IGIHE

Kimwe cya kabiri cy’ibyorezo bya Ebola ntibimenyekana

0 16-06-2019 - saa 10:15, IGIHE

Abashakashatsi batangaje ko kimwe cya kabiri cy’ibyorezo bya Ebola bitamenyakana kubera ko hari aho biba nta bushobozi bwo kiyisuzuma cyangwa ikitiranywa n’izindi ndwara.

Bitangajwe nyuma y’iminsi mike icyo cyorezo gihitanye abantu babiri muri Uganda nyuma yo guhitana amagana muri Repubulika Iharanira Demokarasi ya Congo.

Ebola ni imwe mu ndwara zandurira mu matembabuzi kandi zica mu gihe gito gishoboka.

Inzobere zatangaje ko mu bihugu bya Afurika kubera kugira uduce twinshi turi kure kandi bigoranye kuhagera, bakeka ko hari abarwayi bashobora kua bicwa na Ebola ntibimenyekane cyangwa bakajya kwa muganga kubera ubushobozi buke bw’ibitaro bakavurwa izindi ndwara kandi barwaye Ebola.

Guhera mu 1976 ubwo Ebola yatangiraga kumenyekana, hamaze kugaragara ibyorezo byayo icumi.

Muri Kaminuza ya Cambridge bakoze ubushakashatsi bagendeye ku byorezo bya Ebola byabaye muri Afurika y’Iburengerazuba kuva mu 2013 kugeza 2016. Bashingiye ku buryo Ebola yandura, aho ibanza kuva mu nyamaswa ikajya mu bantu hanyuma abantu bakabona kugenda bayihererekanya.

Ibyavuye mu bushakashatsi byagaragaje ko kubera ubwo buryo inyamaswa zanduza abantu, nibura kimwe mu byorezo bibiri bya Ebola aricyo kimenyekana. Bivuze ko hari ahandi hashobora kuba hibasirwa n’iyo ndwara ntihamenyekane.

Bashingiye ko mu bice bya kure, ubushobozi bw’umuganga waho mu gutahura ko umurwayi yarwaye Ebola buri munsi ya 10 %.

Emma Glennon wo mu ishami ryishinzwe ubuvuzi bw’inyamaswa muri Kaminuza ya Cambridge yavuze ko guhangana na Ebola mu buryo bukwiriye hagomba gushakishwa uburyo buhamye bwo guhangana n’icyo cyorezo bahereye hasi aho gituruka.

Ni ukuvuga ko hagombva kurebwa uburyo iyanduzwa rya Ebola riva ku nyamaswa rijya ku muntu bigomba guhashywa.

Glennon yavuze ko icyorezo cya Ebola muri Afurika cyenyegezwa n’urujya n’uruza rw’abantu, amakimbirane no kutagira uburyo buhamye bwo kuyisuzuma.

Icyorezo cya Ebola cyatangiye muri Kanama muri Repubulika Iharanira Demokarasi ya Congo kimaze kugaragara ku bantu basaga 2000,kimwe cya gatatu cyarabahitanye.

Ebola ni indwara yandura iyo amaraso cyangwa amatembabuzi y’umuntu uyirwaye akoze ku muntu muzima.

Ibimenyetso byayo ni ukugira umuriro, kurwara umutwe, kuribwa mu ngingo, kubabara mu muhogo, gucika intege, guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri w’umuntu.

Kuyirinda bisaba kwita ku isuku abantu bagira umuco wo gukaraba intoki hakoreshejwe amazi meza n’isabune; kwihutira kujya kwa muganga igihe umuntu agaragaje ibimenyetso bya Ebola, gukomeza umuco wo kwivuza hakiri kare igihe cyose wumva urwaye no kwirinda gukora ingendo zitari ngombwa ahagaragaye Ebola.

Ebola ni indwara yandura iyo amaraso cyangwa amatembabuzi y’umuntu uyirwaye akoze ku muntu muzima.
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza