IGIHE

U Rwanda rwinjiye mu bufatanye n’u Budage bugamije kurwanya indwara z’ibyorezo birimo Ebola

0 4-10-2019 - saa 14:31, Evariste Nsengimana

Guverinoma y’u Rwanda n’iy’u Budage zatangije ubufatanye bugamije kurwanya no gukumira indwara z’ibyorezo byibasira abaturage, zirimo na Ebola imaze iminsi yibasiye abo muri Repubukila Iharanira Demokarasi ya Congo(RDC) ihana imbibi n’ibihugu ruherereyemo.

Amasezerano ku bikubiye muri ubwo bufatanye yashyizweho umukono kuri uyu wa Gatanu n’Umunyamabanga wa Leta muri Minisiteri y’Ubuzima ushinzwe ubuvuzi bw’ibanze mu Rwanda, Dr Ndimubanzi Patrick na Minisitiri w’Ubuzima w’u Budage, Jens Spahn.

Minisitiri Spahn yavuze ko ayo masezerano akubiyemo uburyo impande zombi zizafatanya mu buryo bwa tekinike, amahugurwa no kubaka ibikorwa remezo byifashishwa mu gukumira no guhangana n’indwara z’ibyorezo.

Ati “Ni amasezerano hagati y’u Rwanda n’u Budage ku kwitegura guhangana na Ebola y’uburyo bwo guhugura abazahugura abandi bigizwemo uruhare n’ibigo byo mu Budage. Mu by’ukuri turashaka gushimangira ubufatanye dufitanye kuko umutekano w’ubuzima n’indwara z’ibyorezo ntawe umenya umupaka bigira.”

Minisitiri Spahn yavuze ko by’umwihariko yashimye uburyo u Rwanda rukomeje gushyira imbaraga mu gukumira ko Ebola yagera ku butaka bwayo mu gihe ku mupaka uruhuza na RDC abantu bamuka ari urujya n’uruza.

Yavuze ko mu ntangiriro z’ubu bufatanye icyo gihugu kizaha u Rwanda inkunga y’amayero ibihumbi 500[asaga miliyoni 500Frw] ariko ibikorwa bikazagenda byagurwa mu minsi iri imbere.

Dr Ndimubanzi yavuze ko amasezerano agamije gukumira no kurwanya ibyorezo muri rusange binyuze no mu kongera ubumenyi bw’abantu batandukanye ku mpande zombi, kongera imyitozo ku kubikumira no kubirwanya.

Ati “Ikindi ni ukubaka inyubako abantu bakekwaho indwara nka Ebola n’izindi ndwara zikomeye, gukora n’ikigo cy’icyitegerezo aho abantu bashobora kongerera ubumenyi, ari abacu n’ab’u Budage.”

Dr Ndimubanzi yavuze ko u Budage busanzwe bufite impuguke zihugura abanyarwanda ku gukumira Ebola ariko ko hagiye no gutangizwa inyubako yihariye yo gufasha abafite indwara z’ibyorezo.

Yavuze kandi ko abaturage aribo bafite uruhare rukomeye mu gukumira no kwirinda kwandura indwara z’ibyorezo birinda kujya aho byagaragaye, kumenya ibimenyetso byayo, gutanga amakuru, kwikingiza ku zikingirwa, kwivuriza ku gihe n’ibindi.

Minisitiri Spahn n’itsinda bari kumwe bakomereje mu bitaro bya Kibagabaga, bareba uburyo u Rwanda rushyira mu bikorwa gahunda zitandukanye zo gukumira no kwirinda indwara z’ibyorezo zirimo na Ebola.

Ishami ry’Umuryango w’Ibibumbye rishinzwe ubuzima, OMS, rigaragaza ko kuva muri Kanama 2018, Ebola imaze kugaragara ku bantu basaga 3000 muri RDC barimo abasaga 2000 bishwe nayo.

Kuva Ebola yongeye kugaragara muri RDC, Guverinoma y’u Rwanda yahise itangira gushyiraho ingamba zitandukanye zo gukumira ko icyo cyorezo cyagera ku butaka bwayo.

Muri izo harimo gusuzuma abantu bose binjiye mu gihugu banyuze ku mipaka no ku kibuga cy’ingede aho imibare iheruka gutangazwa mu ntangiro za Nzeri 2019 igaragaza ko abantu 29.392.099 aribo bari bamaze gusuzumwa Ebola barimo 34,619 basuzumiwe ku bigo byagenewe gutanga ubufasha kuri Ebola.

Hari kandi gukingira abakora imirimo ifitanye isano n’ubuzima barimo abaganga, abaforomo, abakozi b’ibitaro, abajyanama b’ubuzima, abakorerabushake n’abahuguriwe gushyingura abishwe na Ebola barenga ibihumbi bitatu, abakora iyo mirimo barenga ibihumbi 23 bo mu Turere 15 bahawe amahugurwa y’uko bafasha umuntu wagaragaweho na Ebola.

Minisiteri y’ubuzima kandi yakoreye umwitozo ugamije gukumira, guhangana no gutanga ubufasha ku murwayi wa Ebola bitaro bitandukanye hirya no hino mu gihugu, igira inama abaturage yo kudakorera ingendo aho bashobora kugira ibyago byo guhura nayo n’ibindi.

U Rwanda rwinjiye mu bufatanye n’u Budage bugamije kurwanya indwara z’ibyorezo birimo Ebola

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza