Osée Ntavuka, Umupasiteri w’Umunyarwanda uba mu Bwongereza, amaze imyaka isaga itanu azana inzobere z’abaganga n’abaforomo bakabaga indwara zitandukanye ku buntu, ndetse bagahugura abaganga b’Abanyarwanda.

Pasiteri Ntavuka, yashinze umuryango witwa ‘Rwanda Legacy of Hope’ ku bufatanye na Minisante akaba azana inzobere z’abaganga zikabaga indwara zitandukanye ku buntu ndetse akazana n’ibikoresho byo mu buvuzi bitandukanye asiga mu Rwanda.

Kuri iyi nshuro azaba ari kumwe n’inzobere zigera kuri 30 zizatangira ibikorwa by’ubuvuzi guhera kuri uyu wa Mbere tariki ya 6 Werurwe 2017. Zizabaga indwara yitwa imisipa ‘Hernie’ hamwe n’indwara zifata mu myanya y’ubuhumekero. Iki gikorwa kizabera mu bitaro bya Gahini, Rwamagana, Nyamata, CHUK, Kigeme na Kilinda.

Ntavuka yagize ati “Kuri iyi nshuro tuzanye ibikoresho bifite agaciro ka miliyoni zisaga 80 tuzabisiga mu bitaro bitandukanye tuzakoreramo. Abarwayi bazavurwa guhera kuri uyu wa Mbere bakaba basaga 200.”

Akomeza avuga ko nyuma yo kubona ko mu Itorero ayoboye harimo inzobere z’abaganga n’abaforomo yasanze nta wundi musanzu yaha igihugu cyamubyaye uretse kubazana bagahugura abaganga b’abanyarwanda, bakanatanga umusanzu mu kubaga abarwayi.

“Mu Rwanda hari ikibazo cy’abaganga b’inzobere mu kubaga”

Bamwe mu baganga basanzwe biga ibijyanye no kubaga bazakorana n’izi nzobere bemeza ko mu Rwanda hari ikibazo cy’inzobere mu kubaga.

Caline Uwakunda, ni umwe muri aba baganga. Yagize ati “Mu Rwanda hari ikibazo cy’abaganga b’inzobere mu kubaga, izi nzobere rero ziri kuduhugura tumaze iminsi ibiri batwigisha ubundi buryo butandukanye bwo kubaga ‘Hernie’ mu gihe twe twari dusanzwe dukoresha uburyo bumwe.”

Dr Maniraguha Victor, avuga ko mu mahugurwa y’iminsi ibiri bahawe n’izi nzobere ahakuye ubumenyi azasangiza bagenzi be.

“Abarwaye indwara ya ‘Hernie’ ubona ko bagenda biyongera mu Rwanda, ariko abaganga b’inzobere mu kubaga ugasanga ari bacyeya. Ubumenyi tuzakura aha ngaha tuzagenda tubwigishe bagenzi bacu bakorera mu bitaro bitandukanye.”

Umwongereza, Dr Chris Oppong, inzobere mu kubaga, yemeza ko nubwo bahugura abaganga b’abanyarwanda igihe gito, kubera ubundi bumenyi baba basanzwe bafite, mu gihe gito baba bamenye uburyo butandukanye bukoreshwa mu kubaga indwara ya ‘Hernie’ ibi ngo bitanga icyizere ko mu gihe kizaza mu Rwanda habaza bari inzobere mu kuvura iyi ndwara.

Uretse ibikorwa byo kuzana inzobere mu kubaga, Umuryango ‘Rwanda Legacy of Hope’ ukora n’ibindi bikorwa bitandukanye byo gufasha abatishoboye birimo kubishyurira ubwisungane mu kwivuza, kuremera abatishoboye, gufasha abana b’inzererezi n’ibindi.

Pasiteri Ntavuka Osée washinze umuryango ‘Rwanda Legacy of Hope’
Dr Chris Oppong, inzobere mu kubaga
Caline Uwakunda yavuze ko mu Rwanda hasanzwe hari ikibazo cy'abaganga babaga indwara zitandukanye
Abaganga bazifatanya n'inzobere zo mu Bwongereza bahawe amahugurwa

[email protected]


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2015 ©. All rights reserved