshi bazi Hepatite ziterwa na virusi ya B na C kuko ari zo zikomeye cyane kandi zihangayikishije Isi muri iki gihe n’u Rwanda rurimo.

Indwara za Hepatite zishobora guterwa kandi n’udukoko duto “bacteries”, ibinyabutabire biboneka mu binyobwa “Alcool” ndetse n’imiti imwe n’imwe. Icyo zihuriyeho ni uko zose zifata kandi zikangiza umwijima.

Hepatite yandura ite?

Dr Serumondo, asobanura ko Hepatite A na E zandurira mu mwanda w’uyirwaye. Ni ukuvuga ko iyo uwagize aho ahurira n’uwo mwanda atakarabye ashobora kuyandura igihe afata amafunguro inyuze mu nzira y’igogora isanzwe.

Hepatite B na C zandurira mu maraso byaba mu kuyahabwa, gutizanya ibikoresho bikomeretsa nk’inshinge ku bitera ibiyobyabwenge; umubyeyi utwite ashobora kwanduza umwana amutwite cyangwa amubyara no mu mibonano mpuzabitsina.

Ati “Abanyarwanda barengeje imyaka 45 usanga akenshi baranduye hepatite C kubera ibijyanye n’ubuvuzi gakondo babayemo mu bihe byabo ndetse n’umuco gakondo wo guca ku nda (Kunywana) no gukoresha ibikoresho bikomeretsa (kurasaga, guca ibirimi, gukura ibyinyo)”.

Hepatite B niyo yandura cyane kurusha hepatite C, nubwo virusi ya C ariyo imara amasaha menshi hanze y’umubiri itarapfa. Ishobora kumara iminsi 21 ku gikoresho gikomeretsa.

Hepatite B ishobora kumara hanze y’umubiri iminsi irindwi itarapfa kandi ishobora no kwandurira mu macandwe igihe ay’uyirwaye ahuye n’ahantu hakomeretse.

Icyakora Dr. Serumondo avuga ko Hepatite D yo idashobora kubaho yonyine kuko umuntu ayirwara gusa ari uko arwaye hepatite B.

Ibimenyetso by’urwaye hepatite

Dr. Serumondo avuga ko umurwayi wa hepatite atinda kugaragaza ibimenyetso by’inyuma ku mubiri, ariko ko iyo byaragaraye, umurwayi agira ibimenyetso birimo guhinduka umuhondo kw’amaso, ibiganza, kugira umuriro, gucika intege, kubura ubushake bwo kurya, kugira iseseme, kuruka, kuribwa mu ngingo no kubyimba k’umwijima iyo uburwayi bwageze kure.

Ati “Uko uburwayi bugenda bwiyongera umwijima ugenda wangirika bikaba byatera indwara yitwa “cirrhose” ndetse bikazanagera kuri “cancer” y’umwijima ari byo biganisha ku rupfu.”

Kwirinda hepatite B na C

Nubwo hepatite C idafite urukingo hari amahirwe kuri Hepatite B kuko igira urukingo rurinda kuyirwara.

Mu kwirinda abantu basabwa kumenya uko bahagaze kugira ngo utayifite ayikingize, uyifite akurikiranwe n’abaganga.

Dr. Serumondo ati “Indwara za hepatite B na C ubu zipimwa mu maraso hakoreshejwe uburyo bw’ibizamini byihuta byitwa “tests rapides” bitanga ibisubizo mu minota 20.”

Akomeza avuga ko “Iyo upimwe ugasanga uyifite, bidahita byemeza ko uyirwaye cyangwa se bibaye karande ahubwo hakorwa ikizamini cya kabiri cyemeza ko uyirwaye.”

Igitangaje ni uko hepatite B ishobora gukira uyirwaye adafashe imiti ku kigero kiri hagati ya 90 na 95% mu gihe hepatite C yikiza ku kigero cya 15 na 45%.

Gusa abantu bagirwa inama yo kwisuzumisha no gufata imiti kuko nk’iyo Indwara ya hepatite B yabaye karande idakira burundu, nubwo uyirwaye akomeza kunywa imiti ituma adakomerezwa.

Hepatite C yabaye karande yo n’ubundi iravurwa igakira iyo uyirwaye afashe neza imiti mu gihe cy’amezi atatu.

U Rwanda ku isonga mu buvuzi bwa hepatite

Minisiteri y’ubuzima itangaza ko u Rwanda ruri ku isonga mu kuvura uburwayi bwa hepatite muri Afurika yo munsi y’ubutayu bwa Sahara.

Hari abaganga n’abakozi mu by’ubuzima babihuguriwe bavura hepatite B na C mu bitaro byose by’u Rwanda.

Imibare ya Minisiteri y’ubuzima igaragaza ko abagera kuri miliyoni eshashatu (6,000,000) bamaze gukingirwa hepatite B, guhera mu 2002.

Uretse abakingiwe iyo mibare igaragaza ko kuva hatangira ubukangurambaga kuri hepatite mu 2017 abarenga 1,000,000 bamaze gupimwa hepatite B na C, naho 15,000 bavuwe indwara ya hepatite C.

Ibi byihutishijwe nuko u Rwanda rwabonye uburyo bwihuta mu gupima “rapid tests” butanga ibisubizo mu minota 20 mu gihe mbere ibisubizo byashoboraga kumara iminsi bitaraboneka bitewe n’uburyo bwakoreshwaga.

Leta y’u Rwanda yakoze ku buryo igiciro cy’ikizamini kibanza cya hepatite kigabanuka kikagera ku $ 1 kivuye ku $ 15 naho icy’imiti y’amezi 3 ya hepatite C kigera ku $ 60 kivuye ku $ 780.

U Rwanda, rugendeye ku ntego y’ishami ry’umuryango w’abibumbye ryita ku buzima OMS igamije kurandura hepatite C mu mwaka wa 2030; rwashyizeho gahunda yihuse y’imyaka itanu yo kurandura hepatite C mu mwaka wa 2024.

Dr. Janvier Serumondo avuga ko kwirinda indwara z'umwijima ari ukwirinda inzira zose zanduriramo, kwisuzumisha no kwikingiza umwijima wo mu bwoko bwa B
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
ah 2019-09-28 05:49:54

Abantu benshi bibwirako B na C byandurira mugusuhuzanya ndizera basobanukiwe

Kwamamaza