IGIHE

Abakozi ba Cogebanque basobanuriwe kanseri y’ibere biyemeza kuba abambasaderi mu kuyirwanya (Amafoto)

0 5-10-2019 - saa 15:34, Ishimwe Israel

Abakozi ba Banki Nyarwanda y’Ubucuruzi, Cogebanque, basobanuriwe birambuye imiterere ya kanseri ifata ibere, batanga isezerano ryo gufatana urunana mu rugamba rwo kuyirwanya.

Iki gikorwa cyabereye ku Cyicaro cya Cogebanque mu Mujyi wa Kigali ku wa 4 Ukwakira 2019. Cyateguwe ku bufatanye bw’iyi banki n’Umuryango Breast Cancer Initiative East Africa (BCIEA) mu bikorwa bijyanye n’ukwezi k’ubukangurambaga bwo kurwanya kanseri y’ibere.

Ishami rya Loni ryita ku buzima (OMS) rigaragaza ko mu 2018 kanseri zishe abarenga miliyoni 9.6 muri miliyoni 18.1 z’abari bazirwaye. Iyi raporo yerekanye ko mu Rwanda habarurwa 10 000 by’abarwaye kanseri zitandukanye aho iy’ibere iza ku mwanya wa kabiri nyuma y’ifata inkondo y’umura.

Ikigo cy’Igihugu cy’Ubuzima (RBC) kigaragaza ko mu 2017 abarwayi barenga 500 bivurije kanseri y’ibere hirya no hino ku bitaro.

Kanseri y’ibere nta kiyitera kizwi ariko akenshi ngo bijyana n’imiterere ya muntu nko kuba ari umugore cyangwa umugabo, imyaka umuntu afite kuko yibasira cyane abakuze, uruhererekane rw’imiryango n’ibindi.

Umuyobozi w’Umuryango BCIEA, Philippa Kibugu-Decuir, yabwiye abakozi ba Cogebanque ko hari icyo bakora mu guhangana na kanseri y’ibere haba mu kazi no mu ngo zabo.

Yagize ati “Mu myaka 10 ishize nta wavugaga kuri kanseri kubera umuco ariko ubu byarahindutse bitewe n’ubushake bwa guverinoma na gahunda zitandukanye. Mukwiye kuba ba ambasaderi muri uru rugamba.’’

Yakanguriye abagabo kudaheza abagore barwaye kanseri ngo babafate n’abatagifite agaciro ahubwo bakwiye kugira ubushake mu kubafasha kwisuzuma ngo bamenye uko bahagaze.

Philippa yagaragaje ko ibanga ryo kwirinda kanseri y’ibere ari ukwisuzumisha bihoraho, gukora siporo buri munsi, gufungura neza, konsa igihe kinini ku bagore n’ibindi..

Inzobere mu by’ubuzima zigaragaza ko kanseri y’ibere ivurwa igakira, cyane cyane iyo yagaragaye hakiri kare ndetse ikavurwa kare. Gusa ikibazo ni uko mu Rwanda mu bantu 10 000 barwaye kanseri muri rusange abivuza ni 3000 gusa.

Mukabanana Théonestine ushinzwe Ishami ryo kwakira abakiliya muri Cogebanque yavuze ko ubutumwa bahawe bwabasigiye umukoro ku mpinduka zikwiye mu guhangana na kanseri.

Yagize ati “Ubuhamya bw’abarwaye kanseri y’ibere bugaragaza ko abakize ari uko bisuzumishije, bakayifatirana ikiri hasi, igakira. Mu miryango yacu no mu bana bacu ubwo butumwa tuzabutanga ku buryo bugera kuri bose. Tugiye gutangira kwisuzumisha no kubikangurira abandi.’’

Abakozi ba Cogebanque bahawe ubutumwa bubakangurira ‘kwikunda, kwimenya no kwisuzumisha’ kuko aribwo bwirinzi nyabwo. Abiganjemo ab’igitsina gore beretswe uko bakwisuzuma bakamenya uko bahagaze.

Umuyobozi Mukuru wa Cogebanque, Cherno Gaye, yavuze ko nubwo kanseri ari indwara ikomeye ariko yavurwa igakira.

Ati “Mwereke urukundo kandi mwite ku barwaye, barabakeneye bikomeye mu bihe barimo. Nka banki ni byiza gushishikarira gukorana n’amavuriro ngo abakozi bisuzumishe bihoraho. Dushyigikiye iyi gahunda kuko iri mu bikorwa bya banki byo gufasha sosiyete mu mibereho myiza yayo.’’

BCIEA yaganirije abakozi ba Cogebanque, isanzwe yigisha ububi bwa kanseri y’ibere; ni umuryango washinzwe na Philippa nyuma yo gukira kanseri y’ibere, yahitanye umuvandimwe we utarabashije kubona ubuvuzi bukwiye.

Abakozi ba Cogebanque baritegura kuzifatanya na BCIEA mu rugendo ngarukamwaka rugamije gukora ubukangurambaga kuri kanseri y’ibere ruzaba ku wa 12 Ukwakira 2019.

Mukabanana Théonestine (ibumoso) ushinzwe Ishami ryo kwakira abakiliya muri Cogebanque yavuze ko ubutumwa bahawe bwabasigiye umukoro ku mpinduka zikwiye mu guhangana na kanseri
Umuyobozi Mukuru wa Cogebanque, Cherno Gaye, (hagati) yavuze ko nubwo kanseri ari indwara ikomeye ariko yavurwa igakira.
Umuyobozi ushinzwe Iyamamazabikorwa muri Cogebanque, Iyamuremye Antoine, ni we wayoboye iki gikorwa
Umuyobozi w’Umuryango BCIEA, Philippa Kibugu-Decuir, yabwiye abakozi ba Cogebanque ko hari icyo bakora mu guhangana na kanseri y’ibere haba mu kazi no mu ngo zabo
Philippa yagaragaje ko ibanga ryo kwirinda kanseri y’ibere ari ukwisuzumisha bihoraho, gukora siporo buri munsi, gufungura neza, konsa igihe kinini ku bagore n’ibindi
Mukabanana Théonestine ushinzwe Ishami ryo kwakira abakiliya muri Cogebanque
Aha abakozi ba Cogebanque berekwaga uko bashobora kwisuzuma kanseri y'ibere
Abakozi ba Cogebanque bahuguwe ku buryo bakwisuzuma kanseri y'ibere
Umuyobozi Mukuru wa Cogebanque, Cherno Gaye, yavuze ko nubwo kanseri ari indwara ikomeye ariko ishobora kuvurwa igakira mu gihe yamenyekanye hakiri kare
Abakozi ba Cogebanque bahawe ubutumwa bubakangurira ‘kwikunda, kwimenya no kwisuzumisha’ kuko aribwo bwirinzi nyabwo. Abiganjemo ab’igitsina gore beretswe uko bakwisuzuma bakamenya uko bahagaze

Amafoto: Niyonzima Moïse

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza