IGIHE

Ubushakashatsi bwagaragaje ko ingaruka z’umwuka mubi zigera no ku mwana uri mu nda

0 18-09-2019 - saa 12:46, Iradukunda Serge

Abashakashatsi bo muri Kaminuza ya Hasselt mu Bubiligi berekanye ko bimwe mu bigize umwuka mubi igihe uhumetswe n’umugore utwite, bishobora kugera ku mwana binyuze muri nyababyeyi ndetse bikaba byagira n’ingaruka ku buzima bwe.

Ubu bushakashatsi bwerekana ko igihe umugore ahumetse umwuka wanduye urimo umwotsi w’imodoka cyangwa uva mu gutwika nyiramugengeri; tumwe mu duce tw’ikinyabutabire kiwugize cyitwa ‘black carbon’ twinjira mu bihaha, tugakomereza mu bindi bice by’umubiri kugera no muri nyababyeyi ndetse tukaba twagira ingaruka z’ako kanya ku mwana uri mu nda.

Ibyavuye muri ubu bushakashatsi bije bikuraho imitekerereze ya benshi bumvaga ko nyababyeyi ifite ubushobozi bwo kurinda umwana ku buryo ntacyayinjiramo kivuye hanze.

Abagore 25 batanywa itabi nibo bakoreweho ubushakashatsi, igihe bari bamaze kubyara abashakashatsi bafashe nyababyeyi zabo basanga ku gice cy’imbere kireba umwana hariho ikinyabutabire cya ‘Black carbon’.

Ubu bushakashatsi bwagaragaje ko uko umugore yarushagaho guhura n’iki kinyabutabire ariko n’ingano yacyo yiyongeraga muri nyababyeyi.

Ubundi bushakashatsi butandukanye burimo ubwakorewe mu MuJyi wa Londres mu 2017 na 2018 bwagiye bugaragaza ko umwuka wanduye ufite aho uhuriye no kwiyongera ko gukuramo inda, kuvuka kw’abana batagejeje igihe ndetse no kubyara abana bafite ibiro bike.

Abagore basabwe kwirinda umwuka wanduye kuko ugira ingaruka ku bana batwite
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza