IGIHE

Abanyarwanda basabwe kwirinda ingendo zitari ngombwa kubera Ebola yagaragaye i Bukavu

2 17-08-2019 - saa 12:46, Habimana James

Ubuyobozi bw’Akarere ka Rusizi bwasabye abaturage kwirinda gukora ingendo zitari ngombwa i Bukavu muri Repubulika Iharanira Demokarasi ya Congo, nyuma y’aho hagaragayeyo abarwayi babiri ba Ebola.

Ku wa Kane nibwo abarwayi babiri bagaragaje ibimenyetso bya Ebola muri Teritwari ya Mwenga mu Mujyi wa Bukavu ndetse umwe muri bo akaza kwitaba Imana.

Ebola yagaragaye i Bukavu nyuma y’igihe gito ibonetse i Goma ndetse byatumye u Rwanda rufata ingamba zikomeye zo gukumira ko iki cyorezo cyakwinjira mu gihugu.

Rusizi nk’akarere gahana imbibi n’uyu mujyi, katangaje ko kafashe ingamba zikomeye zirimo gushyiraho ibyambu bizwi aho abaturage bagomba kunyura.

Umuyobozi w’Akarere ka Rusizi wungirije ushinzwe Imibereho y’Abaturage, Nsigaye Emmanuel, yabwiye IGIHE ko ingamba batangiye kuzifata nyuma y’aho iki cyorezo kigaragaye.

Yagize ati “Sinavuga ko ingamba tuzifashe uyu munsi kuko kuva iki kibazo cyagaragara mu Burasirazuba bwa Congo, twe nk’akarere ka Rusizi kuko duhana imipaka n’iki gihugu twahise dufata ingamba zijyanye n’ubwirinzi, dutangira gukangurira abaturage inzira Ebola yanduriramo.’’

“Twababwiye kandi ko bagomba kugabanya ingendo zitari ngombwa mu bice biba byagaragayemo Ebola, guteza imbere isuku no gushyiraho ibikorwa remezo byifashishwa mu gukumira iki cyorezo. Twabikoze dufatanyije na Minisiteri y’Ubuzima, ubu umuntu wese uvuye muri Congo arasuzumwa hakoreshejwe camera, gukaraba intoki, gupima umuriro kandi ibi byose byashyizwe ku mipaka byose duhuriraho na Congo.”

Yavuze ko ubuyobozi bufatanyije n’abaturage bemeje ibyambu aho abaturage bagomba kunyura kandi bitababangamiye ubucuruzi bakora.

Nsigaye yavuze ko kugeza ubu amakuru barimo guhabwa n’ubuyobozi bwa Bukavu ni uko nta wundi murwayi urongera kugaragarwaho na Ebola gusa bakaba barimo gutegura inama bazahuriramo ngo bakomeze gufata ingamba zikomeye.

Yavuze kandi ko bamaze gutanga inkingo ku bakozi bo kwa muganga, abo ku mupaka n’abandi bose bafite aho bashobora guhurira n’umurwayi wa Ebola, hakaba haranatanzwe imyitozo igamije kwirinda iki cyorezo.

Virusi ya Ebola ishobora kwigaragaza nk’uburwayi kuva ku minsi ibiri umuntu ayanduye, kugeza ku minsi 21, gusa ngo ikunze kwigaragaza ku munsi wa Kane cyangwa uwa cyenda.

Ibimenyetso byayo ni ukugira umuriro, kurwara umutwe, kuribwa mu ngingo, kubabara mu muhogo, gucika intege, guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri.

Virusi ya Ebola yagaragaye bwa mbere mu 1976, iboneka kandi ku butaka bwa RDC. Yongeye kuhagaragara ku nshuro ya 10 muri Kanama 2018 ndetse imaze guhitana abagera ku 1900.

Abanyarwanda basabwe kwirinda ingendo zitari ngombwa muri Repubulika Iharanira Demokarasi ya Congo kubera Ebola abarwayi ba Ebola bagaragaye i Bukavu
Ikiraro gihuza umupaka w’u Rwanda na Repubulika Iharanira Demokarasi ya Congo ku mupaka wa Rusizi ya I cyatangiye gukoreshwa muri Werurwe 2019
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
KIKI 2019-08-17 06:15:31

abantu ntibumva nimukurikize amabwiriza ya Leta mwe gucaracara ahagaragaye Ebola,

2
hi 2019-08-17 06:06:50

zitaringombwa s ibyo biba bibareba . mureke twisohokyere

Kwamamaza