Abanyarwanda 10 mu baganga 60 bemerewe gutangira ubuvuzi bwo kubaga muri Afurika

0 6-12-2018 - saa 09:25, Evariste Nsengimana

Abaganga 60 babaga indwara zitandukanye, bo mu bihugu 20 byo ku mugabane wa Afurika, barimo Abanyarwanda 10, batsinze ibizamini bibemerera gukorera uwo mwuga mu Karere ka Afurika y’Iburasirazuba, iyo hagati n’iy’Amajyepfo.

Ni ibizamini bitangwa n’Ishuri rikuru ryigisha kubaga ry’umuryango uhuza ibyo bihugu (College of Surgeons of East, Central and Southern Africa, COSECSA).

Bamaze iminsi itatu mu Rwanda mu bizamini byo kubaga indwara z’abana, iz’amagufa, izo mu mutwe, iz’urwungano ngogozi n’izindi.

Kuri uyu wa 5 Ukuboza nibwo 60 babitsinze muri 65 babikoze bakiriwe mu muryango, mu muhango wabereye i Kigali.

Umuyobozi w’ihuriro ry’abaganga babaga mu Rwanda, Dr. Nyundo Martin, yavuze ko “COSECSA Ifite inshingano zo guteza imbere imyigishirize y’abaganga babaga n’ubuvuzi bwabyo [...] Urumva ko iri kugira uruhare mu kongera umubare wabo mu gihugu cyacu.”

Iryo huriro nyarwanda rimaze imyaka 10 muri COSECSA. Abaganga b’abanyarwanda 10 bahawe impamyabumenyi uyu munsi, biyongera kuri 44 basanzwemo n’abandi 17 bitegura gukora ibizamini.

Dr. Nyungo yasobanuye ko ‘Umuganga usanzwe yemererwa gukora ibizamini bya COSECSA mu gihe yarangije kwiga Kaminuza kandi akabanza kwiga amasomo yayo imyaka itanu. Ufite impamyabumenyi ya Kaminuza mu kubaga, akiga imyaka ibiri.’

Kuba ibi bizamini byakorewe mu Rwanda, Abanyarwanda 10 babikoze bagatsinda bose, Minisitiri w’ubuzima, Dr. Diane Gashumba, yavuze ko “Ari ubutumwa ku baganga bakiri mu masomo no mu mavuriro kugira ngo bakomeze gukunda umurimo wabo, abanyeshuri n’ababigisha bakomeze kubikora neza.”

Dr. Mpirimbanyi Christophe, umwe mu batsinze ibi bizamini yagize ati “Nishimiye ko nateye indi ntambwe yo kujya mu kindi cyiciro cyihariye mu bijyanye no kubaga [...] Ni urwego rutwemerera gukora ku rwego mpuzamahanga.”

Mu Rwanda hari abaganga babaga basaga 80.

Abaganga babaga 60 batsinze ibizamini bimemerega gukorera muri COSECSA
Abanyarwanda 10 mu baganga 60 bemerewe gutangira ubuvuzi bwo kubaga muri COSECSA
Abayobozi bayoboye umutambagiro w'abaganga wahawe impamyabumenyi
Minisitiri w’ubuzima, Dr. Diane Gashumba, yavuze ko ari ubutumwa ku baganga bakiri mu masomo no mu mavuriro kugira ngo bakozeme gukunda umurimo wabo, abanyeshuri n’ababigisha bakomeze kubikora neza
Umuyobozi w'ihuriro Nyarwanda ry'abaganga babaga, Dr Nyungo ari gutanga ikiganiro

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza