IGIHE

Uwashinze Classic Optic ikorera no mu Rwanda yahembewe guteza imbere ubuvuzi bw’amaso muri Afurika

0 6-09-2019 - saa 21:27, IGIHE

Umunya- Côte d’Ivoire, Botoh Deythy Samson Bayard, washinze inzu ya ‘‘Classic Optic’’ icuruza ibikoresho byifashishwa mu buvuzi bw’amaso birimo amataratara, ikorera mu Mujyi wa Kigali yahembwe nka rwiyemezamirimo muto muri Afurika.

Botoh yahawe igihembo cy’uwateje imbere serivisi z’ubuvuzi bw’amaso muri Afurika. Ibi bihembo byiswe PADEV (Prix Africain de Développement) bitegurwa binyuze mu Muryango wigenga uharanira Inyungu z’Ikiremwamuntu [Fondation 225] uyoborwa n’Umunya- Côte d’Ivoire André Koffi Kouadio.

Byatangiwe mu Mujyi wa Kigali mu birori byabereye muri Kigali Marriott Hotel, hagati ya tariki 30 Kanama n’iya 2 Nzeri 2019.

Ni igikorwa cyitabiriwe n’abayobozi batandukanye barimo abanyepolitiki, abahagarariye ibihugu byabo mu Rwanda na sosiyete sivile, inzobere mu by’ubukungu n’abandi.

Botoh yashinze Classic Optic muri RDC n’u Rwanda agamije kugeza serivisi z’abakenera ibikoresho by’ubuvuzi kuri benshi.

Inzobere mu bijyanye n’Ubuvuzi bw’Amaso muri Classic Optic, Maryse Adekpate, yabwiye IGIHE ko bishimiye igihembo cyahawe umuyobozi ku nshuro ya mbere.

Yagize ati ‘‘Ni izindi mbaraga no guha agaciro akazi na serivisi tumaze igihe dutanga muri Kigali ndetse cyaduhaye intego yo gukomeza gutanga ibikoresho byiza bijyanye no kunoza serivisi nubwo bitaba byoroshye.’’

Classic Optic, imaze imyaka ine ikorera ku butaka bw’u Rwanda aho ibarizwa i Remera mu nyubako ya Umuyenzi Plaza, yishimira ko yakiriwe neza.

Ati ‘‘Intego ni ukuzana ibikoresho (amataratara) byiza bituruka mu Burayi, bitangwa n’abakozi b’abanyamwuga barimo abava muri Côte d’Ivoire, u Rwanda n’u Burundi.’’

Ibihembo bya PADEV byatangwaga ku nshuro ya 14, byahuje abasaga 500, muribo hahembwe 80 bo mu bihugu 15 birimo ibya Afurika, u Burayi, Leta Zunze Ubumwe za Amerika n’u Bubiligi.

Côte d’Ivoire ni yo yihariye ibihembo kuko abakomoka muri iki gihugu batahanye ibihembo 38 mu byiciro bitandukanye.

Muri ibi birori hahembwe kandi abari mu byiciro bine birimo icy’abameya 100 beza muri Afurika, igihembo Nyafurika ku ndashyikirwa, igihembo cyitiriwe Apollinaire Compaoré kuri ba rwiyemezamirimo bato n’igihembo nyamukuru.

Ababyitabiriye bahuriye mu isangira mbere yo gutambagizwa ibice bitandukanye bigize u Rwanda.

Ibihembo bya PADEV byatangiye gutangwa mu 2006 i Abidjan muri Côte d’Ivoire, bigizwemo uruhare n’imiryango y’abasivile bo mu bihugu 12 bya Afurika. Bifite intego yo kuzamura abahanga udushya no kwereka Abanyafurika bose ko bashobora gutanga umusanzu mu guteza imbere umugabane wabo n’ibihugu bakomokamo.

Umunya- Côte d’Ivoire, Botoh Deythy Samson Bayard, washinze inzu ya ‘‘Classic Optic’’ ikorera no mu Rwanda yahembewe guteza imbere ubuvuzi bw’amaso muri Afurika
Botoh yahawe igihembo cy’uwateje imbere serivisi z’ubuvuzi bw’amaso muri Afurika
Ibi bihembo byatangiwe mu Mujyi wa Kigali, bihabwa ba rwiyemezamirimo bato bafite ibikorwa bifatika muri Afurika
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza